¹ Hanu waheya ne hapongire pofotji yira munu yofotji padyango dyoshenene paghutho dhoDikorogho dyoMeyu; Noha tongwere Ezra ghomukamarukwaro gharete mbapira dhoMuragho waMosesi, edhi gharawere Fumu Nyambi ha-Esreali. ² Ezra ne ghakaretire muragho kumbunga dhawa tutughuru nohambuyama nawa heya hokukona kuyuva nokutjwathana nodiyuwa di ne dyokutanga mukaghonda koghukwoko nokoghuwadi. ³ Popo ne ghatoyire kughutho ghombunga padyango dyoshenene pepi noDikorogho dyoMeyu kutunderera mathiku-thiku kate mitaha. Ghatoyire paghutho dhawa tutughuru, hambuyama nohanu waheya hokukona kuyuva nokutjwathana awa hakarire eshi kuthotera yo muMbapira dhoMuragho. ⁴ Ezra ghomukamarukwaro ne ghemanenine pathinyaku thokutenditha kuyitondo, ethi hatendere kuthitambo thothi. Kurudyo rwendi ne hemanineko haMattithiah, Shema, Anaih, Urijah, Hilkiah naMaaseiah nokurumoho rwendi ne Pedaiah, Mishael, Malchijah, Hashum, Hashbadana, Zechariah naMeshullam. ⁵ Ezra ne ghafikure mbapira paghutho dhohanu waheya, yoyishi ye ne ghemanine pawiru kughutho dhohanu; no apa ghafikurire mbapira dhi ne hanu waheya ne hemanine. ⁶ Ezra ne ghafiyere Fumu Nyambi, Nyambi Shokuru. Nohanu waheya ne hahuthire eshi; "Yikare kemo, Yikare kemo!" Oku hana yeyura moko ghagho muwiru noha kuvamine hakughe Fumu Nyambi oku hana nyongeka mitwi dhagho mumuve. ⁷ Shime wano haJeshua, Bani, Sherebiah, Jamin, Akkub, Shabbethai, Hodijiah, Maaeseiah, Kelita, Azariah, Jozabad, Hanan, Pelaiah noha Levite ne haghamwene hanu hatjwathane muragho nohanu ne hemanine mumango ghagho. ⁸ Hatoyire ghupathurura muragho waNyambi; hatapire matjwathanithero haghamwene hanu hatjwathane yitoya. ⁹ Nehemiah oyu ghakarire eshi nguvuru, Ezra gho mupristeri nomuka marukwaro noha Levite awa hahongire hanu ne haghambire kohanu waheya eshi; "Edi diyuwa ne dyapongoka kwaFumu ghoNyambi wetu; mbadi mwakona kudira, yoyishi hanu waheya ne hadirire apa hayuvire muragho waNyambi. ¹⁰ Ndani pogha watongwere ngeno; "Muyende nomukadye yomaghadhi, mukanwe yoyitowi no mukatumene ko awa yina piri; Diyuwa di ne dyapongoka kwaHekudyetu. mbadi mutokote, yishamberera yaFumu Nyambi ne matanarithero ghetu. ¹¹ Ha Levite ne haporerithire hanu ghuninga eshi; "Shime, diywa ne dyapongoka; mbadi mwakona kutokota." ¹² Nohanu waheya ne hayendire hakadye nokunwa, kutumenako hamweya nokudjabwana, pamurandu eshi hatjwathanine muragho edhi hawa toyere. ¹³ Mudiyuwa dyoghuwadi, manduraghumbo ghomadhiko ghomaheya nawa Pristeri nawa Levite ne hapongire pofotji kwa-Ezra gho mukamarukwaro podiyo eshi hatjwathane yitjanga yomuragho. ¹⁴ Noha wanine yapwa kutjanga mumuragho, eyi Fumu Nyambi gharawere Mosesi eshi, hanu wa-Esreali ne ghakona kukara muyishashara pathirika thokushamberera kaghonda koghukwoko-nokoghuwadi. ¹⁵ Noha kona kuyiyuvitha ghuyi tanaritha muyitata yoyiheya nomu Jerusalem ghuninga eshi; "Muyende kumarundu, nomukarete mite dhoyitondo yo-Oliva, mite dhoyitondo yomaghadhi, mite dhoyitondo yimweya, mite dhoMakindhu nomite dhoyitondo yomahako mukuna tenda yishashara thika dyodi hayitjanga." ¹⁶ Nohanu ne hayendire noha karetire mite nohana tendire yishashara yagho, kehe yuno ghatendere pawiru dhondhugho dhendi, hamweya ne mumarapa ghagho, hamweya ne mudirapa dyoNdhugho dhaNyambi, hamweya ne padyango dyoshenene pepi noDikorogho dyoMeyu nohamweya ne padyango dyoshenene pepi noDikorogho dya-Ephraim. ¹⁷ Mbunga dhodhiheya edhi dhaka shwayire kughupika ne hatendire yishashara noha hungumanine mo; Kutunderera mumayuwa ghaJoshua ghomwana Nun kate mudiyuwa di, haka Esreali ne mbadi hatenda kemo, yodiyo ne hashamberere thikuma. ¹⁸ Kehe diyuwa kate diyuwa dyoghuhura, ghatoyire kutunderera mumbapira dhoMuragho waNyambi noha karire nothirika thi ghure ghomayuwa kwoko-nomawadi; Nomudiyuwa dyoghukwoko-nodyo ghuhatu ne mapongero ghofumwa, kukutha kumarawero.