¹ Ephraim ne kuna kukukoreritha nomupepo noghana kutjidha mupepo ghokuDiva. Kehe diyuwa ghana kuwedherera mbango dhendi nomepithero. Shime karo, awo ne kuturithapo makuyuvero nawa ka-Assyria nohana kutwara maghadhi ku-Egyptena. ² Fumu Nyambi ne ghana kureta matetero ndhango kwa-Juda nomboghana humbitha Jacob kukutha mumandhira ghendi; mboghana muhuthera ghuyi wendi. ³ Aye ne ghakwatire minendi kudighuru oku shime mumukogha ghadi nopamangcamu ghendi ne gharwire naNyambi. ⁴ Shemwa, gharwire na mu-Engeli noya mutombokire; Ghadirire nokuromba maghuwa kukwendi, apa ghamuwanine mu-Bethel nokuya ne ghaghambire kukwetu. ⁵ Oyu ne Fumu Nyambi Thinda, "Yahweh" dyo dina Dyendi dyomavurukero. ⁶ Amwe keho pamaghamweno ghaNyambi ne mupiruke; Mukumithemo mathiyerero noghuhungami nomutaterere kwaNyambi wenu roruheya. ⁷ "Kananite shadi nyanyamena!" Thikara thodifurumeko ne munyara dhendi thidi; ghahaka rupetho. ⁸ Na-Ephraim ne ghaghamba esi; "Yaghushemwa, nidi noghushwi no nawana ghushwi wange nothinda, kushwagherera muyiruwana yange nombadi mboha wana mumwange diharwero." ⁹ Ene Me ne Yame Fumu Nyambi ghoye, kutunderera muditunga dya-Egyptena; Mbona kutendi karo ghutunge mutu kurwera, thika mumayuwa ghoyirika eyi hatorora. ¹⁰ Shime karo naghambire kupitera mwawapumbi nonengipithire yimona meho; Natapire yifanekitha kupitera paghushupi wawapumbi. ¹¹ Ngambi kemo eshi Gibeah ne ghadi noyitjwandjo ene ghushemwa, yapira mudyo. Ngambi kemo eshi awo ne kuna kutenda muyambo ghomandwedho mu-Gilgal ene ghushemwa eshi yinyaku yagho ne mboyina kara yirambo yoyitjoro mumakwina ghomumapya. ¹² Jacob ne ghatjirera kuditunga dya-Syria; Esreali ne kuna kuruwanena mbuyama nopamurandu wambuyama ne ghakarire mukungi ghondjwi. ¹³ Kupitera mwamupumbi, Nyambi ne ghakashwayithire ha-Esreali mu-Egyptena nokupitera mwamupumbi ne ghapwire kupungura. ¹⁴ Ephraim ne ghatoko-tithire Nyambi thikumenena; Yodiyo Hekudyendi ne mboghana thiyi thinyinga papendi nokupirura ghupata wendi kukwendi.