¹ Ene yahokokire apa Sanballat ghayuvire eshi atwe ne kuna kutendurura ditete ne ghapatire thikuma nogha tangire kusherera ha-Juda. ² Aye ghaghambire kwawa yendhendi nokwawa mashurundate gha-Samaria nokughamba eshi; "Yinu munye hana kutenda wa ha-Juda hokukasha?" Awo mbohana huthedherapo thitata thagho ndi? Ghomboha tupure muyambo ndi? Mbohana mana yiruwana yi mudiyuwa dyofotji ndi? Mbohana pindutha mawe kutunderera pamayara apa ghawera ndi? ³ Pano keho yu Tobiah ghomu Ammonite ne pambadi dhendi nogha ghaghambire eshi; "Kehe yi hana kutenda, ngambi dishangashanga dina dhini po kukona yirundumune ditete dyomawe!" ⁴ Tuyuverere We Nyambi wetu, yoyishi atwe ne hana tunyatha; huthe honyi pamitwi dhagho nowape mahanyaghukero mudyango dyoghupika. ⁵ Mbadi ghundeke maharwero ghawo nombadi Ghutawedhere maharwero ghawo eshi ghadhongonoke paghutho dhoye; Yoyishi hanu wa ne Yowe hana shedhaghuranga paghutho dhawa tendi. ⁶ Yodiyo ne twatendire ditete noditete dyodiheya ne twadigumekerire dihenda munaghure, yoyishi hanu hakarire nomaghano ghokuruwana. ⁷ Apa hayuvire wa-Sanballat ghomu Arabian, Tobiah ghomu Ammonite na-Ashdodite eshi ditete dya-Jerusalem ne dina pu kuhuthedherapo, nomuporongwa ghodiyo hana kuvukadheka ne hapatire thikuma. ⁸ Waheya hakuyuvathanine mukuhomokera Jerusalem nokureta didhongera. ⁹ Ngambi kemo, atwe ne twarapererire kwaNyambi wetu nopamurandu wagho, twakarire tuna rawa mutenya noghuthiku. ¹⁰ Juda ghogha ghambire eshi; "Mangcamu ghawaruwani ne kuna kutepuka notudi noyitjoro yishawini eyi shoyi tushweneke kutenda ditete. ¹¹ Nawa nyathi wetu ne ha ghamba eshi mbadi shoha dimuke endi kumona keheyi kate twakuyende mukatji kagho nokuwa pagha nokushayekitha yiruwana." ¹² Paruvedhe roro, ha-Juda awa hatungire pepi nawa nyathi wetu ne heyire nohana tutongwere yikandho dikumi, kutunyangadhekera eshi, kehe dyango shomuhukere, awo mbohana twimanganyena. ¹³ Yodiyo, naturire hatutughuru munyima dhokumango ghopamuveve ghoditete, padyango dyoshenene nonawa turire kukutha kumadhiko ghagho noyimende yagho, nomaghonga ndani nomandamba ghagho. ¹⁴ Nona kamburire meho ghange nokwimana nona ghambire kwawa mayami, hapiterithi nawanu waheya eshi; "Mwawa yapa. Muvuruke Hekudyetu, Shokuru noNgcamu nomurwerepo hapikenu, hanenu hotutughuru, noho hambuyama, madhiko ghenu nomandhugho ghenu." ¹⁵ Yahokokire paruvedhe oku hanyathi wetu ne hana tjwathanine eshi dighano dyagho ne twadidimuka naNyambi ne ghana tura makurando ghagho muhonyi, yodiyo twaheya twahukire kuditete nokehe yu kuyiruwana yendi. ¹⁶ Kutundererera ruvedhe ro, dihenda dyawa pikange ne haruwanine kumatendwerero nodihenda dimweya ne hakwaterere maghonga, yingandekitha, mandamba nohamweya ne hashupatire yishupata yokungandekitha nawa piterithi hemanine munyima dhondhugho dha-Juda. ¹⁷ Awa hatendire ditete nawa hakwaterere yirwitha, hakurongerere podiyo eshi nyara dhimweya ne kuyiruwana yokutenda ditete nonyara dhimweya ne kukwaterera thirwitha. ¹⁸ Kehe muruwani ne ghakarire nothimende thendi pambadi apa ghana kuruwana namuka kushiya mapori ne pambadi dhange. ¹⁹ Ndani ghona ghambire kwawa mayami, haraghuri nohanu waheya eshi; "Yiruwana ne yikuru noyanyanda mawedherero ene atwe ne tuna kuyakunuka thikuma paditete. ²⁰ Ngeshi muna yuvu mughuma ghoTorombita ne, mukughongawedhe, Nyambi wetu ne ghana kuturwerapo." ²¹ Yodiyo ne twaruwanine, nodihenda dyawa tutughuru ne hakwaterere maghonga kutunderera mathiku-thiku kate runguro. ²² Paruvedhe rofotji ne naghambire karo kohanu eshi; "Kehe katughuru namupikendi ne hakare ghuthiku muJerusalem, podiyo hakare hakungi ghuthiku nomutenya ne haruwani. ²³ Yodiyo, yikare eshi yame, haminange endi hapikange endi hatutughuru hohakungi awa hani kuthire, noyofotji temba ghashupure yitere yendi, shimengwa kuna kayiyogha