1
Nenaa irhọshiọ khi irhegbenya ẹtsẹkẹ ni u waa mẹ nee ni u lama khi ọa bhẹ.
2
Ona li o rhi irhọshiọ ni ititita eyẹ e mhuẹ khasẹ.
3
Ona li eyẹ rhọ yẹsẹ khi ingmemhi unu li Ishinẹgba o rhọ ma agbọ kwu, khi emeni a vha mẹ ẹloe laa rhọ ma emeni a mẹ ẹloe ena.
4
Irhọshiọ li Ebeni ọ rhọ khyiẹli ilasobo ni o tẹ ghyi Ishinẹgba ni o dala uwi Ikeni. Ona li o rha chichi ọli khi ọ gwagha gbe. Ishinẹgba ọ chichi ọli shi isomhopfa ni ọ rhọ bhẹ. Rharhi ona, Ebẹni ọọ khyiele ngme ni ọ rhẹrhẹ gwhu.
5
Irhọshiọ li o rha rhue Enọki shele je idane ni ọ vha rhọ mẹ egwhi, “A vha gwe mẹ oli, rharhi Ishinẹgba ọ rhue ọ” Rharhi khi a ngme khi li ọ rhi egbe nwu Ishinẹgba ni ọ rhue ọli vu je idane.
6
Ina khi irhọshiọ a vha mẹ ọni ọ dobẹ a rhi egbe nwu Ishinẹgba, rharhi khi ọni ọ bhẹ bhuli Ishinẹgba le ọ nwemaa rha shi vhọ khi ọ nyele ọ rhi elele laa ni eni e nono ọli.
7
Irhọshiọ li Inowa, ni Ishinẹgba ọ chi esọ obodẹ emeni ọa mẹ nee, ọ rhi eghọghọ ni Ishinẹgba ọ tọ ọkọ khi o tsumhi udogbapfẹ lẹ. Abhi ọ ke rhọ khyiẹli ona, Ishinẹgba ọ pfuse agbọa ọ ke bhale a kyili ọni ọ le ukwu igwabhagbe te ikpa irhọshiọ.
8
Irhọshiọ li Ebulahamu, ni Ishinẹgba ọ rhọ nyalu ọ, ọọ rhọ shi ọli vhọ, ọ je obhoni ọ je lẹẹ le ukwu. ọ vu ama ọ vha yẹsẹ obhoni ọ je vhọ.
9
Irhọshiọ li ọ rhi ọli nyele aloekẹ ni a shi obọ nali abhi ọlele. Ọọ nu Aziki ali Ijekọpu nyele iku, ni a gaa shi oni obọ na.
10
Rharhi khi rhẹmhi ọ fẹli odalo obodẹ ẹvholi ogbọ ni ọ lẹẹ tuekẹle ni o kyia khi Ishinẹgba li ọ lẹẹ mali.
11
Irhọshiọ li Ebulahamu ali Isera, e rhọ mhọlli izemhi ni Isera ọ rhọ ẹẹ mẹ ni e rhẹrhẹ kyili ikyiọjọ, rharhi khi e lama khi Ishinẹgba ọ vhaa ghagha, lẹ li ọ shi obọ ọmọ na wẹ.
12
Abagwhoyọ, ọni ọmọse ona lọgwho ni egwhuli o she chi mama e vyialọ ẹdẹ ni a vha dobẹ ẹẹ lolo. Ee bhale a bu abhi itata ni e la idane ali ekhashẹ ni a vha dobẹ ẹẹ lolo ni e la esọ okẹ.
13
Ena kwu li e gaa gwhuloa neni eni ishobọ e bhẹ. Ama, e le kpẹsẹ abọ myie wẹ rharhi khi e te odonuẹ bhale, ee lama khi elele wẹwẹ kyia shi oni agbona.
14
Rharhi eni e ngme ingme oyọyọ alo e ga vhọ khi ẹvhue obọ wẹ ni e nyele li ee nono.
15
Egbegbe ingme o kha kyila khi e sa isamhi ẹvhue ni e kpọ te vu lọ, e kha gwe mhuẹ imasha liegbe je.
16
Ama abhi o li la, ẹvhue ovhese ni o ti dala oyọ o ghọli wẹ nẹẹ, uwi aleghyie mhi ngme eyọ. Iyọ omama o vha nwu Ishinẹgba khi a rhọ lu ọli Ishinẹgba wẹ abhi ọ ke rhọ kyia khi ọ she tọ ẹvhue na wẹ.
17
Irhọshiọ li Ebulahamu, abhi a rhọ nwu ọli fẹẹ, khi ọ rhi Aziki lasẹ obo. Egbe e nwu ọ khi lẹ myie ishobọ ni a rhọ rhi omyi ọli ni ọ lee vyia lasẹ obo ,
18
Ishinẹgba ọọ khi, “ “Ikpa Aziki li a te laa ke nyalu ẹdẹli ẹ.”
