¹ Rharhi ushi rhẹmhi o kyili arhọrhọ ẹtsẹkẹ aghyie ni ọa bhẹ, a khi wẹwẹ khi egbegbe ọ. Ushi o vha dobẹ rhi egbe gba ni eni e chi mama Ishinẹgba rhọ te ikpa ilasobo ni eni e kpeda ugamhi e lasẹ ukpe khi ukpe eyọ. ² O kha kyia khi eni ilasobo khi e rhẹ wẹ kwhẹ pfuasẹ lọ, ingmobe o vha gwe la wẹ egbe gwhe, ilasobo e kha kpẹsẹ ayọ. ³ Ama eni ilasobo eyọ a khyie sa lẹẹ to vhọ ukpe khi ukpe. ⁴ Rharhi khi ọlia ena ali ọlia elamhi o vha dobẹ a rhue ọgbọ ingmobe egbea. ⁵ Abhi Ikiristi ọ rhọ bhẹ vhi ekagbọ ọọ li, “Vhavha gwe nono ilasobo, Onochi, vha nwuno egbe vhẹ egbe na mhẹ. ⁶ Shi Ilasobo itosea ọa liyọ ilasobo shi ingmobe e vha rhi egbe a nwu ẹ. ⁷ Mhi ke rhẹ li, “Ghee, mhi la ana khi mhi khyiẹlẹ abhi o gholi ẹ, Ishinẹgba, abhi a li kẹkẹ shi oni Ibabo.” ⁸ Ọ gwe ngme abhi a li kẹkẹ ọli shi Ibabo: “U waa nono ilasobo, wẹ khi ilasobo itosea shi ingmobe, wẹ khi rhẹmhi e rhi egbe a nwu ẹ”—ilasobo ni a lasẹ abhi ushi o ngme. ⁹ Ọọ ke ẹẹ li, “Ghee, mhi la ana khi mhi khyiẹlẹ abhi o ghọli ẹ.” Ọọ rhi oni ikyiatsolo ligyhi khi lẹ kẹ dobẹ rhi oni ozeva ligyhi. ¹⁰ Ọni ozeva a she rhi eyẹ mhọli Ishinẹgba obọ te ikpa ilasobo ni a rhi Ijesu Ikiristi lasẹ ni eyẹ utogwho ali agbọagbọ. ¹¹ Ingmaghyie lọ, eni e kpeda ughamhi kwu wẹwẹ lee lasobo ogbẹlẹ kwu, abagwho li a lii lasẹ wẹ, ni o kyia khi ababhi o rhẹ li o vha rhue ọgbọ ingmobe egbea. ¹² Ama abhi Ikiristi ọ ke rhọ lasobo shi ingmobe utogwho ẹlẹnagbọagbọ, ọ shitọ obọ obita Ishinẹgba. ¹³ Ọ mugha a khẹ ẹrhẹghẹ ni ẹbele ọli ọ rhọ laa kpọkẹ ni ẹkọawẹ ọli. ¹⁴ Rharhi ilasobo ogwho ọ she rhi egbe gba ni eni a rhọ mhọli Ishinẹgba obọ ẹlẹnagbọagbọ. ¹⁵ Ayẹmhẹ ni o Pfuasẹ o gwe myie ọtsẹ ni eyẹ, oni ikyiasolo ọọ li, ¹⁶ “Ona lẹ khi alamanegbe na mhi laa nu wẹ mhuẹ eni egbẹlẹ eyọ,’Ọnọmhọli lọ ngme yọ: ‘mhi laa rhi ishi mhẹ shi wẹ vhi ukpakomhi, mhi gwe kẹkẹ wẹ shi wẹ vhi idu.” ¹⁷ Ishinẹgba Ọọ ngme, ''Imha gwe la sato ingmobe wẹ gwhe.'' ¹⁸ Asha ni igbe ingmobe kwa na o la, a gwe mhọli ilasobo ni a gwe a lasẹ. ¹⁹ Iyọ, inyọgwho mhẹ, eyẹ ke a mhọli udu khi eyẹ rhọ rhi ọlia Ijesu lo elemhi asha ni o Pfuasẹ nẹẹ. ²⁰ Ona lẹ khi odẹ ni ọ she gweghyiea ni eyẹ rhọ te ikpa ijegbe ọ, odẹ onogbọ ali odẹ ni o nyele rhọ te ikpa ode ni a rhọ ta. ²¹ Abagwhoyọ eyẹ mhọli ọni ọ kpeda ugamhi nọfu vhi apfẹ Ishinẹgba, ²² Eyẹ rhi idu aghyie chi mama li elemhi irhọshiọ, ishọyọ a kpe eyẹ idua pfuasẹ vhi onobe le a rhi amẹ ni e pfuasẹ kpe eyẹ ijegbea. ²³ Eyẹ nwu emeni eyẹ lama shi ni eyẹ rhi ẹloe kpẹ shi ze, eye vha dabi, rharhi Ishinẹgba ni ọ shi obọ ọ vhaa ghagha. ²⁴ Eyẹ kee dua abhi eyẹ kee li rhi ikanya ighọli ali enaghyie ghọli egbe. ²⁵ Imhẹli eyẹ rhi ẹloe gbe ikokogba eni e myiesuọ, abhi egwho e ke li. Onochi, eyẹ kee zeze egbe idu utotona, abhi oni ogbẹlẹ o li chi a bhẹ ena. ²⁶ Rharhi khi eyẹ kha famhi kyhiẹlẹ ingmobe eyẹ ni eyẹ she ke kpọ yẹsẹ oni ingmaghyie, a vha gwe mẹ ilasobo ovhese ni a lasẹ a shi ingmobẹ. ²⁷ Onochi, emeni a ke lee mugha khẹ lẹ khi igwuẹzọ, ali erhẹ ni e laa pfuse ẹbele Ishinẹgbaa. ²⁸ Ọni gbe ushi Imozisia rhẹmhi ẹẹ gbe ọlia a vha ẹẹ vhẹlemhi ọ ni ikwhumhava ọa liyọ ikwhumhasẹ e sheda myie ọtsẹ shi vhọ. ²⁹ See o ke wẹ laa li ọgbọ ni ọ rhi awẹ nwuno Omyi Ishinẹgba, ọgbọ ni ọ rhi ẹloe gbe eni ọlia alamanegbe abhi emeni e vha pfuasẹ, ọlia ni o kyia khi li o dobẹ rhẹ bhuli Ishiẹgba le—ali ọni ọ zẹnọ ẹnwuẹ ni Ayẹmhẹ ivhẹlemhi? ³⁰ Rharhi khi eyẹ yẹsẹ ọni ọ ngme yọ, “Mhẹmhẹ mhi mhọli oliẹ; “ Abagwhoyọ, “Ọnọmhọli ọ laa gwu iọgbọ ọli ẹzọ.” ³¹ okhẹna li o kyia khi ọgbọ ọ rhọ delo ẹkoabọ Ishinẹgba ni ọ nyele! ³² Ama vha sato egbẹlẹ ni e dọsẹ, ẹrhẹghẹ ni alo vhẹ e rhọ gwheghyiea ni vha rhọ mẹ ufulọ--abhi vha li rhi egbe myie ukpokpomhi osue. ³³ Abhi a li yẹghẹ vhẹa ni a li zẹnọ ẹnwuẹ na vhẹ ni a li zẹ okwhẹ kpẹsẹ vhẹ, vha gwe li mhọli obọ shi eni e mẹ ẹchọ oyọyọ. ³⁴ Idu eni ẹ la ogba igwhuma e kẹkẹ vhẹa, ni a rhẹrhẹ myieno vhẹ emeni vha mhuẹ, vha rhi oghẹlẹ nyele ³⁵ imhẹ vha rhi irhegbenya vhẹ pfia, ni o kyia khi o mhọli elele nofu. ³⁶ Irhobọnwidu o to vhẹ, khi vha kẹ dobẹ myie emeni Ishinẹgba o shi obọ ẹẹ na vhẹ, ni vhaa sheda khyiẹlẹ abhi o ghọli ọli. ³⁷ O kha li zẹlẹ, ọni ọa bhẹ ọ kẹlẹ laa bhẹ ọ vha laa tẹsẹ neni ọ bhẹ. ³⁸ Ọni ọ pfuasẹ ọ laa rhi irhọshiọ nyele, ama ọ kha liegbe oshimhi , egbe ọli o vha laa nwu mhẹ.'' ³⁹ Ama eyẹ vha kyili eni ea liegbe oshimhi je epfua. Ama eni e mhọli irhọshiọ ni o rhi ẹloli a kwhu ayẹmhẹ eyẹ.