¹ Mbadi wakona kushamberera we- Esreali yira hanu hamweya, owe ne watenda rungu na-Nyambi ghoye. Owe ne watenda ruhakitho kukehe thindanda. ² Thindanda nomu madhungero ghovinyu, mbadi mboyi kona karo kumu koreritha ko novinyu ghomupya ne mbadi mbogha rogha. ³ Mbadi mboha tunga mudyango dyaFumu Nyambi ene Ephraim ne mboghana huka ku-Egyptena nombohana kadya yidya yokunyata mu-Assyria. ⁴ Awo ne mbadi mbohatapa muyambo ghovinyu kwaFumu Nyambi endi muyambo dhagho eshi Ghakudhi menya-menyene Nyambi. Mboyina kara yidya yagho yira yowa hadi muditamu kukwagho; waheya awa mboha yidya ne mbohana nyata, noyidya yagho ne mboyina kara ngenyu yagho hathinda; mbadi mboha yireta kundhugho dhaFumu Nyambi. ⁵ Yinu munye mbotenda mudiyuwa edi hatorora nomudiyuwa dyothirika thokukushamberera dya Nyambi? ⁶ Ene mughushemwa awo ne hapita, pamurandu ghomahanyawero. Egyptena mboghana waghongawedha, thitata thodina Memphis ne mbothina wavumbeka. Yitondo yo ghuhungu ne mboyina raghura Siliveri wagho nomighunga ne mbodhina kara mutukurwera twagho. ⁷ Diyuwa dyomahumbithero ne dyeya; Diyuwa dyondjambi ne dina kumu, Esreali dimuke! Mupumbi ne muyero, katughuru ghomupepo ne ghapuka, pamurandu ghomaharwero ghenu noghukuru ghoghunyathi. ⁸ Hakungi wa-Ephraim ne na-Nyambi hadi; ene mupumbi ne ghadi yira thiraha thoyinyunyi mumandhira ghendi ghomaheya. Ghunyathi mundhugho dhaFumu Nyambi. ⁹ Awo ne hapwa kudhongera mughudhungi, thika mumayuwa gha-Gibeah. Mboghana vuruka maharwero ghagho nomboghana humbitha maharwero ghagho. ¹⁰ Nawanine Esreali, yira mandjembere mumamboreya; Namonine hakerekandongo wenu yira mbuyo dhokutangerera kuthitondo thoGhukuyu muthivaka thokutanga. Ene hayendire ku-Baal Poer nohaka kuyakunukire hathinda kuthihonyi; Haka kunyatekire yira yinu eyi hahakire. ¹¹ Kwa-Ephrain, dikuto dyendi mbodina yendera muwiru yira thinyunyi, mbadiko rwereko, mbadiko ghuremu no mbadiko kurema. ¹² Ngambi kemo eshi hana kukuritha hanagho, mbona watjitjupitha waheya. Toko-toko kukwagho apa Mboni wayakunuka! ¹³ Thika dyodi nomonine Ephraim yira dikosho, edi havumbeka padyango dyodiwa. Yodiyo, Ephraim ne mboghana reta hanendi kwamupayi. ¹⁴ Wape Hekudyange, Yinu munye shoWape? Wape mukogha ghokufitha-fitha nomere gho kupira mahwe. ¹⁵ Ghuyi wagho ghoghuheya ne mu-Gilgal ghudi, nokuya ne kona Wanyengera. Pamurandu ghoghuyi ghoyitenda yagho. Mbona washwayitha mundhugho Dhange; Mbadi mboni wahaka karo, yoyishi hama fumu ghana wagho waheya ne hakawidhi ghomukungu. ¹⁶ Ephraim ne ghapwa kukotonga nomidhi dhendi ne dhakukuta mbadiko kwima mbuyo. Kemo, ngeshi hana wana hana, ame ne mbona pagha hana homikogha dhagho. ¹⁷ Nyambi wange ne mboghana washwena, pamuarandu eshi mbadi hamukutekera; No mbohana renda-renda mumatunga.