¹ Wakati kulimbabo, ''Nchobeni ndati kuli ndinywe, mpubali bamwi benu bayimvwi aawa batakabule kufwa pe kabatanaabona Bwami bwaLeza kabusika anguzu. ² Nikwakayinda mazuba aalimusanu alimwi, Jesu wakabweza Pita, Jemusi aJoni wakeenda ambabo aatala achilundu chipati, lwabo abalike. Mpawo wakasanduka kunembo lyabo. ³ Zyakusama zyakwe zyakamwekesya, zyakatubisisya, kwiinda kutubya batubya nkubanga balatubya aako. ⁴ Mpawo Elayija kali aMozesi wakalibonia kulimbabo alimwi wakalikwaambuula aJesu. ⁵ Pita wakasandula akwaamba kuti kuliJesu, ''Muyiisyi, nchibotu kuba aano toonse, atuyake zilawu zyotatwe, chimwi chibe chako, chimwi chibe chaMozesi alimwi chimwi chibe chaElayija''. ⁶ (Taakachichizi pe chakwaamba, nkaambo bakali bayoowa). ⁷ Ijoba lyakasika akubavumba. Mpawo ijwi lyakazwa mujoba kaliti, ''Ooyu ngomwana wangu ngundiyandisya. Amumuswiilile''. ⁸ Aboobo, nibakalangalanga, bakabona kakutachikwe muntu akati kabo pe kunze Jesu alikke. ⁹ Nibakalikuya buseluka kuzwa achilundu, wakabalayilila kuti tabeelede kwaambila naba omwe anzibakabona kusikila Mwana waMuntu akabuke kuzwa kubafu. ¹⁰ Aboobo bakaabamba makani aayai, pesi bakalikuzuwisyania chabo chabo zikonzya kwaamba ''Kubuka kuzwa kubafu''. ¹¹ Bakamubuzya, ''Nkaamboonzi balembi nibakati Elayija nguyelede kutalika kusika?'' ¹² Wakati kulimbabo, ''Elayija ulelede kutalika kusika kuzoobambulula zintu zyoonse. Lino nkaamboonzi nikulembedwe kuti Mwana waMuntu weelede kufwabisigwa kuzintu zyiingi akunyonganisigwa? ¹³ Pesi ndamwaambila kuti Elayija wakasika, bakachita kufumbwa nzibayanda kuchita alinguwe mbuli mbukulembedwe aatala anguwe''. ¹⁴ Mpawo nibakasika kuli basikwiiyanyina, bakabona nkamu mpati yakabazyungulikide, abalembi bakali kukazyania aabo. ¹⁵ Lino nibakabona Jesu, makamu woonse akagamba nibakamuchijanina bakamujuzya. ¹⁶ Wakabuzya basikwiiya bakwe, ''Muliikukazyaniaanzi ambabo?'' ¹⁷ Umwi wakalinkamu wakasandula, ''Muyiisyi, ndeeta mwana wangu kulinduwe ulaamuuya umuchitya kuti ataambuuli pe. ¹⁸ Umumana manguzu akumuwunsizya aansi akuzwa fulu mumulomo, ngawayuma ntwiino, akuyuma mubili. Ndakakumbila basikwiiya bako kuti bamugusye pesi bakakachilwa''. ¹⁹ Wakabasandula, ''Nozyalane litasyomi, ndakkala andinywe kwachiindi chillamfu buti? Ndiyoomukazikila moyo kusikila lili? Mumweete ookuno'' ²⁰ Bakamweta mulombe kulinguwe. Kuchiindi muuya nuwakabona Jesu, mpawo aawo wakamuwisya wamugwigwimya. Mulombe wakawida aansi akuzwa fulu mumulomo. ²¹ Jesu wakabuzya wisi, ''Kwaba chiindi chilamfu biyeni kazichitikana?'' Wisi wakati, ''Kuzwa kachili mwanikenike''. ²² Chimuwisizya mumulilo na mumaanzi akweezya kumujaya. Na kokonzya kuchita kufumbwa, tufwide luzyalo utugwasye''. ²³ Jesu wakati kulinguwe, ''Na kosyoma, zyoonse zintu zilakonzeka kuliyooyo usyoma!'' ²⁴ Mpawo wisi wamwana wakalila akwaamba kuti, ''Ndilasyoma! kondigwasya kutasyoma kwangu!'' ²⁵ Jesu naakabona makamu kabachijanina kulimbabo, wakatanda ooyu muuya uusofweede akwaamba kuti, ''nomuuya