¹ Jesu naakazwa kubusena oobo wakaya kuchisi chakuJudiya akubusena bwamutala aamulonga Jodani, alimwi bantu biingi bakaza lubo kulinguwe. Wakali kubayiisya lubo, mbuli mbaakali kuchita lubbe. ² Mpawo baFalisi bakaza kulinguwe kuzoomusunka alimwi bakamubuzya kuti, ''Chili mumulawu na kuti mwaalumi aleke banakwe?'' Wakabasandula wati, ³ ''Wakamulayililaanzi Mozesi?'' ⁴ Bakati, ''Mozesi wakazuminina mwaalumi kulemba lugwalo lwakulekana alimwi akumubweedezya kulimbabo''. ⁵ ''Nkuyuma kwamyoyo yenu chakapa kuti alembe mulawo ooyu'', Jesu wakabaambila kuti. ⁶ ''Pesi kuzwa kumatalikilo aakulenga, 'Leza wakabalenga, mwaalumi amwanakazi". ⁷ ''Akaambo kaako mwaalumi uyoosiya wisi abanyina akakamantane abanakwe, ⁸ alimwi bobile bayooba nyama yomwe! Aboobo tabachili bobile pe, baba nyama yomwe''. ⁹ Aboobo Leza nzyaaswaanizya antoomwe, kutakabi muntu uzyaanzania pe''. ¹⁰ Aawo nibakali mung'anda, basikwiiya bakamubuzya lubo aatala achechi. ¹¹ Wakati kulimbabo, ''Kufumbwa uuleka mwanakazi akukwata umbi walichita mumambi akubisizya ngwaaleka. ¹² Na mukayintu waleka mulumi wakwe wakwatwa awumbi mwaalumi, wachita bumambi''. ¹³ Mpawo bakamweetela bana babo baniini kuti abagume, pesi basikwiiya bakabakalalila. ¹⁴ Pesi Jesu naakazibona, teezyakamubotezya pe alimwi wakati kulimbabo, ''Muzumizye bana baze kulindime, mutabakasyi, nkaambo bwami bwaLeza mbubwabo baliboobo. ¹⁵ Chakasimpe ndamwaambila kuti, kufumbwa muntu utatambuli bwami bwaLeza mbuli mwana muniini takonzyi kuyoobunjila pe''. ¹⁶ Mpawo wakabanyampula bana alimwi wabalongezya akubika maanza akwe aalimbabo. ¹⁷ Naakatalisya lweendo lwakwe, umwi mwaalumi wakachijaana wazoofugama kunembo lyakwe alimwi wabuzya, ''Muyiisyi mubotu, ndichite buti kuti ndikajane buumi butamani?'' ¹⁸ Jesu wakati, ''Nkaamboonzi nonditi "mubotu"? Tawo pe mubotu naba omwe kunze kwaLeza alike. ¹⁹ Uliizi milawo: 'Utajayi, utachiti bumambi, utabbi, utabejelezyi umwi, utabbi chakweenena, lemeka uso abanyoko.'' ²⁰ Mwaalumi wakati, ''Muyiisyi, zyoonse eezi zintu ndakazitobelezya kuzwa kandichili mukubusi''. ²¹ Jesu wakamulanga alimwi wamuyanda. Wakati kulinguwe, ''Uchisyeede aachintu chomwe. Weelede kuuzya zyoonse nzoli aazyo alimwi upe kubachete, eelyo uyoojana buvubi kujulu. Mpawo usike, unditobele''. ²² Pesi akaambo kamakani aaya wakawusa kapati alimwi wakayinka kawuside, nkaambo wakavubide loko. ²³ Jesu wakalangalanga mpawo wakati kulibasikwiiya bakwe, ''Nchiyumu buti kubavubi kunjila mubwami bwaLeza!'' ²⁴ Basikwiiya bakagamba kumajwi akwe. ²⁵ Pesi Jesu wakabaambila lubo, ''Nobana, nchuuba kuti nkamela yiinde mumpako yenaliti kwiinda muvubi kuti anjile mubwami bwaLeza''. ²⁶ Bakagamba kapati alimwi baambilana kuti, ''Ngwani unga ulakonzya kufutulwa?'' ²⁷ Jesu wakabalanga alimwi wati, ''Kubantu tachikonzeki, pesi kuliLeza chilakonzeka. Nkaambo zintu zyoonse zilakonzeka aLeza''. ²⁸ Pita wakatalika kwaambuula kulinguwe, ''Bona, twasiya zyoonse twakutobela''. ²⁹ Jesu wakati, ''Nchobeni ndamwaambila, taakwe pe wasiya ng'anda na banyandumi