¹ Nkubotu kulya chinkwa chitakwe chintu kojisi luumuno kwinda kuba mung'anda izwide zintu atakwe luumuno. ² Mulanda ulabusongo uyoyendelezya mwana uchita bufubafuba alimwi uyojana lukono mbuli umwi wababunyina. ³ Mulilo ngwakusalazya ngolide ansiliva pesi Jehova usalazya myoyo. ⁴ Ooyo uchita chibi ulaswilizya milomo iitaluleme; sikubeja ulaswilila lulimi lwasikujaya. ⁵ Oyo useka bachete utukila mulengi awooyo ubotelwa umwi nabijilwa takoyinka katapenzedwe pe. ⁶ Ibazikulu musini wabachembeede abazyali beeta kulemekwa kubana babo. ⁷ Kwambuula kunambene takucheeleli chifubafuba; amilomo ibeja tiyelelwi akulaya. ⁸ Masinkamulomo alimbuli bbwe lyazigambyo kuloyo uupa; woonse mpasika ulazwidilila. ⁹ Wonse utalangi kubisizigwa uyanduula luyando, pesi oyo utalekeleli ulaanzania benzinyina. ¹⁰ Kukkalalilwa kulamugwasya ulaluzibo kwinda mfayindi zilimyaanda kuchifubafuba. ¹¹ Muntu mubi uyanda kubukila bamwi, nkinkaako mutumwa mukali ulatumwa kulinguwe. ¹² Nkubotu kuswana munyama uyoosya watolelwa bana bakwe kwinda kuswana chifubafuba mubufubafuba bwacho. ¹³ Na umwi wabwedezya bubotu abubi, bubi tabukozwa mung'anda yakwe. ¹⁴ Intalisyo yakutamvwanana ilimbuli ooyo ulekela busena boonse, nkinkaako yenda kutamvwanana kakutana talika. ¹⁵ Imuntu upa muntu mubi mulandu kumusalali - boonse nzisesemyo kuli Jehova. ¹⁶ Nkaambonzi chifubafuba nicheelede kupa muulo wakuyisigwa busongo, kakulikuti lwacho kachitakwe luzibo lwakwiiya? ¹⁷ Mwenzuma ulayanda muzyindi zyoonse amunyina wakazyalilwa chiindi chamapenzi. ¹⁸ Imwalumi utayeeyi uchita zikonke zyanga alimwi ngakuba mulandu kuli simayakilane. ¹⁹ Ooyo uyanda kutamvwanana uyanda chibi, ayoyo ulisumpula ulyiitila lunyonyooko. ²⁰ Imuntu ulamoyo upilingene taboni bubotu pe; ayooyo ulalulimi lusendekede uwida mumapenzi. ²¹ Muzyaliwechifubafuba ulyetela kulila, awisi wachifubafuba takwe lukondo pe. ²² Moyowakwe uzwide lukondo ulasilika, pesi muuya utyokede ulayumya mafuwa. ²³ Oyo uyanda kutamvwanana ulatambula masinkamulomo kuti alesye nzila yakubeteka kabotu. ²⁴ Oyo umvwisisya ulanzya busyu bwakwe kubusongo, pesi menso achifubafuba alangide kumamanino anyika. ²⁵ Mwana chifubafuba uyeta misozi kuli wisi akutakondwa kumwanakazi wakamuzyala. ²⁶ Alimwi, tenkubotu pe kupenzya musalali; mbujli mbokutali kubotu kunyansya baalumi bapati ibalemekwa. ²⁷ Oyo ulaluzibo ubelesya majwi mache awoyo utaluvuki ulamvwisisisya. ²⁸ Achilacho chifubafuba ngachaboneka anga nchisongo na chuumuna; kuti chajala mulomo kuyeyeelwa kuti chilichenjede.