¹ Apa gharapere Ezra nokutongonona ne ghadirire nogha kuvamene kundhugho dhaNyambi, mbunga dhawa tutughuru, hambuyama nohanuke ne heyire kwa-Ezra nohadirire thikuma. ² Shechaniah ghomwana Jehiel, ghumweya ghopo hana hotutughuru wa-Elam ghaghambire kwa-Ezra eshi; "Twaregha muragho waNyambi wetu notwa yeka hambuyama hoha hayidena hatungi homodino ditunga; ene ngambi kemo, poghadi makurupero kwa-Esreal." ³ Pano keho ne tutende makuyuvero naNyambi wetu nokutuma hambuyama waheya nohanagho, kukutha kumarawero ghaFumu nowa hatutukwa kumuragho waNyambi, tuyitende kukutha mumuragho. ⁴ Wimane nothitumbukera thi ne thoye ene natwe noye tudi, tanare no ruwane." ⁵ Ezra ne ghemanine nogha turithire hapiterithi wawa pristeri, haLevite nawa Esreali waheya hatape medhero, eshi hana kutenda kukutha yoyi yidipo. Yodiyo hatapire medhero gha. ⁶ Ezra ne ghamatukire kutunda kundhugho dhaNyambi nogha yendire mungonda dhaJehohanan ghomwana Eliashib, oku aye ne mbadiko ethi ghana di nokunwa meyu temba, aye ne ghadirire pamurandu ghomaharwero ghawa haka karire mughupika. ⁷ Hatumine mbudhi mu Juda naJerusalem ghomuheya kwawanu waheya awa haka shwaghere kughupika eshi haponge muJerusalem. ⁸ Keheyu ghakupira kwiya mumayuwa mahatu kukutha edi haraghure hapiterithi nawa mayami ne hakona kumu kungura yiwana yendi yoyiheya nokumu shwayitha mudiko dyawa haka shwaghere kughupika. ⁹ Hatutughuru waheya waJuda naBenjamin hapongire muJerusalem mumayuwa mahatu. Yahokokire mukaghonda koghukwoko-ne mudiyuwa dyomakumi mawadi nohanu ne hahungumanine pashenene kundhugho dhaNyambi ghututuma pamurandu ghothinga ethi thakarire po nopamurandu ghomvura ghomukuru. ¹⁰ Popo Ezra ne kokwimana nokughamba kukwagho eshi; "Mwatjora muragho mukuyeka hambuyama hoha hayidena, nokuwedherera murandu wa-Esreali." ¹¹ Kate popano keho ne, mutongonone maharwero ghenu kwaFumu ghoNyambi wawa kerekandongo wenu nomutende mahimeno ghendi; mushwaghe kwawanu awa hatunga muditunga dino nokwawa mbuyama hoha hayidena. ¹² Mbunga dhodhiheya kokuyondjoka ghuhutha eshi; "Yi, tuna kutenda thika dyodi ghuna ghamba ¹³ ene hanu ne hengi; nothino ne thivaka thomvura ghomukuru yodiyo mbadi shotukone kwimana panunda ndani karo ne mbadi thiruwana thodiyuwa dyofotji ngambi mawadi, yoyishi twahengi tuna harwera Nyambi mundhira dhi." ¹⁴ Tuna kumbera, hapiterithi hombunga dhodhiheya ne ngohemane nowaheya mumambara ghetu, awa hadi nawa mbuyama hoha hayidena heye paruvedhe oru shoha turepo, ngo kwiya pofotji nawa mayami noha ghaturi ghomambara, kate ghukenya waNyambi wakutushwaghe. ¹⁵ Jonathan ghomwana Asahel naJahzeiah ghomwana Tikvah hoha kananithire dighano di, Meshullam naShabbethai ne hoha wakwatithireko. ¹⁶ Hana hoka wowa haka tundire kughupika ne hatendire kemo, Ezra ghomuristeri ne ghatorore hatutughuru nawa mayami kehewa mudiko dyagho, waheya pamena ghagho noha hungumanine mudiyuwa dyokutanga dyokaghonda kodikumi muku konakona thinga ethi thakarirepo. ¹⁷ Mudiyuwa dyokutanga dyokaghonda kokutanga, awo ne hamanine kukona-kona eshi hatutughuru munye awa hadi noha mbuyama hoha hayidena. ¹⁸ Mohana wawa pristeri mohadi awa hatungire nawa mbuyama hoha mutundakure. Mohana Jeshua ghomwana Jozadak noha minendi haMaaseiah, Eliezer, Jarib naGedaliah. ¹⁹ Hakuruperithire eshi hana kuthiya hambuya wa, apa hanongonone eshi mumurandu hadi noha tupure muyambo ghondjwi ghomurume kutundurera mumutanga ghotho muyambo ghomaharwero. ²⁰ Mohana Immer; Hanani naZebadiah. ²¹ Mohana hoka waHarim, Maaseiah, Elijah, Shemaiah, Jehiel na-Uzziah. ²² Mohana hoka waPashhur, Elioenai, Maaseiah, Ishmael, Nethanel, Jozabad na-Elasah. ²³ Mwawa waLevite; Jozabad, Shimei, Kelaiah, pofotji yira Kelita, Pethahiah, Judah na-Eliezer. ²⁴ Mwawembithi ne; Eliashib, mwawa kungi makorogho ne; Shallum, Telem na-Uri. ²⁵ Mwawa Esreali keho waheya ne; Hana Parosh, Ramiah, Jeziah, Malchiah, Mijamin, Eleazer, Malchijah naBenaiah. ²⁶ Mohana Elam; Mattanial, Zechariah, Jehiel, Abdi, Jeremoth na-Eliah. ²⁷ Mohana Zattu, Elioenai, Eliashib. ²⁸ Mohana Bebai; Jehohanan, Hananiah, Zabbai na-Athlai. ²⁹ Mohana Bani; Meshullam, Malluch, Adaiah, Jashub, Sheal naRamoth. ³⁰ Mohana Pahath-Moab; Adna, Chelal, Binnui, Maaseiah, Mattaniah, Bezalel, Binnui naManasseh. ³¹ Mohana Harim: Eliezer, Ishijah, Malkijah, Shemaiah naShimeon, ³² Benjamin, Malluch naShemariah. ³³ Mohana Hashum: Mattenai, Mattattah, Zabad, Eliphelit, Jeremai, Manasseh naShimei. ³⁴ Mohana Banni: Maadai, Amram, Uel, ³⁵ Benaiah, Bedeiah, Cheluh, ³⁶ Vaniah, Meremoth, Eliashib ³⁷ Mattaniah, Mattenai, Jaasai, ³⁸ Bani, Binnui, Shimei, ³⁹ Shelemiah, Nathan, Adaiah, ⁴⁰ Machnadebai, Shashai, ⁴¹ Azariah, Shelemiah, Shemariah, ⁴² Shallum, Amariah naJoseph. ⁴³ Mohana Nebo: Jeiel, Mattithiah, Zabad, Zebina, Jaddai, Joel naBenaiah. ⁴⁴ Waheya wa ne hayekire hambuyama hoha hayidena noha karire nohanagho poha mbuyama hamweya mowa.