¹ Mpawo wakasanguna kubaambila maambila mbali wakati, “Mwaalumi umwi wakabyala misamu yamisansa. Wakayakila lubaya aalinjiyo, wakasya dindi lyakudinina masansa, akuyaka ngaze yasikulinda. Alimwi wakajana bupa bamwi balimi mpawo wakaya kuchisi chimbi. ² Muchiindi chakutebula wakatuma umwi wababelesi bakwe kuyoobweza michelo yamasansa. ³ Pesi balimi abo bakakumujata, akumuma, akumwaanda kakutakwe nchaakabweda aacho pe. ⁴ Wakatuma uumbi mubelesi; ooyo mwaalumi bakamutulula mumutwe akumusampawula. Wakatuma uumbi, alubo ooyo bakakumujaya. ⁵ Wakatuma bambi biingi; bamwi bakawumwa, bamwi bakajayigwa. ⁶ Kwakasyaala omwe biyo wakutuma, kali mwana ngwaakali kuyandisya kapati. Wakamutuma kali wakumaninsizya, wakati, "Bayoomulemeka mwana wangu." ⁷ Pesi balimi bakaambilana kuti, "Ooyu ngusimulya lukono. muze tumujaye, mpawo lukono luyooba lwesu." ⁸ Bakamuvumpila akumujaya, akumuwaalila aanze aamuunda wamisansa. ⁹ Aboobo ulachita buti mwanimuunda? Ulasika akujaya balimi, akape bambi muunda wamisansa. ¹⁰ Tamunaakwaabala na malembe?: ""Ibbwe lyakasowedwe abasikuyaka ndilyakazooba bbwe lyachooko. ¹¹ Mwami nguwakachichita eechi, mpawo chilabotezya kumenso eesu?’ ” ¹² Eelyo bakayanduula nzila yakumwaanga aayo nkaambo bakaziba kuti wakali kwaamba mbabo kumaambila mbali aaya. Pesi bakayoowa nkamu yabantu yakaliwo, nkikaako bakamusiya mpawo bakeenda. ¹³ Muchiindi chitobela bakatuma bamwi babaFalisi abaHelodi kuliJesu kuti bakamuteya mumakani aakwe. ¹⁴ Bakasika kulinguwe bakati, “Muyiisyi, tulizi kuti ulimwaalumi ulaabulemu usyomekede. Topenzegwi abantu, nkaambo toswiilizyi makani aamuntu na kulanga chiwa chamuntu; pesi uyiisya nzila yaLeza mbuli mbiibede amubwini. Chileelede na kutela kuliSiza na peepe? Tweelede kuti tuliye na, nanka peepe?” ¹⁵ Pesi Jesu wakalizi kuupawupa kwabo, wati kulimbabo, “Kaamboonzi nimuliikweezya kunditeya?”, “Amundeetele kobili lyenu ndiibone mbulibede.” ¹⁶ Bakalyeeta kobili, alimwi wakababuzya kuti, “Mbubwani busyu oobu? Alimwi ndizina lyani lilembedwe mpawo?” Bakasandula kuti, “NzizyaSiza.” ¹⁷ Mpawo Jesu wakati kulimbabo, “Amupe Siza zyaSiza, alimwi mupe Leza zyaLeza.” Bakagamba aatala anguwe. ¹⁸ Mpawo ba Saduki, baamba kuti takwe bubuke, bakaza kulinguwe amubuzyo. Bakati, ¹⁹ “Muyiisyi, Mozesi wakatulembela kuti, 'Na mukulana wamulumi wafwa mpawo wasiya mwanakazi kabatakwe bana, ooyo mwaalumi weelede kukwata mukamufu mpawo azyalile mukulana." ²⁰ Kwakali bana bachaalumi bali musanu ababili. Mutaanzi wakakwata mpawo wakafwa katasiide mwana naba womwe. ²¹ Wachibili wakamukwata mukamufu, pesi alakwe wakafwa katasiide mwana. Chakaba mbubo akuli watatu. ²² Tawope akati kababa bali musanu ababili wakasiya mwana. Kumamanino, alakwe mwanakazi wakafwa. ²³ Kububuke bwabafu, ooyu mwanakazi uyooba wani? Mbukunga