¹ Nibakasika kuJelusalemu kabali aafwiifwi akuBbetipeji aBbetani akuChilundu chitegwa chamaOlivi, Jesu wakatuma basikwiiya bakwe bobile, ² wakati kuli mbabo, “Amwiinke kugunzi lilikunembo lyenu. Mbumutakanjile biyo, muyoojana mwana wedonki waangidwe nkuko, utanaabelesegwa anaba womwe muntu. Mukamwaangunune mumweete okuno. ³ Na kwaba uyoomubuzya kuti, "Muzichitilaanzi eezi"? mukamwaambile kuti, ‘Mwami nguulikumuyanda mpawo ulamuboozya aano muchiindi chifwiifwi.” ⁴ Bakayinka baakumujana mwana wedonki ulaangidwe kumbali aamulyango, kumanjililo aamuunzi mpawo bakamwaangununa. ⁵ Bamwi bantu bakayimvwi mpawo bakabuzya kuti, “Muchitaanzi, nimwaangununa mwana wedonki ooyu?” ⁶ Bakasandula mbuli Jesu mbaakabaambilide, mpawo bantu bakabazumizya kuti beende. ⁷ Nibakamweeta mwana wedonki kuliJesu bakayala majansi amusana wakwe mpawo Jesu wakatanta wakkala aalinguwe. ⁸ Bantu biingi bakayala milembo yabo mumugwagwa, bamwi bakayala matu ngibakatemede mumyuunda. ⁹ Bakazulwide abakalimusule bakoompolola kabati, “Hhossana! Ulilongezezegwe ooyo uuza muzina lyaMwami. ¹⁰ Bulilongezegegwe bwami buyoobuza bwataata wesu Deviti! Hhossana mujulu lyamajulu!” ¹¹ Jesu wakanjila muJelusalema akwiinka kuChikombelo, wakalangalanga zyoonse. Lino lyakali lyaba goko mpawo wakayinka kuBbetani abalikkumi aababili. ¹² Buzuba butobela nibakaboola kuzwa ku Bbetani, wakali waba aanzala. ¹³ Mukubona mukuyu amatu aawo chakule, wakayinka kuyoobona kuti ulaamichelo na. Naakasika afwiifwi wabona matu luzutu kakutakwe michelo pe, nkaambo teensi chakali chiindi chankuyu pe. ¹⁴ Eelyo wakaambila mukuyu kuti, “Taakwe utazoolye muchelo lubo pe kulinduwe.” Basikwiiya baakwe bakamumvwa kaawamba majwi aayo. ¹⁵ Bakasika muJelusalema, mpawo wakanjila muchikombelo wakatalika kwaandingania bakalikuula akuuzya mukati. Wakatonta matebuli aabasimuchincha mali ezyuuno zyabaabo bakalikuuzya nkwilimba. ¹⁶ Mpawo taakwe naakazumizya pe naba omwe kuti anjile aachikonzya kuuzigwa, mulubaya lwachikombelo. ¹⁷ Mpawo naakabayiisya wakati, “Tachilembedwe na kuti: `Ng'anda yangu iyootegwa ning'anda yakukombela kwamanyika woonse’? Pesi nywebo mwayichita ng'anda yabasikubba.” ¹⁸ Bapati babapayizi abasimilawo bakaamvwa makani aaya eelyo bakayanduula nzila yakumujaya aayo. Bakalikumuyoowa nkaambo nkamu yoonse yakagambisigwa enjiisyo yakwe. ¹⁹ Nilyakaba goko, bakazwa mudolopo. ²⁰ Chifumofumo kabayobweenda, bakabona mukuyu kuuyumide kuzwa kumiyanda. ²¹ Pita wakayeeya mpawo wakati kuli Jesu, “Muyisi wangu langa! Mukuyu nguwakatuka wayuma!” ²² Jesu wakasandula kuti, “Amube aalusyomo muli Leza. ²³ Ndimwaambila kasimpe kuti, na umwi wati kuchilundu, "Koya ukaliwaalile mulwizi,’ katadoneeki mumoyo wakwe pesi kasyoma kuti eezyo nzyawamba ziyoochitika, nzenzizyo Leza nzyatakachite. ²⁴ Nkikaako ndamwaambila kuti: Kufumbwa nchimuyookumbila mukukomba, amusyome kuti muyoochijana, mpawo chiyooba chanu. ²⁵ Mpawo na wayimikila kokomba, na kowangilide uumwi moyo, mulekelele, nkokuti Wuso wako ulikujulu akulekelele zibi zyako. ²⁶ [“Nkaambo na nywebo kamutalekeleli bantu bali aamilandu kulindinywe, alakwe Wuso uulikujulu takoyoomulekelela pe milandu yenu”.] ²⁷ Bakasika lubo kuJelusama. Eelyo Jesu naakayobweenda mulubuwa lwachikombelo, bapayizi bapati, abalembi abapati bembungano bakaza kulinguwe. ²⁸ Bakati, “Uzichita aanguzuunzi eezi zintu, alimwi ngwani ukupa nguzu zyakuzichita?”. ²⁹ Jesu wakasandula kuti, “Ndilabuzya mubuzyo womwe. Mundisandule, mpawo ndiyoomwaambila kuti muunguzu zyani mwendiikuchita zintu eezi. ³⁰ Lubbabbatizyo lwaJohani, lwakalikuzwa kujulu na, nanka lwakazwa kumuntu? Mundisandule!” ³¹ Bakayizya aatala amakani aaya mpawo bakakazyania bati, “Twaamba kuti, ‘Luzwa kuzulu,’ ulatubuzya kuti 'Nkamboonzi nimutamusyomi?’ ³² Twaamba kuti, 'Luzwa kumuntu’....”, bakayoowa bantu nkaambo muntu woonse wakalizi kuti Joni musinsimi mwinimwini. ³³ Mpawo bakasandula Jesu kuti "Tatuzi pe." Mpawo Jesu wakabaambila kuti, “Ambebo nsikoomwaambila pe kuti manguzu aani ngechita aawo zintu eezi”.