¹ Apa twamanine yi, hapiterithi ne heyire kukwange noha ghambire eshi; "Hanu homu Esreali, hapristeri, nawa Levite ne mbadi hana kuyakunuka kumushovo dhawa hatunga mudyango di noghuyi wagho. Mushovo yira, haCanaanite, Hittite, Perizzite, Jebusite, Ammonite, Moabite, Egyptian nawa Amorite. ² Awo ne kuna kukuyeka thana, nohana kuvungu nohanu hokupongoka nomushovo edhi dhatunga mudyango di nohapiterithi ne hodiyo hana piterera kukupira ghutawedhi. ³ Apa nayuvire yi, nadjadjurire yishupata yange no nadhurire huki dhokumutwi wange nokumwendo nona hungumanine natetuka. ⁴ Ndani yomuhe oyu ghatutukwire kumuragho waNyambi ne kokwoyera nange, pamurandu ghomaharwero ghowa hana kwatire nokuwa twara kughupika, nahungumanine natetuka kate muyambo ghorunguro. ⁵ Pamuyambo ghorunguro ne nashwayire muma dhirerekedho ghange, oku me ne nadjadjura yishupata yange, nakuvamine kumanwi ghange no nayeyurire moko ghange kwaFumu ghoNyambi wange. ⁶ Ghona ghambire eshi; "Nyambi wange, nashwahuka thikumenena eshi nikapuke rupara rwange kukoye, Nyambi wange; maharwero ghetu ne ghana piterera mitwi dhetu nomaharwero ghetu ne ghana kumu kudiwiru. ⁷ Kutunderera mumayuwa ghawa kuru wetu kate mumayuwa ghetu, tudi mumaharwero ghashokuru. Mumaharwero ghetu, mafumu ghetu nawa hapristeri wetu ne twawa tapa mumanyara ghawa mafumu ghodyango di, kuyimende, mughupika, mumashinyihero nomarupara ghothihonyi thika dyodi tudi dyarero. ⁸ Ene pakapupi kamanana, ghunongo waFumu ghoNyambi wetu ne kuneya nokuna tuthiya yira yiruhupwa eyi yina tjira mukutupa makwatero mudyango dyendi dyokupongoka. Eyi ne pamurandu waNyambi wetu eshi ghafikure meho ghetu nokutupa maturumuthero mughupika wetu. ⁹ Twakarire twapika ene Nyambi ne mbadi ghatuvuramine mughupika wetu, nane ne ghawedherere makuyuvero noghutawedhi wendi nafumu ghoku Persia. Aye ne ghatupire mangcamu ghomapya mukuna tendurura ndhugho dhaNyambi wetu nokuna huthedheramo ghuraghuri wendi nogha tupa ditete dyomakungero muJuda naJerusalem. ¹⁰ Ene pano keho we Nyambi wetu, Yinu munye shotu ghambe karo? Atwe ne twanyatha muragho ghoye. ¹¹ Muragho ghu watapire kwawa pumbi eshi; "Dyango edi muna kwingena eshi mudimune ne dyanyata, dyapwa kunyateka kwawanu awa hatunga mo noghuyi wagho. Hadiyaritha nonyata dhagho kutunda kumatangero kate kughuhura. ¹² Mwamba tapa hanenu hohambuyama eshi hawa yeke endi yamwe eshi muyeke hanagho endi kushana thiraro ngambi ghundjewa-ndjewa nagho, podiyo eshi mbomukare mwatanara nokudya maghuwa ghoditunga di ndani mboyina ningitha hanenu mboha diraghure kuroruheya. ¹³ Nomunyima dhoyinu yoheya eyi yeya kukwetu pamurandu ghomaharwero ghetu, nomaharwero ghetu ghashokuru, Owe Nyambi wetu watuhumbitha ghumbiru kupiterera mahumbithero agha twaroyera kuwana nowatuthiyera makomweneno yira gha. ¹⁴ Shime karo tutjore muragho ghoye ndi nokukuyekathana nawanu hokunyata ndi? Mbadi mbo pata nokutu dhongonona po omu mbapira kupara munu ndi? ¹⁵ Fumu Nyambi wa-Esreali, Owe ne wapongoka, shime twathiyarerapo kate mudiyuwa dino. Paghutho dhoye tudi notoko-toko ngambi kemo eshi noyofotji temba ghokukona ghemane paghutho dhoye pamurandu ghoyinu yi.