¹ Kwari umuntu umo mu kyaro kya Usi ishina ryakwe ryari ni Yobo; na Yobo ari uwabura akarema kabiri umororoke, umo uwaretina Resa kabiri afumine ku bubifi. ² Afyere abana baume kine rubari na bana banakshi batatu. ³ Akwete impanga amakana kine rubari, ingamira amakana yatatu, ing'ombe imyanda isano, ne mpunda imyanda isano na babomfi abengi nganshi. Ari muntu uwakirishepo pari bonse abantu ba ku kapinda ka Kukuryo. ⁴ Kirabushiku kira mwana umwaume aperwe, arepanga umutebeto mu ng'anda yakwe. Baretuma no kwita inkashi shabo shitatu ku kurya no kunwa nabo. ⁵ Iryo inshiku shamitebeto shapwa, Yobo arebeta no kubasangurura. Areima mu rukyero kyero no kupera ifya bupe fyaokyewa ifya kira mwana wakwe, pantu aresosa ati, ''Kuti kyaba ukutira abana nababembuka na batipa Resa mu mitima yabo.'' Yobo arekita iki ryonse. ⁶ Eikyo kari kasuba iryo abana baume bakwa Resa baishire mukuitura pa kinso kyakwa Yahwe. Satana nankwe aishire nabo. ⁷ Yahwe asosere kuri Satana ati, ''Nikwisa wafuma?'' Eryo Satana ayasukire Yahwe no kusosa ati, ''Nafuma mukururumba pa kyaro, na bwerera uku kabiri naya noku.'' ⁸ Yahwe asosere kuri Satana ati, ''Naubona umubomfi wangi Yobo? Pantu tapaba nangu umo uwapara ena pa kyaro, uutatungwa akabi kabiri umuntu umororoke, umo uutina Resa no kutaruka ukufuma ku bubifi.'' ⁹ Eryo Satana ayasukire Yahwe no kusosa ati, ''Bushe Yobo atina Resa apabura umurandu? ¹⁰ Bushe tamwabika umupaka uwamushinguruka, uwashinguruka ing'anda yakwe, no kushinguruka fyonse ifyakwe ukufuma ku mbali shonse? Mwaripala ifikitwa fya maboko yakwe, ne fitekwa fyakwe fyasarangana impanga yonse. ¹¹ Rero nomba fungurureni ukuboko kwenu no kwikata fyonse ifyo akwata, eryo mubone nga tamupontere ku kinso kyenu.'' ¹² Yahwe asosere kuri Satana ati, ''Bona, fyonse ifyo akwata firi mu maboko yobe. Ukufumishakofye umwine ena witambikapo ukuboko kobe.'' Eryo Satana aire ukufuma pa kinso kyakwa Yahwe. ¹³ Kyaishireba ati ubushiku bumo, abana bakwe baume na banakashi barerya no kunwa umwangashi mu ng'anda ya mukaramba wabo. ¹⁴ Intumi yaishire kuri Yobo kabiri asosere ati, ''Ing'ombe shakirarima ne mpunda shakirarya pa mbari. ¹⁵ Eryo ama Sabini yakiponenapo no kushisenda. Ababomfi bena, nababepeya ku rupanga. Nebofye neka mfyukire ku kumyeba.'' ¹⁶ Eryo akiri areranda, umbi nankwe aishire kabiri asosere ati, ''Umuriro wakwa Resa wa kipona ukufuma mu myuru no kokya impanga na babomfi. Nebofye neka mfyukire ku kumyeba.'' ¹⁷ Eryo akiri areranda, umbi nankwe aishire kabiri asosere ati, ''Ama Karudi ya kipanga amabumba yatatu, no kwikata ingamira, no kushisenda. Na babomfi bena, nababepaya ku rupanga. Nebofye neka mfyukire ku kumyeba.'' ¹⁸ Eryo akiri areranda, umbi nankwe aishire kabiri asosere ati, ''Abana baume benu na bana banakashi benu bakirarya no kunwa umwangashi mu ng'anda ya mukaramba wabo. ¹⁹ Ikimwera kya maka kyakisa ukufuma mu matororo no kuma kufifutu fya ng'anda fine. Kyakiponena abarumendo, nabo na bafwa. Nebofye neka mfyukire ku kumyeba.'' ²⁰ Eryo Yobo aimine, no kurepura iraya ryakwe, apukwimye umutwe wakwe, aroseshe ikinso kyakwe panshi, kabiri ashinshimwine Resa. ²¹ Asosere ati, ''Nari ubwamba iryo nafumine munda yakwa mayo kabiri nkaba ubwamba iryo nkabwekeramo kurya. Ni Yahwe e wampere, ni Yahwe e wasenda. Ribe iryaparwa ishina ryakwa Yahwe.'' ²² Muri ifi fyonse, Yobo tabembukire iyo, nangu ukutungunya Resa ukukita ikyarubana.