¹ Mubotu muntu muchete weenda mubululami kwiinda ooyo uli aatwaambo tusendekede kalichifubafuba. ² Alimwi tenkubotu pe kuba aachiyandisyo kutakwe luzibo awoyo uchijanisya uliibula nzila. ³ Bufubafuba bwamuntu bulamunyonyweeda buumi bwakwe alimwi moyo wakwe ulakalalila Jehova. ⁴ Ibuvubi bweetela bazolane biingi, pesi ooyo muchete ulaanzanisigwa kuzwa kubenzinyina. ⁵ Sikupa bukamboni mubeji takoyoyenda katapedwe chisubulo alimwi ooyo uyoya kubeja takoyofutuka pe. ⁶ Biingi bakumbila zyoolwe kumuntu upa alimwi woonse muntu muzolani wamoyo uupa zipo. ⁷ Boonse bakulana bamuchete balamusula; kapati biyeni benzinyina biinka kule anguwe! Uliita kulimbabo, pesi tabawo pe. ⁸ Ooyo uujana busongo uyanda buumi bwakwe mwini; ooyo uubamba kumvwisisisya uyojana zibotu. ⁹ Sikupa bukamboni bwakubeja takoyoyenda katapedwe chisubulo, pesi ooy uyoya kubeja uyofwa. ¹⁰ Tazyeelede kuti ichifubafuba chikale oobotu - nekuba kuti mulanda ayendelezye bana babaami.'' ¹¹ Maboneno achita muntu kuti atafwambani kunyema alimwi zimupa bulemu kulekelela milandu. ¹² Kunyema kwamwaami kulimbuli kuvuluma kwamwana wamulavu, pesi kubotelwa kwakwe kulimbuli lume aabwizu. ¹³ Mwana mufubafuba ndunyonyooko kuliwisi, alimwi mukayintu uukazya ulimbuli kuloka kwamanzi. ¹⁴ Ing'anda abuvubi zikonwa kubazyali, pesi mukayintu uuchenjede uzwa kuliJehova. ¹⁵ Ibukandu buwaalila muntu mung'onzi mpati, pesi ooyo utayandi kubeleka ulaba eenzala. ¹⁶ Ooyo uswiilila mulawu ubamba buumi bwakwe, pesi muntu uutayeyi aatala anzila zyakwe uyofwa. ¹⁷ Kufumbwa muntu muuya kubachete ucheneka Jehova alimwi Jehova uyoliya zyoonse nzyachita. ¹⁸ Zyotolola mwana wako kakuchili bulangilizi alimwi utabiki chiyandisyo akumujaya. ¹⁹ Sikanyetunyetu uleelede kuliya chisubulo; na komufutula, weelede kumufutula lwabili. ²⁰ Swiilila kululayo alimwi utambule kulayigwa nkokuti ube musongo kumamanino aabuumi bwako. ²¹ Myiingi miyeyo mumoyo wamuntu, pesi makanze aJehova ngawo ayoyima. ²² Woonse muntu uyanda kulemekwa alimwi muntu muchete mubotu kwiinda uubeja. ²³ Kulemeka Jehova kutola kubuumi; ooyo uumulemeka uyokkutisikana alimwi takoyosikilwa zimuchisa pe. ²⁴ Mukandu uvwika kuboko kwakwe mundido; takoyokonzya kukutola kumulomo wakwe. ²⁵ Uma sikasampusampu, alimwi sikubula luzibo uyochenjela; lulamika uuchenjede alimwi uyojana luzibo. ²⁶ Ooyo ubejela wisi alimwi uutandania banyina mwana weeta kuusa abukali. ²⁷ Na waleka kuswiilila mulawu mwanaangu, ulasweekelwa majwi aaluzibo. ²⁸ Mumboni wabubozi usampawula kubeteka kubotu alimwi mulomo wababi ulamena chibi. ²⁹ Mulandu ubambilidwe basikasampusampu alimwi misana yabafubafuba ibambilidwe mibunda.