¹ Lino nikwaba kuseni, boonse bapayizi bapati abapati babantu bakalangula inzila mbubanga balamubika kulufu Jesu. ² Bakamwaanga, akumutola aanze, akumusisya kuli Payileti mwendelezi. ³ Mpawo Judasi, wakamuuzya, nakabona kuti Jesu wapegwa mulandu, wakasanduka akujosya mali yansiliva ili makumi atatu kubapayizi bapati akuzuluzi, ⁴ alimwi wakati ndabisya akwaaba bulowa butakwe mulandu. Pesi bakati, ''Niinzi echo kulindiswe ? Libonene olikke.'' ⁵ Mpawo wakasowela aansi tumpanzi twansiliva mungánda ya Leza, akwinka, alimwi wakaya anze wakulisina. ⁶ Mupayizi mupati wakatubweza tupanzi twansiliva akwamba kuti, ''tachili mumulawu pe kuti eechi chibikwe muchiyobwedo nkambo muulo wabulowa.'' ⁷ Bakambuuzyania antoomwe, alimwi bakawula muunda wamubumbi muzikkilwa beenzu. ⁸ Nkambo kacheechi, oyo muunda wakategwa, ''Muunda wabulowa.'' kusika lino. ⁹ Mpawo echo chakambidwe amusinsimi Jelemiya chakazuzikizigwa, chaamba kuti, ''Bakabweza tumpanzi tulimakumi ataatu twansiliva, muulo wakabamba abana ba Izilayeli, ¹⁰ alimwi bakawupa kuti muunda wamubumbi, mbuli Mwami mbakandilayilila. ¹¹ Lino Jesu wakayimikila kunembo lyamwendelezi, alimwi mwendelezi wakamubuzya, ''Uli Mwami waba -Juda na ?'' Jesu wakavwila kuti, ''wamba mbubo.'' ¹² Pesi nakatamikizigwa amupayizi mupati abapati, takwepe nakasandula. ¹³ Mpawo Payileti wakamwambila kuti, ''Sa totumvwide twambo ntubalo kukutamikizya?'' ¹⁴ Pesi takwe nakasandula niliba ijwi lyomwe, awo mwendelezi wakagamba kapati. ¹⁵ Lino kupobwe mbuli bwakali mulawu wamwendelezi kuti bagwisye umwi mwaange wasaluzigwa abantu. ¹⁶ Kuchindi eecho kwakali mwaange wakale mpewo utegwa Bbalabbasi. ¹⁷ Lino nibakabungana antomwe Payileti wakabambila kuti, ''ngwani ngumuyanda kuti ndimwangunwide ? Bbalabbasi na Jesu utegwa ngu Kkilisito ?'' ¹⁸ Wakalizi kuti bapeda Jesu kulinguwe nkambo kakwemuzya. ¹⁹ Awo nakakkede achuuno chabbetekelo, mwanakazi wakwe wakamutumina ijwi elyo lyakati, ''utachiti chintu kumwalumi oyo utakwe kaambo. Nkambo ndakatazigwa loko sunu nkambo kaziloto nzindalota atala anguwe.'' ²⁰ Lino bapayizi bapati abendelezi bakasungilizya makamu abantu kuti bakumbile Bbalabbasi, akupegwa Jesu kuti akajiigwe. ²¹ Mwendelezi wakababuzya kuti, ''Nguuli akati kababili ngumuyanda kuti ndimwangunwide ?'' bakaamba kuti, ''Bbalabbasi.'' ²² Payileti wakababuzya kuti niinzi nchinjelede kuchitila Jesu utegwa ngu Kkilisito ? Bakamuvwiila boonse bakati, Ngagankaminwe.'' ²³ Mpawo wakamba kuti, ''Nkambonzi, mbubiinzi mbwaachita ?'' Pesi bakompololesya kapati, ''Mumugankamine.'' ²⁴ Lino Payileti nakabona kuti takwe chintu nchakali wajana, pesi kuti kunyongana kwakali kwatalika, wakabweza maanzi wasamba maboko kunembo lyamakamu abantu, akubambila kuti, tandikwe pe mulandu kubulowa bwamwalumi oyu. Amulibonene lwenu.'' ²⁵ Boonse bantu bakati, ''Mbubo bulowa bwakwe abube kulindiswe abana besu.'' ²⁶ Mpawo wakabaangunwida Bbalabbasi, pesi wakawuma Jesu achimboko akumupeda kulimbabo kuti akagankaminwe. ²⁷ Mpawo basilumamba abeendelezi bakabweza Jesu akumutola mukati kangánda yabwendelelezi bapati akubungania nkamu mpati yoonse yabasilumamba. ²⁸ Bakamuzwatununa akumusamika bbaki lisalalisya. ²⁹ Bakaluka musini wamvwa akumuzwatika amutwe wakwe, akumubika mufunko kukuboko kwakwe kwalulyo. Bakafugama aansi kunembo lyakwe akumuniaka, kabamba kuti, ''Mwalemekwa Mwami waba Juda !'' ³⁰ Bakamuswida mate, alimwi bakabweza mufunko akumuuma mumutwe kabalokwindulula. ³¹ Lino nibakamuniaka, bakamuzwatununa bbaki lyabo akumuzwatika zisamo zyakwe, akumutola kuyomugankamina. ³² Awo nibakazwa aanze, bakajana mwalumi uzwa ku Sayilini utegwa