¹ Mpawo Jobbu wakasandula akwamba kuti, ² ''Ndizi kasimpe kuti eezi mbubo. Pesi biyeni muntu mpanga ulaba mubululami a Leza? ³ Kuti kayanda kukazyania a Leza, takonzyi pe kumusandula muzyiindi zili chuulu. ⁴ Leza musongo mumoyo alimwi mupati kampatila munguzu; Ngwani wakali waliyumya lwakwe aatala anguwe mpawo wazwidilila? -- ⁵ Nguwe ooyo ugwisya zilundu kaatakwe ngwachenjezya naba umwi muntu eelyo ulazisanduula mukunyema kwakwe-- ⁶ nguwe oyo ukankamya nyika kuzwa mubusena alimwi akuchitya zyigwasizye kuti zikankame. ⁷ Ngonguwe Leza ukozyenie ooyo ubuzya zuba kuti talizwi, alimwi talizwi pe alimwi ooyo uvumba nyenyezi, ⁸ Ooyo alikke utalamuna majulu akulyatwida aansi mayuwe amulwizi, ⁹ oyo uchita banyama beenda mulongo, ba Oliyoni, anyenyezi inyingi zyakumusanza. ¹⁰ Uchita zintu zipati zitatobezeki, azintu zyiingi zigambya eezyo zitakonzyi kubalika. ¹¹ Boona, ulenda andime alimwi nsimuboni pe; ulinda alubo pesi nsikonzyi pe kuti mubone. ¹² Kuti watola chintu chimwi kule, ngwaani ukonzya kumwikizya? Ngwani ukonzya kwaamba kuti kuli nguwe, Úchitayi?' ¹³ Leza takogwisigwa pe bukali bwakwe; bagwasyi ba Lahabbu bayovundaama munsi lyakwe. ¹⁴ Mubuche buli biyeni mbunkonzya kumusandula, nkonzye na kusalula majwi akwambuula awe? ¹⁵ Nikuba kuti ndali luleme, tendali kukonzya pe kumusandula. Ndali kukumbila luzyalo kupela amubetesi wangu. ¹⁶ Nikuba ndamwita alimwi wandivwila, tendali kuswilizya kujwi lyangu. ¹⁷ Nkambo ulandityola mukunyema kwakwe akuvuzya zilonda zyangu kaatakwe kambo. ¹⁸ Tandizumizye pe kuti mbukulusye kuyooya kwangu; pesi ulandizuzya alunyemo. ¹⁹ Kuti kakuli makani anguzu, Langa, Mupati kampatila! Kuti kakuli makani abubotu , ngwani ukonzya kumwiita? ²⁰ Nikuba kuti ndiluleme, mulomo wangu uyondisola; alimwi nikuba kuti nsikwe chibi, majwi angu ayondochitya kuti nkabe amulandu. ²¹ Nsikwe chibi pe, pesi tandikwe ndaaba pe nikuba lili atala andime; Ndilanyansya buumi bwangu ndemwini. ²² Tazichiti musiyano pe, nchenchicho nchingamba kuti ulajaya bantu batakwe zibi abalazibi aamwi. ²³ Eelyo moondo wakubajaya achakufwambaana, ulaseka batakkalinkene batakwe mulandu. ²⁴ Inyika ilipedwe mumaanza aabantu basizibi; Leza ulavumba masyu ababelesi baabo. Kuti kakutali nguwe ooyo uzichita, mpawo ngwani oyo? ²⁵ Mazuba angu afwambanisya loko kwinda mutumwa uyobuchijana; mazuba aangu aaya kuule; taakwe pe chibotu nchalokubona. ²⁶ Abakafwambana loko mbuli mateete amaato, aalimwi chakufwambana mbuli igumbe lyulukilaa aansi achakufwambana na kukana kankuku. ²⁷ Kuti ndaamba kuti ndiyoluba aatala akutongawuka kwangu, kuti njogwisya busyu bwangu bunyemede alimwi nkabotelwe, ²⁸ Ndiyowaala mapenzi aangu woonse nkambo ndizi kuti tokooyonditola mbuli muntu utakwe chibi. ²⁹ Ndiyotukilwa; nkamboonzi, Mpawo, nkayezya na chabuyo? ³⁰ Kuti ndalisanzya amanzi asikunkwe akuchita maboko aangu aasalale kwindilila, ³¹ Leza uyondiwala mukalonga, alimwi zisamo zyangu zinoli tazichiyandikani pe kuli ndime. ³² Nkambo Leza temuntu pe, mbuuli mbumbede, kuti nkonzye kumusandula, kuti tukonzye kuza aamwi kubetekelwa. ³³ Takwe mubetesi pe akkati kesu uunga ulakonzya kubika kuboko kwakwe alindiswe. ³⁴ Taawope uumbi mubetesi ukonzya kugwisya kaponda kuzwa kulindime, ooyo ukonzya kubamba kuyoowa kupati kuzwa kukundiyoosya. ³⁵ Mpawo njowambuula akutayomuyowa. Pesi mbuuli mbuzibede zintu lino, nsikonzyi pe kuchita oobo.