19
Ebulahamu ọọ lama shi vhọ khi Ishinẹgba ọ lẹẹ dobẹ nwu Aziki te egwhi vule, a ngme ingmaghyie, ọọ gwe mẹ ọli rhue ọ vha gwhua.
20
Irhọshiọ li Aziki ọ rhọ kwu itsẹ ni Ijekọpu ali Esọ obodẹ emeni ee bhale.
21
Abhi Ijekọpu ọ rhọ lẹẹ gwhu, irhọshiọ li ọ rhọ kwu itsẹ ni imyi Ijosẹfu ni emọse. Ijekọpu ọọ gbe ga, ọ nya egbea shi orhẹ ni ọ rhẹ to ekẹ.
22
Abhi Ijosẹfu ọ rhẹ lẹẹ gwhua, irhọshiọ li ọ rhọ ngme ingmemhi ite Ijipiti vu khi e wolọ igwa lẹ mhọ obọ vu ni e ke a vu.
23
Irhọshiọ li a rhọ vyia Imozisi, irhọshiọ li ita ọli ali inyọ ọli e rhọ rhue ọli gbhagbha rharhi khi ọ kyili ọmọfẹ ni ọ somhote, ulishi ushi ni oghyie ọ shi o vha nwu wẹ.
24
Abhi Imozisi ọ rhọ fuu shi vhọ, irhọshiọ li ọ vha rhọ lama khi a lu lẹẹ omyiomyi Ifero ni ọkpotso.
25
Li ọ rhọ lama nu iọgbọ Ishinẹgba ẹẹ mẹ ẹchọ, o ti ni ọ kha rhẹẹ le ọvyiọlọ ingmobe ukwukwu ẹrhẹghẹ.
26
Ọọ lama khi omama ni o la irhọ khali Ikiristi khi elele ni o la vhọ li o fu dala ọsuemhẹ ni o la Ijipiti, rharhi khi elele ni e la odalo li ọ salo gwhe.
27
Irhọshiọ li o rhi Imozisi te Ijipiti vu. Ulishi ofu ọni oghyie o vha nwu ọli, ọọ lama rhi egbe myie abhi ọ lii bino ọni a vha ẹẹ mẹ ẹloe.
28
Irhọshiọ li oo rhi ọli khyiẹlẹ oni idọsẹalẹ ali ipfiaka ọlia, khi ọni ọ gbolo imọjọ emọse khi ọọ ke rhi obọ chi imọjọ emọse Izulẹ.
29
Irhọshiọ li o rhẹ wẹ te okẹ nofu dọsẹ a lẹ abhi ekẹ apfuẹ. abhi Ijipiti e ke rhọ li lẹẹ liyọ okẹ o tono wẹ luọluọ.
30
Irhọshiọ li o pfi ochika Ijericho gbe, abhi e rhọ kyia gasẹ ọli ẹlishila.
31
Irhọshiọ li o vha rhi Irehabu ni aghaba nu eni e vha ẹẹ suọ esọ pfua, rharhi khi ọ rhi eni a ghyie gbhagbha.
32
Elọ mhi ke gwe a ngme nena? Imha laa mhọli ẹrhẹghẹ na mhi kha rhọ ngme ingmemhi Igidiọni nena, Ibaraki, Ijẹfitani, Idevidi, Isamuẹli ali ebolẹ ni e kpọẹ,
33
Ni e rhi irhọshiọ nwu eghyiele le, e gbe ikanya ni e pfuasẹ, e chigbe myiono ishobọ. E zuse idu inu,
34
E pfuse izemhi erhẹa, e na pfue ifẹdo, e na pfue umhaze, e bhale a kyili ikpokpomhi ekhọkwhẹ, e kwhu ichoja elele kwa.
35
Ikpotso e gwe myie iọgbọ wẹ ni e te egwhuli vule. A rhi ẹchọ ni egwho, e vha lama ẹẹ wolọ wẹ abọa khi wẹwẹ e kẹ mẹ itiegwhivule ni o ti nẹẹ.
36
A rhi egwho lii egyia, a rhi itele gbe egwho, a sọ egwho igha, a nwuno egwho shi ogba igwhumha.
37
A tono wẹ eche. Aa pfanọ wẹ eveveva. a rhi ifẹdo gbolo egwhoa. E sọnọ ekwẹ elamhi ali isumha ẹẹ ghogho rharhi umhamhuẹ, a rhi osue na wẹ,
38
Oni agbona o vha sheshe wẹ egbe, e ghogho kyia vhi elemhi apata, ikhomhi ekpha, elemhi irhui, ali elimhi ni e la elemhi ekẹ.
39
Ishinẹgba ọọ to ekhẹ ni eni iọgbọ ena rharhi irhọshiọ ni e mhuẹ, e vha dobẹ myie emeni ọ shi obọ.
40
Ishinẹgba ọọ rhi ẹtsẹkẹ ni e ti nẹẹ shi ekẹ ni eyẹ, khi ina khi rharhi eyẹ lọ egbe e vha kha gba na wẹ.