¹ Mabambe aamoyo azwa kumuntu, pesi nsandulo iizwa mululimi lwakwe izwa kuliJehova. ² Zyoonse nzila zyamuntu zililuleme kumenso aakwe pesi Jehova weela myuuya. ³ Peda milimu yako kuli Jehova alimwi mabambe aako ayozwidilila. ⁴ Jehova wakachita zintu zyoonse kumakanze aazyo, nikuba sizibi kubuzuba bwapenzi. ⁵ Jehova ulasula woonse muntu uli aamoyo wakulisumpula, muzizibe eezi alimwi tabakoyochija lwempyo. ⁶ Muluyando alusyomo lwiimvwi bubi bulazimazigwa alimwi mukuyowa Jehova bantu balasiya bubi. ⁷ Eelyo na nzila zyamuntu zyakonda Jehova, uchita nikuba basinkondonyina bamuntu ooyo babe aluumuno anguwe. ⁸ Chilikabotu chintu chiniini nkachili aazibotu, kwiinda zintu zyiingi zitaluleme. ⁹ Mumoyo wakwe muntu ulayeeya nzila zyakwe, pesi Jehova ulalayilila kweenda kwakwe. ¹⁰ Kukomena kwamuntu kuli kumilomo yamwami; mulomo wakwe tukoyowuzya lubeteko. ¹¹ Zipimyo zisyomekede zizwa kuli Jehova; yoonse myeelwe iilimuchikkwama milimu yakwe. ¹² Aawo baami nibachita zintu zibi, eechi nchimwi chisesemyo nkaambo chuuno chabwaami chipegwa niwachita bubotu. ¹³ Mwami ubotelwa milomo yaamba zilikabotu alimwi ulayanda ooyo waamba ziluleme. ¹⁴ Bukali bwamwami mutumwa walufu, pesi muntu musongo uleeazya kuumuzya lunyemo lwakwe. ¹⁵ Mumumuni wamenso aamwami mbuumi alimwi luzyalo lwakwe luli mbuli joba eelyo lyeeta mvula iisansiila. ¹⁶ Nchiichili chibotu kujana busongo kwiinda ngolida. Kujana kumvwisisisya kwasalwa kwiinda nsiliva. ¹⁷ Mugwagwa wabaluleme ulagwisya kuzwa kububi; ooyo uukwabilila bwami bwakwe ulakwabilila nzila yakwe. ¹⁸ Kulisumpula kulazulwida lunyonyooko akaamikaami kali kunembo lyakuwa. ¹⁹ Chili kabotu kulibombya aakati kabantu bachete kwiinda kwanzaania zisalo abalisumpula. ²⁰ Kufumbwa uyesesya aatala anzyayiisigwa uyojana zibotu, ababo basyoma muliJehova bayoolongezegwa. ²¹ Ooyo uuchenjede mumoyo wiitwa kuti nguSyabusongo alimwi bunone bwatwaambo buyungizya chiyandisyo chakuyiisya. ²² Kumvwisisisya nkasensa kabuumi kuliwoyo uli aako, pesi malayilile aabafubafuba mbufubafuba bwabo. ²³ Moyo wamuntu musongo upa kubonena kwamukati kumulomo wakwe alimwi ulayungizya luzibo kumilomo yakwe. ²⁴ Majwi mabotu ali mbuli chikkoto chabuchi - chinono kumubili alimwi chilaponia kumafuwa. ²⁵ Kuli nzila iiboneka kiili kabotu kumuntu, pesi mamanino aayo ndufu. ²⁶ Kupeekezya kwasikubeleka kulamubelekela; nzala yakwe ilamutola kunembo. ²⁷ Muntu mukali ulasya bubi alimwi zyaambo zyakwe zili mbuli mulilo uyaka. ²⁸ Muntu uupilingene ulabusya nkondo akuvwiya kulaanzania buzolwani. ²⁹ Muntu silupyopyongano ubejela simabambanwa alimwi ulamutola kunzila iitaluleme. ³⁰ Ooyo ufwinyina menso ulakanza zintu zipilingene; basyundumika milomo baleeta bubi. ³¹ Imvwi yangwaani yabulemu; zilajanwa mukupona munzila mbotu. ³² Chili kabotu kunonoka kunyema kwiinda kuba silumamba alimwi ooyo weendelezya muuya wakwe ulisimide kwiinda uzunda chisi. ³³ Zisaalo zyakawaalwa azibelo, pesi muzeezo uzwa kuli Jehova.