wasyataambi, amuuya musinkamatwi ndakulayilila akukwaambila kuti, zwa mulinguwe, utazoonjili limbi mulinguwe''. ²⁶ Lyakalila akugwigwimya mulombe akuzwa mulinguwe. Mulombe wakalangika mbuli uufwide, biingi bakati, ''wafwa''. ²⁷ Pesi Jesu wakamujata kuboko wamunyampula mpawo mulombe wakayimikila. ²⁸ Jesu naakasika mung'anda, basikwiiya bakamubuzya chakusisikizya, ''Nkaamboonzi nitwatawutanda?'' ²⁹ Wakati kulimbabo, ''Eezi zyamusyobo ooyu tazitandiki pe, pesi akukomba''. ³⁰ Bakeenda kuzwa awo akwiinda muGalili. Takalikuyanda pe kuti bazibinkane nkubakabede, ³¹ nkaambo wakalikuyiisya basikwiiya bakwe. Wakati kulimbabo, ''Mwana waMuntu uyoopendekezegwa mumaboko aabantu, alimwi bayoomujaya. Aakujayigwa, kuyooyinda mazuba aatatu mpawo uyoobuka lubo kuzwa kubafu. ³² Pesi tebakazimvwisisisya pe nzyakalikwaamba, alimwi bakalikuyoowa kumubuzya. ³³ Mpawo nibakasika kuKkapenawumi. Mpawo naakanjila mung'anda wakababuzya, Mwalikwaambaanzi munzila?'' ³⁴ Pesi bakawumuna. Mbulikuti bakalibuyobukazyania umwi awumwi amweenzinyina kabali munzila aatala akuti ngwani mupati. ³⁵ Naakakkala aansi, wakayita basikwiiya bakwe balikkumi ababili kabali boonse alimwi wakati kulimbabo, ''Na kuli uyanda kuba wakusanguna, weelede kuba wakumaninsizya kuli boonse akuba mulanda waboonse''. ³⁶ Wakabweza mwana muniini wamubika aakati kabo. Wakamubweza akumubika aamakuko aakwe alimwi wakati kulimbabo, ³⁷ ''Kufumbwa utambula mwana ooyu muzina lyangu watambula ndime, kufumbwa ooyo unditambula tatambuli ndime pesi utambula ooyo wakandituma''. ³⁸ Joni wakati, ''Muyiisyi, twabona umwi katanda myuuya mibi munzina lyako alimwi twamukasya, nkaambo tatutobeli pe''. ³⁹ Pesi Jesu wakati, ''Mutamukasyi, mbulikuti taakwe utakachite milimu mipati muzina lyangu kuzwa mpawo akaambuule zibi aatala andime. ⁴⁰ Kufumbwa utatulwani nguwesu. ⁴¹ Kufumbwa ukupa nkomeki yamaanzi kuti unywe muzina lyangu nkaambo uli waKilisito, nchobeni ndamwaambila kuti, takoyooyisweekelwa mpindu yakwe. ⁴² Kufumbwa uchita kuti umwi wabaaba baniini bandisyoma kuti balebwe, kunooli nkubotu kulinguwe kuti aangililwe nkando yebbwe munsingo akuwaalilwa mulwizi. ⁴³ Na kuboko kwako kwakubisizya, kudunsule. Nchibotu kunjila mubwami bwakubotelwa kwiinda kuba amaboko abili pesi waakuwaalilwa mubbibi lyamulilo utazimi. ⁴⁴ ooko nkonye zyabo nkuzitafwi amulilo nkuutazimi. ⁴⁵ Na kuulu kwako kwakuchita kuti ubisye, kudunsule. Nchibotu kunjila mubuumi bwakubotelwa kuli chilema kwiinda kuba amawulu abili pesi waakuwaalilwa mubbibi lyamulilo. ⁴⁶ ooko nkonye zyabo nkuzitafwi amulilo nkuutazimi. ⁴⁷ Na linso lyako lyakuchita kuti ubisye, linonkole. Nchibotu kunjila mubwami bwakujulu alinso limwi kwiinda kuba amenso aabili pesi waakuwaalilwa mubbibi lyamulilo, ⁴⁸ ooko nkonye zyabo nkuzitafwi amulilo nkuutazimi. ⁴⁹ Nkaambo woonse muntu uyoolungwa amulilo. ⁵⁰ Munyo mubotu, pesi na munyo wasampuka, ulachitwa biyeni kuti ulweele lubo? Amulungane aakati kenu nobeni, alimwi mube aalumuno kuli umwi awumwi''.