na bachizi na banyina na bana na myuunda akaambo kangu alimwi akaambo kamakani mabotu, ³⁰ uutakabule kutambula zyiindulwidwe mwaanda munyika oomuno lino: ng'anda abanyandumi abachizi amamama abana asmyuunda, antoomwe akupenzegwa, mpawo munyika iitobela, buumi butamani. ³¹ Pesi biingi balikumatangunino bayooba bakumamanino, mpawo bakumamanino, bataanzi''. ³² Bakali mumugwagwa kabatansya kuJelusalema, Jesu kazulwide . Basikwiiya bakagamba, alimwi abaabo bakali kutobela musule bakayoowa. Mpawo Jesu wakabweza bali kkumi ababili wabatola kumbali alubo watalika kubaambila zizoochitikana kulinguwe kuchiindi chitobela afwiifwi. ³³ ''Amubone, tuyobutansya kuJelusalema, alimwi Mwana waMuntu uyoowabwa kubapayizi bapati abalembi. Bayoomupa mulandu walufu akumwaaba kulibamasi. ³⁴ Bayoomusyonsya, bayoomuswida mate, bayoomuuma, alimwi bakamujaye. Pesi kwiinda mazuba aatatu uyoobuka". ³⁵ Jemusi aJoni, bana baZebbedi, bakaza kulinguwe bati, ''Muyiisyi, tuyanda kuti mutuchitile kufumbwa nzituyoomukumbila''. ³⁶ Wakati kulimbabo, ''Niinzi nchimuyanda kuti ndikamuchitile?'' ³⁷ Bakati, ''Tuzumizye kuti tukakkale anduwe mubulemu bwako, umwi kuchilisyo umwi kuchimweensi.'' ³⁸ Pesi Jesu wakabasandula, ''Tamuchizi nchimuliikukumbila pe. Mulakonzya na kunywa nkomeki njesikanywe na kukakatila kulubbizyo ndwesikabbizigwe aalo?'' ³⁹ Bakati kulinguwe, ''Tulakonzya.'' Jesu wakati kulimbabo, ''Nkomeki njesikanywe, muyooyinywa, alimwi lubbizyo ndwesikabbizigwe aalo, anywebo muyolubbizigwa. ⁴⁰ Pesi kuti utakakkale kuchilisyo na kuchimweensi ngwani teensi ndime uuzyaamba pe, pesi nkukwabaabo bakubambilidwe.'' ⁴¹ Aawo bamwi balikkumi nibakamvwa eecho, bakatalika kunyemena Jemusi aJoni. ⁴² Jesu wakabayita kulinguwe wati, ''Mulizi aabo baambwa kuti mbeendelezi babamasi balabalemezya, alimwi basilutwe babo balatondeezya manguzu aabo alimbabo. ⁴³ Pesi tazikoyooba mbubo pe akati kenu. Kufumbwa uuyanda kuba mupati akati kenu weelede kuba mulanda wenu, ⁴⁴ alimwi kufumbwa uuyanda kuba mutanzi akati kenu weelede kuba muzike waboonse ⁴⁵ Nkaambo Mwana waMuntu taakazida kuzookutawukilwa pe, pesi kuzookutawukila, alimwi akupa buumi bwakwe kuti azoowangunune biingi.'' ⁴⁶ Bakasika kuJelikko. Kachizwa muJelikko abasikwiiya bakwe ankamu mpati, mwana waTimiyasi, Bbatimiyasi, moofu sikukumbila, wakalikkede kumbali amugwagwa. ⁴⁷ Naakamvwa kuti nguJesu muNazalini, wakatalika koompolola wati, ''Jesu Mwana waDeviti, ndifwide luzyalo!'' ⁴⁸ Biingi bakamuniakiizya mwaalumi moofu, bamwaambila kuti awumune. Pesi wakompolola changuzu, ''Mwana waDeviti, ndifwide luzyalo!'' ⁴⁹ Jesu wakayimikila alimwi wabalayilila kuti bamwiite. Bakamwiita mwaalumi moofu, bati, ''Sima! Nyampuka! Uliikukwiita.'' ⁵⁰ Wakasowela aansi chikobela chakwe, wavundumuka alimwi wasika kuliJesu. ⁵¹ Jesu wakamusandula wati, ''Niinzi nchuyanda kuti ndikuchitile?'' Mwaalumi moofu wakati, ''Muyiisyi ndiyanda kubona.'' ⁵² Mpawo Jesu wakati kulinguwe, ''Koya. Lusyomo lwako lwakuponia.'' Mpawo aawo wakabona lubo, alimwi wakamutobela mumugwagwa.