¹ Imoyo wamwami nkalonga kamanzi mujanza lya Jehova; ulamusandula kufumbwa mbwayanda. ² Zyonse nzila zyamuntu zililuleme kumenso akwe, pesi ngu Jehova ulingula myoyo. ³ Kuchita zyelede aziluleme zilatambulika kuli Jehova kwinda zipayizyo. ⁴ Menso alikankayizya amoyo ulisumpula ndilampi lyabasizibi-zibi. ⁵ Makanze abachenjede atola kukuzwidilila, pesi woonse muntu uchijana uyakukufwaba. ⁶ Kujana buvubi alulimi lubeja mbuyooka akakole kajaya. ⁷ Lunyonyongano lwabasizibi luyoobasowa, nkambo bakaka kuchita ziluleme. ⁸ Inzila yamuntu ulamulandu ilipilingene, pesi oyo usalala uchita ziluleme. ⁹ Nkubotu kukkala achooko chakaluli kwinda kukkala mung'anda amukayintu ukazya loko. ¹⁰ Moyo wabasizibi ulisukeme kububi; simabambanwa wakwe tajani choolwe kumenso akwe. ¹¹ Kuti sikusampawula wapegwa chisubulo, utakwe luzibo ngawaba musongo, alimwi ikuti musongo walayigwa ulajata luzibo. ¹² Imusalali ulanga ng'anda yabasizibi; weta basizibi kulunyonyooko. ¹³ Oyo ujala matwi akwe kuti bachete kabalila, alakwe uyolila, pesi takwe uyomumvwa. ¹⁴ Ichipo chisisikene chilagwisya kunyema alimwi chipo chakusisikizya chilamania kunyema kupati. ¹⁵ Ikuti kwabetekwa kabotu, ibasalali balabotelwa, pesi basikuchita zibi ngabayoowa loko. ¹⁶ Oyo ulikule anzila yakumvwisisya, uyolyokezya akkati kabafu. ¹⁷ Ooyo uyandisya kulibotezya uyoba muchete; oyo uyandisya bukande amafuta takozoba muvubi pe. ¹⁸ Sizibi nchinunuzyo chabalulami, alimwi silweno nchinunuzyo kubataluleme. ¹⁹ Nkubotu kukkala munkanda kwinda kukkala amukayintu ukazya alimwi munyeme. ²⁰ Imbono ziyandika amafuta zibambwa mung'anda zyabasongo, pesi muntu chifubafuba ulazimena zyoonse. ²¹ Ooyo uchita ziluleme alimwi kalaluzyalo - ooyu muntu ulajana buumi, ibululami akulemekwa. ²² Imwalumi musongo ulalwisya muunzi wabasinguzu alimwi ulamwayula buyumu bwang'anda njibasyoma. ²³ Oyo ubamba mulomo alulimi lwakwe ulalivuna kumapenzi. ²⁴ Muntu ulisumpula akulikankayizya - ''Musampawuli'' ndezina lyakwe - uchita nzyachita mukulikankayizya akulisumpula. ²⁵ Mutolo ujayigwa aziyandisyo zyakwe, nkambo maboko akwe alakaka kubeleka. ²⁶ Izuba lyoonse ulemuuzya, pesi mululami ulapa takwe nchakasya. ²⁷ Chipayizyo chasizibi chilasesemya; nchisesemyo loko kuti wacheeta kakkanzide bubi. ²⁸ Mukamboni ubeja uyopya, pesi ooyo uswilila uyowambuula kwachiindi choonse. ²⁹ Sizibi ulaanga busyu bwakwe pesi ululeme ulizizi inzila zyakwe. ³⁰ Takwe busongo, takwe kumvwisisisya, alimwi takwe kulayigwa kunga kulimikizyania a Jehova. ³¹ Ibbiza lilabambilwa izuba lyankondo, pesi kuzunda nkukwa Jehova.