¹ Aawo Jesu naakalikweenda kuzwa muchikombelo, umwi wabasikwiiya bakwe wakati kuli nguwe, ''Muyiisyi langa mabwe aziyako zigambya!'' ² Wakati kulinguwe, ''Ulizibwene na iziyako zipati eezi? Takwe niliba limwi bbwe litakabule kukolomokela aansi''. ³ Kakkede aachilundu chitegwa chamaOlivi, chilangene aachikombelo, Pita aJemusi aEndulu bakabuzya kavweetwa, ⁴ ''Twambile eezi zintu ziyoochitika lili? Ncheechilii chiyooba chitondeezyo chazintu eezi kuti zyaamba kuchitika?'' ⁵ Jesu wakatalika kubambila, ''Amukachenjele kuti kutakabi uyomwena. ⁶ Bayingi bayoza muzina lyangu kabati, 'Ndime nguwe', pesi bayooyena bayingi. ⁷ Chiindi nimuyoomvwa nkondo antwiintwi zyankondo, mutakalikataazyi; eezi zintu zyeelede kuyoochitika, pesi mamanino anooli kaatanaasika pe. ⁸ Nkaambo chisi chiyoobukilana echisinyina, abwami buyoobukilana abwaminyina. Kuyooba kuzungaana kwamasena mayingi anzala mpati. Eezi matalikilo amachise aakutumbuka. ⁹ Amukalinde. Bayoomupeda kukubetekwa, alimwi muyoowumwa muzikombelo. Muyooyima kunembo lyabeendelezi abami nkaambo kangu, kuti bukabe bukamboni kuli mbabo. ¹⁰ Pesi makani mabotu ayelede kuyookambawukwa kumasi woonse saansi. ¹¹ Baakumwaanga akumupeda, mutakalikatazyi kuti muyotyeni pe. Mulicheecho chiindi nzimutakaambe muyoozipegwa, teensi ndinywe mutanoowambuule pe, nguMuuya Uusalala utanoowambuule mulindinywe. ¹² Mukulana uyoowuzya mwanike kulufu, awisi, mwana wakwe. Bana bayoobukilana abazyali babo bakabatole kulufu. ¹³ Muyoosulwa abantu boonse nkaambo kazina lyangu. Pesi utakajatilile mane kukabe kumamanino, ooyo muntu uyoofutulwa. ¹⁴ Nimuyoobona chisesemyo chalunyonyooko kachiimvwi mpuchiteelede kwiimikila (Ooyo ubala ngamvwisisisye), abanoolimu Judiya abachijile mumalundu, ¹⁵ Ooyo uli aachiluli changanda ataseluki pe kuya mung'anda nikuba kuyootola chintu mukati, ¹⁶ ayooyo uulimumuunda atakabweedi kukutola chisamo. ¹⁷ Pesi maawe kuli babo bamitide abaabo banyoonsya bavwanda mumazuba aayo! ¹⁸ Amukombe kuti eezi zitakachitiki muchiindi chempeyo. ¹⁹ Nkaambo aayo anooli mazuba akupengaana kupati, aatanaabuunsi aba pe, kuzwa kumatalikilo, Leza naakalenga nyika, kusikila lino, nkabela kaatachizoobi limbi pe. ²⁰ Kakutali kuti Mwami wakaafwiinsya mazuba, taakwe muntu walikuzoofutulwa pe. Pesi akaambo kabaabo basale aabo mbaakasala, wakaafwiinsya mazuba. ²¹ Lino na umwi wati kulindinywe, "Amulange, ngoyu Kkilisito!' nakuti "Amulange, nguulya" mutakasyomi pe. ²² Nkaambo kuyooba abaKkilisito bakubeja abasinsimi bakubeja alimwi bayoopa zitondeezyo azigambyo kuchitila kweena, nikuba basale nizyalikukonzeka. ²³ Amukalindile! Ndamwambila zintu zyoonse kunembo lyachiindi. ²⁴ Pesi musule lyamazuba akupenzegwa, zuba liyooba mudima, amweezi tukoyoopa mumuni wawo, ²⁵ Nyenyeezi ziyooloka kuzwa kujulu, aalawo manguzu aalikujulu ayoozungaanisigwa. ²⁶ Alimwi bayoomubona Mwana waMuntu kaza mumayoba amanguzu abulemu. ²⁷ Alimwi uyootuma bangelo bakwe, uyoobungania aamwi basale bakwe kuzwa kumabazu one, kuzwa kumamanino anyika kusika kumamanino aajulu. ²⁸ Amwiiye chiiyo kuzwa kumukuyu. Mwabona ntabi zyasyuka, mwaziba kuti miinza aswena. ²⁹ Mbuboobo, mwabona zintu eezi kaziliikuchitika, muzibe kuti waswena, waba afwiifwi amilyango. ³⁰ Nchobeni, ndamwaambila kuti, eeli zyalane talikoyooyinda pe eezi zintu kazitanaachitika. ³¹ Ijulu anyika ziyooyinda, pesi majwi angu takoyooyinda pe. ³² Pesi buzuba oobo nichiba achiindi, takwe muntu uzi, nikuba bangelo kujulu, nikuba Mwana, kunze kwaTaata. ³³ Muchenjele! Mulinde, nkaambo tamuchizi pe chiindi eecho. ³⁴ Zilimbuli muntu wabweza lweendo, wasiya wabika ng'anda yakwe mumaanza aabalanda bakwe kuti bayibambe, umwi awumwi aamulimu wakwe, wabaambila balinda ng'anda kuti batawoni. ³⁵ Aboobo amuchenjele nkaambo tamuzi pe kuti nchiindiinzi simalelo wang'anda naboola; zilakonzya kuba goko, na aakati kabusiku na mukuku naalila, na nibwacha. ³⁶ Na kuti asike mpawawo, atakajani kamuliikoona. ³⁷ Nzemwaambila nzengambila kumuntu woonse kuti: Linda!''