1
Vha dobẹ ọgwhẹmhẹ iynọgwho kee je odalo.
2
vha rhi ẹloe gbe elele vha chi wẹ mama egbe, egwho e she liyọ tsẹ ighyiukọ Ishinẹgba mekyia gwhe e vha yẹsẹ khi ighyiukọ Ishinẹgba lọ.
3
Vha kee satọ eni e la ogba igwhumha egbe, abhizẹzẹ khi ayọ vha nu wẹ la, abhizẹzẹ khi ijegbe vhẹ laa mẹẹ osue.
4
Ọgbọ kwu ọ rhi ekpẹ ni ugwhẹ dala ẹtsẹkẹ kwu, abagwhoyọ vha rhi ẹtẹtẹ ugwhẹ shi ipfuasẹ, khi Ishinẹgba ọ la laa gwu ikpotso ali emọse ni e ye odọsẹ ẹzọ.
5
Vha dobẹ odẹ inyele agbọ vhẹ chi ọgwhẹmhẹ ukpaghọ le. vha dobẹ emeni vha mhuẹ kwhese vhẹ, rharhi khi Ishinẹgba ọ she ẹẹ li, “Imha laa tsua vhẹ kwa gwhe, wẹ khi rhẹmhi laa sọ vhẹ oshimhi egbe.”
6
Eyẹ dobẹ asha ni eyẹ la kwhese eyẹ khi eyẹ gbudu ẹẹ li khi, “Ishinẹgba khi ọkpaghyiẹ mhẹ; ulishi o vha laa nwu mhẹ. Elọ ọgbọ dobẹ laa li mhẹ?”
7
Pfi ẹgbue shi eni e rhi odẹ a khasẹ vhẹ vhi egbe, eni e ngme ingmemhi Ishinẹgba a khasẹ vhẹ, vha bino emeni ea khyiẹlẹ; khi vha kee kholia wẹ mhọli irhọshiọ abhi e li e mhuẹ.
8
Abhi Ijesu kiristi ọ li oodẹ, iyọ li amo, ali ẹlẹnagbọagbọ.
9
Imhẹ vha dobẹ ewẹna egbọ ọdọdọda lieliẹ vhẹ odẹ ni vha rhọ te le, rharhi khi o ti khi a rhi izemhi Ishinẹgba kpholo ikpakomhi vhẹ shele, a khi ishi emenale ni e vha kpaghyiẹ eni e rhẹ wẹ nyele.
10
Eyẹ mhọli ọta ni eni e la vhọ a ga ugamhi e vhaa kha la vhọ le emenale.
11
khi ọlia elamhi ni a rhọ lasẹ obo shi ingmobe, ọni ọ kpeda ugamhi li ọọ tsua wẹ lo elemhi asha ni o pfuasẹ nẹẹ, ijegbe wẹ a ke tosẹ wẹa vhi elase oni ogba.
12
Ijesu elase ẹvhue li ọ li la mẹ ẹchọ, khi ọ kẹ rhi eni iọgbọ Ishinẹgba pfuasẹ te ikpa ọlia ọli.
13
Vha dobẹ eyẹ je elase oni ogba bhuli ọ, eyẹ rhi egbe myie omama ọli.
14
Rharhi khi eyẹ vha mhọli ẹvhue ni agbọagbọ shi ana. Onochi eyẹ nono ẹvhue ni ọa bhẹ.
15
Te ikpa Ijesu li eyẹ tee rhi ilasobo ichichi a ghyi Ishinẹgba utotona, ichichi ni o kyili ukpamhi orhẹ ifufu abọ inu eyẹ, eyẹ ni eyẹ yẹsẹ eva ọli.
16
Abagwhoyọ imhẹ vha yelea khi vha rhọ kee khyiẹli onaghyie vha kee kpaghyiẹ egbe, rharhi khi ilasobo eyọyọ li ee rhi egbe a nwu Ishinẹgba.
17
Vha suesọ ni eni e kpeda na vhẹ, rharhi khi wẹwẹ li e rhi ẹloli a kwhu ayẹmhẹ vhẹ, wẹwẹ li e gwe laa ngme khasẹ Ishinẹgba abhi e li rhẹ vhẹ kyia. Vha suọ esọ ni eni e kpeda na vhẹ khi e kẹ rhi oghẹlẹ rhi ẹloe kee kwhu vhẹ, ofu o ke fu wẹ, rharhi khi e kha liyọ o vha laa kpaghyiẹ vhẹ obọ.
18
Vha pfi olema kee ni eyẹ, rharhi khi eyẹ lama shi vhọ khi idu ni e pfuasẹ li eyẹ rhọ rhaa khẹ vhẹ, ali nyele inyele ekpẹ odẹ khi odẹ kwu rhọ khẹ vhẹ.
19
Mhi gwe rhi ona zezẹ vhẹvhẹ kwu idu khi vha kee lina, khi mhi kẹ gwe dobẹ rhamhi vhẹ vhi egbe ufuọna.
20
Nenaa Ishinẹgba ọpfọmhẹ, ni ọ nwu ọrhisumhale nọfu te egwhi vule, ni ọ kyili Ọnọmhuẹyẹ Ijesu, rhọ te ikpa ọlia alamanegbe ni ẹlẹnagbọagbọ,
21
Ọ kwu itsua shi vhẹ vhi egbe khi vha rhọ kee dobẹ khyiẹlẹ emeni e ghọli ọli, emeni e ghọli ọli o la vhẹ vhi egbe a kee gbe ikanya, te ikpa Ijesu Ikiristi, ni ọ mhọli ikiki ẹlẹnagbọagbọ Itsẹ.
22
Nenaa mhi zeze vhẹ idu, inyọgwho mhẹ, khi vha rhi egbe myie ingmemhi izezidu na mhi kẹkẹ ghyi vhẹ sui ena.
23
Vhaa yẹsẹ khi inyọgwho eyẹ Itimoti a she wolọ ọli abọa, ọ kha kẹ bhẹ nenaa mhi laa ghyie ọli bhui vhẹ.
24
Vha gaa tsẹ eni e kpeda kwu ali eni e myiesuọ kwu. Eni e te itili bhẹ ea tsẹ vhẹvhẹ kwu.
25
Ivhẹlemhi o nu vhẹvhẹ kwu la.