¹ Hafumu wahe gho mu Amorites wa hakarere ku ditokera dya mutara wa Jordani, no mafumu gho mahe gha kanaani, owa hakarere kumutara gho mbambeko dho dikuruviya dyo dikuru, hayuvire eshi ngepi Fumu Nyambi di ghapwererithire meyu gha Jordani kate ha pwire kutjinaghana hanu wa Israeli, mutjima dhawo dha tukukwire, no mbadi hakarire no mupepo gho matjimapero mumwawo pamurandu gho hanu wa Israeli. ² Ruvedhe ro Fumu Nyambi ghatongwere Joshwa , ''mukufurako moko dhodhitwe no ku kena wahe hana ho hatughuru wa Israeli. ³ ''Munyima Joshwa ghatendire moko dhodhitwe no ku kena wahe hana gho hatutughuru wa I sraeli padyango dya Gibeath Haaraloth. ⁴ Ethi ne thothitambo tha Joshwa gha kenene wahe: Wahe hakafumu wa hashwayere mu Egipte, kuturako no hatutughuru wahe gho hakayita, hafire mumamboreya mundhira dhawo, munyima dho kutunda mu Egipte. ⁵ Ngambi kenge hatutughurughana wahe owa hashwayire mu Egipte hawa kenine ,shime mbadiko karo hangawana wa hashamurukere mumamboreya mundhira dhawo dho kushwayera ku Egipte ha kenine. ⁶ Hanu wa Israeli hayendire myaka makumi mane muma mboreya kate hanu wahe, wa hashwayire mu Egipte, hafire, yoyi mbadi ha kutekere diywi dya Fumu Nyambi. Fumu Nyambi ghatendire medhero eshi mbadi mboha mona ditunga di ghedhere koha kerekandongo wawo eshi mboghana di tupa, ditunga di dina kupuka manhwe no wiki. ⁷ Hanawo wagha retire Fumu Nyambi mumango ghawo owa gha kenine Joshwa, pamurandu shi awo mbadi hapwire kukena mundhira. ⁸ Opa hapwire wahe ku kena, hakarire wahe mumwara kate herukire. ⁹ Munyima Fumu Nyambi ghambire kwa Joshwa eshi, '' Dyarero nashwayithapo honyi kukoye kohaka Egipte. '' Yoyi, dina dyo dyango dyo hadithire shi Gilgal kate no ruvedhe runo. ¹⁰ Ha Israeli haturere mwara wawo pa Gilgal. Haturire paska mumayuwa dikumi no mane ghokaghonda, parunguro muma mboreya gha Jerico. ¹¹ Munyima dho diyuwa dyo paska, dyo dyo diyuwa, hadire mbuyo dhimwe dho muditunga, ghuroto ghokupira muhaha nawo haghuponine. ¹² Manna ghemanine mudiyuwa di hadire kumbuyo dho muditunga. Mbadi kwa karire karo manna kohanu wa Israeli, ene hadire kumuyangu gho muditunga dya kanaani ogho mwaka. ¹³ Joshwa pakukumena pepi na Jeriko, ghakamburire meho ghendi no ghamonine, munu ghanemana kughutho dhendi, aye ghana shwamuna dimende dyendi , noghana dikwatera munyara dhendi. Joshwa ghayendire kukwendi no kughamba eshi, ''Owene gho wetu ndi endi ghomukanoredhetu?'' ¹⁴ Aye gha huthire eshi, ''mbadikemo. Ghamene no mukuru wawa kayita wa Fumu Nyambi. Pano ne neya.'' Munyima Joshwa gha nyongekire rupara rwendi pamuve no kumu tongamena no ghambire kukwendi eshi, ''Yinu munye Fumu ghana kughamba kwa mupikendi?'' ¹⁵ Mukuru wawa kayita wa Fumu Nyambi ghambire kwa Joshwa eshi, ''Shupure makuha kumapadhi ghoye, yoyishi padyango di ghunemana dya pongoka. '' Munyima Joshwa ghayitendire.