boonse kabali musanu abatatu bakalimukwete." ²⁴ Jesu wakasandula kuti, “Teensi nchicho na chimupede kusweeka, nkaambo tamwaazi pe malembe niziba nguzu zyaLeza?" ²⁵ Akuti bafu nibayoobuka, tabakoyookwata nikuba kukwatanisigwa; bayooba mbuli bangelo kujulu. ²⁶ Lino mukwaamba aatala abafu nibayoobuka temwakabala na muBbuku lyaMozesi, kuli zeezyo zyakachitika kuchiteyo, Leza mbakaambula kulinguwe kati, ‘Ndime Leza waAbbulamu, Leza waAyizeki, alubo Leza waJekkobbu?' ²⁷ Tali Leza wabafwide pe, ngwabawumi. Musweekede loko.” ²⁸ Umwi wabayisyi bamulawo naakasika wakamvwa kabakazyania, kabwene kuti Jesu wakali wabapa nsandulo mbotu, wakabuzya Jesu kuti, “Nguuli mulawo mupati kwiinda imwi akati kamilawo yoonse?” Jesu wakamusandula kuti, ²⁹ “Ngooyu: ‘Amuswiilile, nobanaIzilayeli, Mwami Leza wesu, Mwami ngumwi. ³⁰ Yanda Mwami Leza wako amoyo wako woonse, akanzimwe kako koonse, amizeezo yako yoonse, mpawo amanguzu aako woonse.’ Wabili ngooyu: ³¹ ‘Yanda simayakilane wako mbuli mboliyanda.’ Tawuwo pe mulawo mupati wiinda eeyi.” ³² Ooyu mwaalumi wakasandula kuti, “Waamba kabotu muyiisyi, waamba kabotu kuti Leza ngumwi alubo takukwe umbi kunze kwakwe alike. ³³ Kumuyanda amoyo wako woonse, akumvwisisisya kwako alubo amanguzu aako woonse, mpawo akuyanda simayakilane wako mbuli mboliyanda nkubotu loko kwiinda zipayizyo.” ³⁴ Lino Jesu naakabona kuti wasandula chabusongo, wakati kulinguwe, “Tolikule pe aBwami bwaLeza.” Eelyo kuzwa aawo tawope naba omwe wakeezya kumubuzya iimbi mibuzyo. ³⁵ Jesu kaliikuyiisya mulubuwa lwachikombelo, wakabuzya mubuzyo wakati, “Nkamboonzi bayiisi bamulawo nibati Kkilisito mwana waDeviti? ³⁶ Deviti lwakwe, kali muMuuya Uusalala, wakachaamba antanganana wakati: "Mwami wakati kuMwami wangu, kkala kukuboko kwachilisyo kwangu kusikila basinkondonyokwe ndibabike kunsi amawulu aako." ³⁷ We lwakwe Deviti umwiita kuti ‘Mwami.’ Ani nga ulaba mwana wakwe biyeni?” Inkamu yabantu mpati yakamuswiilizya chakubotelwa. ³⁸ Mukuyiisya kwakwe Jesu wakati, “Amubachenjelele bayiisyi bamulawo, balayandisya kusama magubo malamfu akujuzigwa kumasambalilo, ³⁹ akupegwa zyuuno zyabalemekwa mumambungano akulemekwa kapati aabungene bantu. ⁴⁰ Balanyonyoona maanda abamukabafu kabakomba ankombyo ndamfu chakweebwa. Aaba bantu bayoopegwa chisubulo chipati.” ⁴¹ Jesu wakakkala kumbali lyachiyoobwedo chazituuzyo mung'anda yaLeza; bantu nibakalikuwaala mali muchiyobweedo. Bavubi biingi bakalikuwaala mali nyingi. ⁴² Pesi mukamufu muchete wakabika biyo tupeni tobile, tweelene aaseleni lyomwe. ⁴³ Lino wakayita basikwiiya bakwe, wakati, Ndiikumwaambila kasimpe kuti, ooyu mukamufu wabika kwiinda boonse muchiyobwedo. ⁴⁴ Boonse bapa kuzwa mubuvule bwabuvubi bwabo, pesi ooyu mukamufu, wabika zyoonse nzyaalangilide mubuumi bwakwe kuti apone anzizyo.”