¹ Mawe kwawa kakutenda ghuyi, kowa hana kudhiropitha madidi ghagho. Awo ne kuyitenda pamathiku-thiku yoyishi hakara no ngcamu. ² Awo ne kurumbera mapya nokughashimba mungcamu nohana kurumbera mandhugho noghashimba mumukungu. Awo ne kupetha munu nodidhiko dyendi, nomunu noghupingwa wendi. ³ Yodiyo, Fumu Nyambi ne ghana kuroyithera kureta maghukukutu kodi diko kuyinu eyi mwakupira kukushwayitha muthingo. Mbadi mbomuyenda karo noghu kenya, mboruna kara ruvedhe roghuyi. ⁴ Mudiyuwa dyo ne hanu mbohanembi dimbo dyothihonyi kuhatera kukwenu nokutokota ghudira. Mbohanembi eshi atwe ne twaIsrealite ne tunapu kuhanyaghura; Nyambi ghana tjindji ghupingwa ghohanu wange. Ngepi edi ghana yini shwayitha? Ghatapa mapya ghetu kwawa heti wetu! ⁵ Yodiyo, amwe mwatungi ne mbadi mbomuwana hana hoka awa mboha neghedha mirurwani mumbunga dhaFumu Nyambi. ⁶ Mwapumba, dyohana kughamba hapumbi wagho. Mbadi hakona kupumba yinu yi, nomaghuwa ne mbadi mbogha tupitakana. ⁷ Yipwe kughamba kemo ndi? Ndhugho dhaJuda; Nane mupepo waNyambi ne wakukudhekera ndi? Oyi ne yoyiruwana yagho ndi? Nane yighamba yange ne mbadi yina kutenda ghuwa kowa hahungama ndi? ⁸ Kapupi kamana, hanu wange ne hana nimanena yira nomunyathi wagho. Amwe ne muna kutura thirombo pathishupata, kowa hana kupita kupira madimukero yira hakayita hana katunda kuyita oku hana kughayara eshi hadi mumakungero mwene. ⁹ Amwe ne muna kushwayitha yinu yawa mbuyama kutunderera mumayugho ghagho ghomawa; amwe ne muna kushimba maghuwa ghange kutunda kwawanagho kuroruhe. ¹⁰ Mumatuke nomukayende, omu ne mbadi mudyango dyokukona muturumuthere, pamurandu ghonyata dhidimo; amo ne mwapwa kuyungurura kuroruheya. ¹¹ Ngeshi ghumweya gheye kukwenu nomipepo dhombango nokwangera mukughamba eshi; Ame ne nakupumba kuhatera vinyu and yinwa yoyipata, aye mbomuna mutura eshi mupumbi mwe kwawanu. ¹² Mbona mughongadha pofotji owe Jacob. Yaghushemwa, mbona ghongawedha awa hathiyarapo mu Isrreali. Mbona wareta pofotji yira ndjwi muhambo noyira mutanga mumadyero ghadho. Mbopana kara kayoghototo kokakuru pamurandu wawanu hohengi. ¹³ Ghumweya mboghana wapiterera paghutho dhagho. Awo ne mbana tjoro dikorogho nokushwagha ; fumu wagho mbogha kara paghutho no Aye ne yoFumu Nyambi mbogha kara paghutho dhagho.