¹ Joshwa ghapindukire mathiku-thiku, no shwayire kutundera mu Shittim. Heyire ku Jordani, aye ghakarire no hanu wahe wa Israel, no hakaturere mwara wawo popo kughutho ghokutjinaghana kuthambo diya. ² Munyima dho mayuwa mahatu, hapiterithi hayendaghurire mukatji ko mwara; ³ harawerere hanu, ''Opashomumone dimbangu dyo nungathano dya Fumu Nyambi wenu, no hapristeri gho mu Levites hana didhamuna, mwakona kuthiya dyango di no kudikutha. ⁴ Pakona kukara muhanyamo pakatji kenu no nadyo ghokukuma ku mayovi mawadi kyubite gho mameteri. Mbadi mwakona kudihenyena, podigho shi mumone eshi ndhira munye sho muyende. kutunda pa mwadhira kudhipita rumwe.'' ⁵ Joshwa ghambire kohanu, ''Mwakona kukuroyithera mwathinda peghundha, yoyi Fumu Nyambi mboghana tendi yitetukitho mukatjikenu.'' ⁶ Ndani Joshwa ghambire koha pristeri,''Mushimbe dimbangu dyo nungathano, no mupite kughutho dhohanu.'' Hadhamunine dimbangu dyo nungathano no hapitire kughutho dho hanu. ⁷ Fumu Nyambi ghambire kwa Joshwa, ''Odi diyuwa mbonakutendi ghukare ghomunu gho mukuru mumeho gho ha Israel. Mbohana dimuka eshi thikadi nakarire na karire na Moses, Mbona kara noye. ⁸ Mboghuna rawera hapristeri owa hokudhamuna dimbangu dyo nungathano, ''Opa mbomuna kuma peghuru dho meyu gha Jordan, mwakona kwima ndjikiti mu rware rwa Jordani.''' ⁹ Munyima Joshwa gha ghambire kohanu wa Israeli, ''mwiye kuno, no mutegherere kuma nando gha Fumu Nyambi wenu,'' ¹⁰ Na Joshwa ghambire eshi, ''Koyi muna kudimuka eshi Nyambi gho muyumi ne moghadi mukatji kenu no aye mboghana mushwayitha mukatji ko hakananite, ha Hettites, ha Hivites, ha Perizzites, ha Girgashites, ha Amorites, no ha Jebusites. ¹¹ Mukenge! dimbangu dyo nungathano dha Fumu ghokaye kokahe dina mupiterera kughutho wenu mu Jordani. ¹² Pano mutorore hanu dikumi no hawadi mumako gha Israeli, ghofotji mukehe muno. ¹³ Pakuna kuma mapadhi gho hapristeri owa ha shimbire dimbangu dyo nungathano dya Fumu Nyambi, Fumu ghokaye kokahe, pakukundama meyu gha Jordani, meyu gho mu Jordani ghana kwimana, no ngambi meyu oghana kupuka kushwayera mumaviya ghana kwimana no kutenda yira dikuma. ¹⁴ Munyima dho kutunda hanu muma mwara ghawo mukutjinaghana kuthambo diya dyo Jordani, ha pristeri owa hashimbire dimbangu dyo nungathano hapitire kughutho wo hanu. ¹⁵ Pakuna kuma vene wa hashimbire dimbangu ku Jordani, no mapadhi gho hapristeri owa hashimbire pakungena mumeyu- popo Jordani ghapukere mutara ghafotji- ¹⁶ meyu ogha gha pukere ghatambe kudiviya ghemanine mutara ghofotji. Meyu ghemanine kokayenda. Meyu gha shayikire kupukera mu Adam, mbara edhi dhakarere ku Zarethan, kutundera kudikuruviya dya Arabah, Dikuruviya dyo Mungwa. Hanu hatjinaghanine pepi na Jeriko. ¹⁷ Hapristeri wa hashimbire dimbangu dyo nungathanodya Fumu Nyambi hemanine pamuve gho kukuta pakatji ka Jordani kate hanu wahe wa Israeli hataghurukire kuthambo dho muve gho kukuta.