¹ Pano keho awa haturire thingangera patjangwa ne Nehemiah ghoNguvuru, ghomwana Hacaliah naZedekiah, ² Seraiah, Azariah, Jeremiah, ³ Pashhur, Amariah, Malchijiah. ⁴ Hattush, Shebaniah, Malluch, ⁵ Harim, Meremoth, Obadiah, ⁶ Daniel, Ginnethon, Baruch, ⁷ Meshullam, Abijah, Mijamin, ⁸ Maaziah, Bilgai naShemaiah, awa ne hoha pristeri. ⁹ Ha Levite ne Jeshua ghomwana Azariah, Binnui ghomwana Henadad naKadmiel. ¹⁰ Hayendhagho ne: Shebaniah, Hodijah, Kelita, Pelaiah, Hanan. ¹¹ Micha, Rehob, Hashabiah. ¹² Zaccur, Sherebiah, Shebaniah, ¹³ Hodijah, Bani, naBeninu. ¹⁴ Hapiterithi wawanu ne ha: Parosh, Pahath-Moab, Elam, Zattu, Bani. ¹⁵ Bunni, Azgad, Bebai, ¹⁶ Adonijah, Bigvai, Adin, ¹⁷ Ater, Hezekiah, Azzur, ¹⁸ Hodijah, Hashum, Bezai, ¹⁹ Hariph, Anathoth, Nebai, ²⁰ Magpiash, Meshullam, Hezir, ²¹ Meshezabel, Zadok, Jaddua, ²² Pelatiah, Hanan, Anaiah, ²³ Hoshea, Hananiah, Hasshub, ²⁴ Hallohesh, Pilha, Shobek, ²⁵ Rehum, Hashabnah, Maaseiah, ²⁶ Ahijah, Hanan, Anan, ²⁷ Malluch, Harim, naBaanah. ²⁸ Pano keho hanu waheya yira, haPristeri, haLevite, hakungi makorogho, hembithi, haruwani mungirishe nohanu waheya ne hayakunukire kowa hatunga muditunga di pamurandu ghoMuragho waNyambi, nawa mbuyama wawo, hanagho hotutughuru, hanagho hohambuyama nakehe yu ghakarire nomanongwahu nomatjwathaneno. ²⁹ Hakupakerere pofotji nawa yendhagho, hamayami wagho nokwingena muthikuto nomedhero mukuyenda muMuragho waNyambi oghu ghatapire Mosesi mupika Nyambi eshi hakumithemo nokutenda marawero ghaFumu Nyambi, yirika Yendi nomayendithitho Ghendi. ³⁰ Mbadi twakona kutapa hanetu hoha mbuyama eshi hawayeke wano hatunga muditunga di endi hanagho hohambuyama eshi hawayeke hanetu hohatutughuru. ³¹ Ngeshi hanu wa harete kehe ghuno mughuro eshi hatughurithe mudiyuwa dyoSabbatha ne mbadi twakuyighura endi mukehe diyuwa dyokupongoka. Kehe mwaka ghokwoko-wadi ne ghakona kuturumutha mapya ghetu nokushwayithapo mikudi dhodhiheya. ³² Shime karo twakupire muragho twathinda, nokukuropera eshi kehe mwaka ne tuna kutapa masherenyi ghokukuma kumakumi mahatu kuyiruwana yondhugho dhaNyambi wetu; ³³ Ghokuruwanitha kughuroto ghomuyambo, yitapa yomuyambo ghokehepa, muyambo ghokutumekera ghokehepa gho maSabbatha, ghomukaghonda kokapya, nogho muyirika eyi yakarapo; ghomuyambo ghokupongoka, nomuyambo ghomaharwero ghoku mathiyerero ghomaharwero gha-Esreali nogho yiruwana yoyiheya yandhugho dhaNyambi. ³⁴ Twatorore pakatji kawa Pristeri, Levites nomwawanu waheya eshi ngo hapi shoha karete muyambo ghoyikunyi mundhugho dhaNyambi wetu, kukutha kumandhugho ghawa kuru wetu, muruvedhe oru haroyitha kehe mwaka mukutumekera kuthinyaka thaFumu ghoNyambi wetu thika dyodi yapwa kutjanga mumuragho. ³⁵ Notwa kuruperithire karo mukureta mukesho ghokutanga kutunda mumapya ghetu nombuyo dhokutanga kupya kuyitondo yoyiheya yetu kehe mwaka, kuyireta kundhugho dhaFumu Nyambi. ³⁶ Shime twakuruperithire mukureta hanetu hohatutughuru hombedi nomumutanga ghoyimuna yetu yombedi yoyiheya eshi tuyirete kundhugho dhaNyambi thika dyodi yapwa kutjanga mumuragho, kuyireta kwawa Pristeri awa haruwananga mundhugho dhaNyambi. ³⁷ Mbotuna reta muyambo ghomukesho ghokutanga ghomushungwa ghokutenditha ghuroto, muyambo dhetu, muyambo ghombuyo, muyambo ghovinyu ghomupya nomaghadhi, mukuna yitapa kwawa pristeri hayi ture mundhugho dhomapungwero mundhugho dhaNyambi; Nokureta thofotji kudikumi kutunderera mumapya ghetu nohana kutambura thofotji kudikumi kutunderera kwawa ndjimi homumukunda. ³⁸ Hapristeri, hana hoka wa-Aaron ne hana kukara nawa Levite pakutambura ha-Levite thofotji kudikumi noha Levite ne mbohana reta thofotji kudikumi kundhugho dhaNyambi wetu, mundhugho dhomapungwero. ³⁹ Hana hoka wa-Esreali nohana hoka wa-Levi ne mbohana reta muyambo ghoghuheke ghomuyangu, vinyu ghomupya nomaghadhi kuyireta mumapungwero omu hapungwera yiruwanitha yomuthinyaku, omu hana ruwanenanga haPristeri, hakungi makorogho nohembithi; Nombadi mbotu nyatha ndhugho dhaNyambi wetu.