¹ Mpawo Bbilidadi muSyuhayi wakasandula wati, ² Kuyooba chiindi chilamfu biyeni kolikwaamba zintu eezi? Kuyooba chiindi chilamfu biyeni majwi aamulomo wako natakabe luuwo lupati? ³ Sa Leza ulalesya lubeteko? Sa Singuzuzyoonse ulalesya basalali? ⁴ Bana benu bakamubisizya; tulizizi eezi nkaambo wakabapa mukuboka kwazibi zyabo. ⁵ Pesi kakulikuti mwakamuyanduulisisya Leza akwaamba nkumbizyo zyako kuliSinguzuzyoonse. ⁶ Na kamusalala akwiima nji, mpawo uyolikopa lwakwe mwini kukwiiminina nduwe akukubweedezya kubusena bwako bweelede. ⁷ Nikuba kuti matalikiloaako akali maniini, kale mamanino aako ayooba mapati. ⁸ Nchekaka kobuzya kumazyalani, alimwi udunamine kuli eecho masyanene nchibakayiya. ⁹ (Twakazyalwa jilo alimwi tatuzi nchitu munyika nkaambo mazuba eesu munyika mweenzule.) ¹⁰ Tabakoyookuyisya na akukwaambila? Tabakoyowamaba na majwi kuzwa mumyoyo yabo? ¹¹ Kujana papulasi yajanika na aatakwe chisiko? Kujana tete lyakomena kakutakwe manzi? ¹² Aawo naachili kamweemvwe alimwi nkatanaatemwa pe, alaswaba kunembo lyayi wi misamu. ¹³ Aboobo lubo ninzila zyabo boonse baluba Leza; bulangizi bwabatakwe tuleza luyonyonyooka. ¹⁴ Chiyandisyo chakwe chiyoomwayika, alimwi lusyomo lwakwe luliwizuukide mbuli luubi. ¹⁵ Useyama kung'anda yakwe, pesi tikoyomugwasya pe; uyoyijatilila pesi tikoyoyima pe. ¹⁶ Munsi lyazuba ngukamweemvwe, alimwi miyanda yakwe ileendelela muchilili chakwe choonse. ¹⁷ Miyanda yakwe ilaangidwe mbuli zilwi chamabwe; balanguula busena bubotu aakati kamabwe. ¹⁸ Pesi kuti ooyu muntu wanyonyoonwa kuzwa kubusena bwakwe, mpawo eeyo nyika iyomukaka akwaamba kuti, 'Takwe nindakakubwene pe.' ¹⁹ Bona, oolu''ndukondo'' lwamiyeeyo yamuntu uuli boobu; imwi misamu iyosyuuka kuzwa kumuse wamusyobo ooyu mubusena bwakwe. ²⁰ Bona, Leza takoyootanda muntu utakwe chibi; nikuba kubweza kuboko kwabasimuchita zibi. ²¹ Alubo ayoozuzya mulomo wako alusesyo, milomo yako aloompololo. ²² Aabo bakusula bayozwaatikwa bweeme; tente lyababi talichiyoobi limbi.''