¹ Esreali, huke kwaFumu Nyambi ghoye, owe ne wawa pamurandu ghomaharwero ghoye. ² Kwate yighamba yino, nopiruke kwaHekudyoye. Ghambe ku-Kwendi ngeno, Tundithepo maharwero; notutambure paghunongo ghoye, atwe ne mbotuna tapa muyambo ghomiromo dhetu. ³ Assyria ne mbadi mbogha tughamwena, mbadi mbo tudhina patukambe endi twakughambe karo kuyiruwana yomanyara ghetu eshi; "Owe ne yowe nyambi wetu, yoyishi mu-Moye ne hawana hathiyana mathithiyerero." ⁴ Ame ne mbona werukitha yihukera yagho munyima, nombona wahaka muhoro yoyishi ghupata Wange ghuna nishwagha. ⁵ Ame ne mbona kara yira nomume kwa-Esreali; Mboghana kuru yira mutemo nomboghana dhungitha midhi dhendi yira yitondo yoku-Lebanon. ⁶ Mite dhendi ne mbodhina kuhanya; ghuwa wendi ne mboghana pitura yira thitondo tho maghadhi gho-Oliva nothiwe thomunde wendi ne yira Lebanon. ⁷ Awa mbatunga mumumvure Wendi ne mbohana huka; awo ne mbohana wapindutha yira mbuto nokukura yira yitondo yomandjembere. Thiwe thagho ne yira thoyitondo yomandjembere gho ku-Lebanon. ⁸ Ephraim ne mboghana ghamba eshi; "Yinu munye shoni tende karo noyitjwandjo? Ame ne nayuvu nona kumukutha. Ame ne yira thitondo thothina mahako nombuyo dhoye ne kudhiwana muMwange. ⁹ Yidye munyanyami? Ghakone kutjwathana yinu yino. Yidye ghomaghano? Ghatjwathane yinu yi, yoyishi mandhira ghaFumu Nyambi ne ghahungama; Hahunga ne kuyenda mo ene ha yiharuri ne kuwaghura mo.