¹ Pano keho ne mutegherere eyi ghana kughamba Fumu Nyambi. Mwimane nomutape yinga yenu kughutho dhomarundu; mutende kemo eshi marundu ghayuve diywi dyenu. ² Muyuve mwe mwamarundu, yikananitha yaNyambi kukwenu mwa matatekero ghongcamu dhokaye. Fumu Nyambi ne mbadi ghana kukuyuva nohanu wendi noghana theki Isreali. ³ Mwahanu wange, yinu munye namutenda? Munihuthere! ⁴ Ame ne naka mushwayithire mudyango dya Egypt nokamushwayitha mundhugho dhoghupika. Natumine Mosesi, Aaroni naMiriamu kukwenu. ⁵ Mwahanu wange, muvuruke maghano ghoghuringi-ringi ghafumu Balaki wawa Moabite no edi Balaamu ghomwana Beori ghamuhuthere apa mwayendire kutunda kuShittimu kutamba kuGilgali, kukona mudimuke ghupongoki ghoyiruwana yaNyambi. ⁶ Yinu munye shoni rete kwaFumu Nyambi, apa nina kukuvama kwaNyambi ghomuwiru? Niye kukwendi nomuyambo ghondana ghomwaka ghofotji ghokutumekera ndi? ⁷ Fumu Nyambi mboghana hafera ndjwi dhodhirume mayovi ndi endi mayovi dikumi ghomarware ghomaghandi ndi? Nitape mwanange ghombedi kudiharwero dyange endi mbuyo dhoyirama yange kudiharwero dyomudhimu wange ndi? ⁸ Aye ne ghamutongwera eshi yipi yoyihunga no eyi ghana taterera FumuNyambi kukwenu: Mutende ghuhunga, muhake ghunongo nomuyende mumakumbirupithero naNyambi wenu. ⁹ Diywi dyaNyambi ne kuna kuhanyitha mbudhi kumambara ngambi kemo eshi ghunyanyami waNyambi ne ghuna yapa mena ghenu: Mutegherere kumboro noyu ghadhitura mudyango. ¹⁰ Moghudi ghushwi mumayugho ghawayiharuri no eyi ne dishamu nomarikanyithero ghombango agha ghakara murandu. ¹¹ Nishimbe munu eshi ghapira murandu ngeshi aye ne kuna kuviha mumbango noshaka ghothiviha thombango ndi? ¹² Hatungi ne hayara noghukarakathi nohatungimo ne hangereka nomarudimi ghagho ne ghayara mbango. ¹³ Yodiyo mbona mukorwitha nokumuwitha nokumu yungurura pamurandu ghomaharwero ghenu. ¹⁴ Mbomuna di ene mbadi wakwikuta; nomikunguru dhenu ne mbodhina kara mwimi dhenu. Mbomuna pungura yinu panunda ene mbadi mbomu yikunga no eyi mbomupungura ne mbona yitapa kudimende. ¹⁵ Mbomuna kunu ene mbadi mbomuyangura; mbomuna pakera thinga thitondo tho oliva ene mbadi mbomukuwetha maghadhi ghatho. Mbomuna kama mandjembere ene mbadi mbomunwa vinyu. ¹⁶ Mwashupi kuthitjwandjo tha Omri noyiruwana yoyiheya mundhugho dhaAhab. Mwatawire mumayendithitho ghagho, yodiyo mbona muretera mashinyihero nawa hatunga mo mudishamu noku kuwanekera nodinyatho kohanu wange.