THIMINGWA 14
1
Esreali, huke kwaFumu Nyambi ghoye, owe ne wawa pamurandu ghomaharwero ghoye.
2
Kwate yighamba yino, nopiruke kwaHekudyoye. Ghambe ku-Kwendi ngeno, Tundithepo maharwero; notutambure paghunongo ghoye, atwe ne mbotuna tapa muyambo ghomiromo dhetu.
3
Assyria ne mbadi mbogha tughamwena, mbadi mbo tudhina patukambe endi twakughambe karo kuyiruwana yomanyara ghetu eshi; "Owe ne yowe nyambi wetu, yoyishi mu-Moye ne hawana hathiyana mathithiyerero."
4
Ame ne mbona werukitha yihukera yagho munyima, nombona wahaka muhoro yoyishi ghupata Wange ghuna nishwagha.
5
Ame ne mbona kara yira nomume kwa-Esreali; Mboghana kuru yira mutemo nomboghana dhungitha midhi dhendi yira yitondo yoku-Lebanon.
6
Mite dhendi ne mbodhina kuhanya; ghuwa wendi ne mboghana pitura yira thitondo tho maghadhi gho-Oliva nothiwe thomunde wendi ne yira Lebanon.
7
Awa mbatunga mumumvure Wendi ne mbohana huka; awo ne mbohana wapindutha yira mbuto nokukura yira yitondo yomandjembere. Thiwe thagho ne yira thoyitondo yomandjembere gho ku-Lebanon.
8
Ephraim ne mboghana ghamba eshi; "Yinu munye shoni tende karo noyitjwandjo? Ame ne nayuvu nona kumukutha. Ame ne yira thitondo thothina mahako nombuyo dhoye ne kudhiwana muMwange.
9
Yidye munyanyami? Ghakone kutjwathana yinu yino. Yidye ghomaghano? Ghatjwathane yinu yi, yoyishi mandhira ghaFumu Nyambi ne ghahungama; Hahunga ne kuyenda mo ene ha yiharuri ne kuwaghura mo.