¹ Esreali ne ghana piri mbuyo mudipya dyendi. Aye ne kwakukoreranga thinda. Kukutha kuwingi ghomuyangu ghombuyo dhendi. Gha wedherera yinyaku yo kutenderera muyambo yendi; Kukutha kundjambi edhi ghana kuwana mudyango dyendi, ghawedherera kutanaritha maghundhi ghendi. ² Mutjima dhagho ne dhakuyakunuka nohadi nomurandu. Aye ne mboghana bonyona yinyaku yagho nokwipitha maghundhi ghagho. ³ Pano keho ne kuna kughamba eshi; "Mbadi tudi nafumu, pamurandu eshi mbadi twayapire Fumu Nyambi. Nafumu ne ngo yinu munye shogha tende kukwetu?" ⁴ Awo ne haghamba yighamba, mukwedha mbango pakuturithapo makuyuvero. Ene matetero ndhango ne kuna kukura yira ghuhungu mudikwina dyoyitjoro yomudipya. ⁵ Hana hoka wa-Samaria ne hadi nowoma pamurandu ghondana wa-Beth Aven. Hanu ne kuna kudira noha pristeri nagho kemo awa hashamberere kuthitjwandjo thi, pamurandu eshi dikuto ne dina wayakunuka. ⁶ Thitjwandjo thi ne mbohana thishimbi ku-Assyria eshi ndupu kwafumu Jerab. Ephraim ne mboghana wana honyi na-Esreali ne mboghana wana honyi kumaghano ghendi. ⁷ Kwaka Samaria, fumu wagho ghapwa kuteta yira thikepa pameyu. ⁸ Nomango ghomakuru gha -Aven, nodiharwero dya-Esreali ne mbodina pu kuhanyaghura. Mighunga nomukona ne mboyina meni payinyaku yagho nombohana ghamba kumarundu eshi; "Mutuwere!" ⁹ Esreali ne mwaharura kutunderera kumayuwa gha-Gibeah; Opo ne pomwemana noyita mu-Gibeah ne mbadi mboyi wapiterera hana homaharwero. ¹⁰ Muyirumbera yange ne mbona wahungeka. Hanu ne mbohana kughongawedha kuwarwitha, apa mboni wakwata kumaharwero ghagho mawadi. ¹¹ Ephraim ne yira ndema yu hadeghura nogha haka kupura ghuheke ene natura djoko muthingo dhendi nombona tendi Ephraim ghakoke thikekere na-Juda ne mboghana purura; Jacob ne mbogha nutupitha muve wendi thinda. ¹² Kukunene ghothinda ghuhungami nokeshe ghunongo; Wotupithe muve yoyishi ruvedhe rokushana Fumu Nyambi, kate Ghakwiye nokuna rokitha ghuhungami papoye. ¹³ Amwe ne mwakuna ghuyi nomwayangura maharwero. Mwadya mbuyo dhokushwagha mumangerekero, pamurandu eshi mwakuruperire mumandhira ghenu, pakumona mbunga dhawa tutughuru wenu. ¹⁴ Yodiyo, mapimbaneno ne mboghana shwagha mwahanu wenu noyitata yenu ne mboyina pu kwipitha, Thika dyodi Shalman ghaka hanyaghure Bethi Arbel mudiyuwa dyoyita. Apa hanyina nawanawo hakapwire kupagha. ¹⁵ Kemo dyombo yihokoka kukoye we- Bethel, pamurandu ghoghukuru ghomaharwero ghoye. Kumatamekero ne fumu wa-Esreali mboghana pu kuhanyaghura."