¹ Apa Esreali ghakarire eshi mwanuke ne namuhakire noNethire mwanange ghokatughuru ghashwaye mu-Egyptena. ² Wingi ghomethero gha, nagho dyoha wayakunukire. Hatapire muyambo kwa-Baal noha tumekere hapu kuyitjwandjo yokuyuwa. ³ Nahongire Ephraim kuyenda, nokuwa kwata pamoko; ene mbadi hadimukire eshi Yame nawerukithire. ⁴ Nawayendithire nomughodhi ghowotu nongwama dhoruhakitho nona karire kukwagho yira wowa hashwayitha djoko muthingo, nemanine nokuwa korera. ⁵ Mbadi mbogha huka kudyango dya-Egyptena; Ene haka Assyria ne wombo hakara hamafumu wagho, pamurandu eshi hashwenine kupiruka kukwange. ⁶ Nodimende ne mbodina wera muyitata yagho, kwipitha mikunda nokuwa pagha po, pamurandu ghomaghano ghagho hathinda. ⁷ Haguva wange ne hana peti, nokuna kuhukera munyima hashwaghe kukwange. Ngambi kemo eshi awo ne kuna kunitoya eshi; "Nyambi Shokuru!" noyofotji temba ghana kutapa makughero kuKwendi. ⁸ Ngepi edi sho-Ni kuthiyererepo we Ephraim? Ngepi edi sho-Ni kutape we Esreali? Ngepi edi sho-Ni kutende we yira Admah? Ngepi edi sho-Ni kuture we yira Zeboiim? Mutjima wange ne ghuna kutjindji noghunongo wange kuna kuyeyuka. ⁹ Mbadi karo mboni mupagha noghupata wange; Mbadi karo mboni dhongonona Ephraim. Ame Yame Nyambi mbadi munu, Mupongoki mukatji kenu; nombadi mbo Niya noghupata. ¹⁰ Awo ne mbohana kuthu Hekudyagho; Aye ne ghana kuvuma yira nyime. Ngeshi oku ghana kuvuma, hanendi ne mbohaneya ghututuma kutunderera kuditokera; ¹¹ Mboha neya ghututuma yira thinyunyi thina kushwagha ku-Egyptena, noyira dikutji kutunderera muditunga dya-Assyria. Nombona watawedhera hatunge mumandhugho ghagho, dyoghana kughamba Fumu Nyambi. ¹² Ephraim ne ghani dhingumwetwedha noghumbango nondhugho dha-Esreali ne nodifurumeko. Ene Juda ne shime ghayendi naFumu Nyambi, naMupongoki oyu ghakara ghutawehdi.