¹ Apa ghaghambire Ephraim ghututuma, ghakuyeyure thinda mu-Esreali; Ene apa ghaharure kupitera mukukarera Baal ne ghafire. ² Pano keho wo ne kuna kuharura rorwingi noha kutendera hathinda yitjwandjo yokuyenyumuna, yitjwandjo yo-Siliveri kukutha kughudimuki wagho. Yoyiheya ne yiruwana yawa kakuyuwa. Awo ne kughamba kukwayo; Muninge kehe yu ghana kureta muyambo ghacumite ndana." ³ Yodiyo, awo ne mbohana kara yira divuyi dyomathiku-thiku noyira mume ghokwiya noku kuyuruka. Yira mungu ghu hana kuyerutha pathindanda thokupurera noyira mwithi ghuna kushwagha muditju dyokushwaghera mupepo ghoghuyi. ⁴ Ene Ame ne Yame Fumu Nyambi ghoye, kutunderera kuditunga dya-Egyptena; Mbadi mwakona kukarera nyambi waye naye shimengwa Yame; ⁵ Mbadiko mukomononi ngeshi mbadi Yame. Namudimukire mumamboreya, mudyango dyodirumbu dishokuru. ⁶ Apa mwakarire nomango ne mwekutire; Awo ne hekutire noha kuyeyure hathinda; Yodiyo, ha-Ni vuramine. ⁷ Yodiyo, Ame ne mbona kara kukwagho yira nyime; Yira ndhogho kundhira nombona kengengerere kundhira. ⁸ Mbona wahomokera yira didjidjikwe edi hana kungura kana dyo; Ame ne mbona yakunutha tundjiya twagho nombona wapagha yira nyime, yira thishereka mbona wapapaghura yipindhi-yindhi. ⁹ Owe Esreali, ghuna pu kuhanyaghura ene maghamweno ghoye ne kutunderera ku-Kwange. ¹⁰ Mbona kara noFumu ghoye nokupi ghadi ghumweya, podiyo eshi ghamughamwene muyitata yenu? No haghaturi wenu awa mwarombire eshi; "Tupe fumu noha mafumu ghana? ¹¹ Namupire fumu mughupata wange no-Na mushwayithirepo mughupata wange. ¹² Maharwero gha Ephraim ne ghapwa kughanga; Maharwero ghendi ne kwagha pungura. ¹³ Tjitju dhambuyama yu ghana kuyovoroka ne mbodhi neya kukoye. Aye ne mwana ghokatughuru ghomuyero nombadi ghakare rure oku hawanenanga hanuke. ¹⁴ Ame ne mbona waghamwena kumangcamu ghothidi; Mbona waghamwena eshi mbadi hafe. Owe yifa, mbona kara Yame mahumbithero ghoye! Owe thidi, mbona kara Yame mahanyawero ghoye! Mathiyerero ne ghapwa kundeka Murupara rwange." ¹⁵ Ngambi kemo eshi kuna kuyangura mwawa minendi, mupepo ghokudiva ne mboghuneya; Mupepo waNyambi ne mboghuneya kutunderera mumamboreya. Ndani makurero ghendi mboghana kukuta nodithima dyendi ne mbodina pwerera. Hanyathi wendi ne mbohanepitha ghushwi ghomuthitungu ghoyinu yomaparo ghomudyo. ¹⁶ Samaria ne mumurandu ghadi, pamurandu eshi ghaharwera Nyambi wendi. Awo ne mbohana fu kuthimende nohanawo hohambiru ne mbohana watetaghura yipindhi-yipindhi nawa mbuyama hoharemu ne mbohana wapayura thiyahi.