Sayimoni, ngubakaangila kuti beende aamwi kuti anyumpule chiingano chakwe. ³³ Bakasika kubusena butegwa Gologota, kachamba kuti, ''Mbusena bwatupepe twamitwe.'' ³⁴ Bakamupa wayini uvwelene andulwe kuti anywe. Pesi nakalabila wakakaka kunywa. ³⁵ Lino nibaka mugankamina, bakabaana zyakusama zyakwe akuuma chisolo, ³⁶ alimwi bakakkala ani kabali kumulinda. ³⁷ Atala amutwe wakwe bakabikka bulembo bumubeteka, bwamba kuti, ''Ooyu ngu Jesu Mwami waba Juda.'' ³⁸ Kwakali basikubba bobile mbakagankaminwa aabo, umwi kuchimweensi aumwi kuchilisyo chakwe. ³⁹ Aabo bakali kwinda enzila bakali kumutukila, kabatikinia mitwe yabo ⁴⁰ kabamba kuti, ''Iwe nuyomwaya ngánda ya Leza akwiyakulula mumazuba ataatu, lifutule omwini ! do kuli Mwan a Leza, seluka achingano aawo !'' ⁴¹ Munzila ikozyenie abalabo bapayizi bapati bakali kumuniaka kabala balembi abapati kabamba kuti, ⁴² wakali kufutula bamwi, pesi we takonzyi pe kulifutula. Ngu Mwami wa Izilayeli. Ngaseluke aachingano, alimwi tuyomusyoma. ⁴³ Wakali kusyoma Leza, Leza ngamuvune lino, na Leza kayanda kumwangununa. Nkaambo wakali kwamba kuti ndimwana a Leza.'' ⁴⁴ Munzila ikozyenie abalabo basikubba mbakagankamidwe aabo abalabo bakamutukila. ⁴⁵ Lino kuzwa kuchindi chahola lamusanu alimwi mudima wakasikila nyika yoonse kuyosika kuhola lyamusanu aane. ⁴⁶ Nichakaba chiindi chamusanu mwaane, Jesu wakoompolola ejwi pati kaamba kuti, Eli, Eli, lama, sabakkatani ?'' Kazyamba kuti, Leza wangu Leza wangu, nkambonzi niwandisiya?'' ⁴⁷ Lino abo bakiimvwi mpawo bakazimvwa, bakaamba kuti, ''ulikwiita Elayija.'' ⁴⁸ Mpawo umwi wakachijana akuyobweza nsisa akwizuzya awayini ulwela, wakisekka kumufunko, elyo wakamupa kuti ayinywe ⁴⁹ Bayingi boonse bakati, mumuleke alikke, Tumubone na Elayija uleza na kuzomufutula.'' ⁵⁰ Mpawo Jesu wakalila lubo ajwi pati elyo wakapa muuya wakwe. ⁵¹ Amubone, chisitilizyo changánda ya Leza chakanduka muzimpanzi zibili kuzwa kujulu kusika aansi, anyika yakandendema, amabwe akaanduka. ⁵² Tubanda twakavunuka, amibili yabasalali bakali boona yakabusigwa, ⁵³ Bakazwa mutubanda musule lyakubuka kwakwe, bakanjila mugunzi lisalala, akuboneka kubayingi. ⁵⁴ Lino silumamba mupati abaabo bakali kulinda Jesu bakawubona muzuzumo azintu zyakachitika, bakayoowa baamba kuti, ''Chamasimpe ooyu wali Mwana a Leza.'' ⁵⁵ Banakazi biingi bakali batobela Jesu kuzwa ku Galili kuti bamukutawukile bakali kulanga alaale. ⁵⁶ Akati kabo kwakali Meli Magadalini, Meli banyina ba Jemusi a Jozefa, abanyina babana ba Zebbedi. ⁵⁷ Lino nilyakaba goko, kwakasika mwalumi uzwa ku Alimatiya, utegwa Jozefu, wakali sikwiiya wa Jesu. ⁵⁸ Wakayinka kuli Payileti akuyokumbila mutunta wa Jesu. Mpawo Payileti wakalayilila kuti awupegwe. ⁵⁹ Jozefu wakabweza mutunta, wamuzambilila mulembo utenteema, ⁶⁰ wakulazika mukabanda kakwe kapya nkakali wafokola mubbwe. Mpawo waka kkunkulisya ibbwe pati wasinka amulyango wenda. ⁶¹ Meli Magadalini amumwi Meli bakaliwo, bakalikkede kulubazu lyakabanda. ⁶² Buzuba bwakatobela bwakali buzuba bwinda bwakulibambila, bapayizi bapati abaFalisi bakali bungene antomwe a Payileti. ⁶³ Bakali kwamba kuti, ''Mwami, tuchiyeeya ulya silweno nakachili kupona, wakaamba kuti, ''kwinda mazuba ataatu ndiyobuka alubo.' ⁶⁴ Nkinkaako layilila kuti kabanda kakwe kalindwe kusikila kubuzuba bwatatu. Chimwi chindi ulabona basikwiya bakwe basika bazomubba akwambila bantu, 'Kuti wabuka kuzwa kubafu.'Alweeno lwakumamanino ngalulayinda lwakusanguna.'' ⁶⁵ Payileti wakabambila kuti, ''mwinke mukalinde mbuli mbumukonzya.'' ⁶⁶ Mpawo bakiinka akuyochita kuti kabanda kalindwe, bakazilulula abbwe akubikka basikulinda.