¹ Bona, linso lyangu lyazibona zyoonse eezi; kutwi kwangu kwamvwa akuchimvwisisisya. ² Nzyozi, nchimwinya ambebo ndizizi; nsili munsi lyako pe. ³ Nikuba boobo, chili mbubo kuti ngaambule a Singuzu zyoonse ndipeekezya kuyeeya aamwi a Leza. ⁴ Pesi muninania bwini azyakubeja; moonse muli basilisi batakwe lugwasyo pe. ⁵ Aah, nikutali kuti moonse kamuumuna! Oobo mbubwali kunooba busongo bwenu. ⁶ Lino amvwe kuyeeya kwangu; amuswilizye kukombelezya kwamilomo yangu. ⁷ Sena ulambwida Leza anzila iitaluleme, alimwi uyoomwiminina kowambuula kowambuula chalweeno na? ⁸ Sena uyomutondeezya kusalula?Sena uyomukazizya mulandu Leza? ⁹ Chiyokubotela na nayokusenuuka. Sena inga ulamweena mbuuli mbonga uleena bantu? ¹⁰ Nchobeni uyokukkalalila kuti mukusisikizya watondezya kusaluula. ¹¹ Sena bwami bwakwe tabukuyoosyi, alimwi kuyoosya kwakwe takukulimbi na? ¹² Twaambo twako tutalubiki ntusimpi twadota; inkwabililo zyako ninkwabililo zyabulongo. ¹³ Uumuna, ndisiye andike, kuchitila kuti ngambe, kufumbwa chitandisikile takwe makani. ¹⁴ Ndilatola nyama yangu ndemwini mumeno aangu; ndilatola buumi bwangu mumaboko aangu. ¹⁵ Bona, na wandijaya, tandichinooli abulangizi pe; nikuba boobo, ndiyokwabilila nzila zyangu kunembo lyakwe. ¹⁶ Eechi nchichiyooba kaambo kalwaangunuko lwangu, nkambo taakwe muntu uutakwe Leza uyosika kunembo lyakwe. ¹⁷ Leza, swilizya kabotu kwambuula kwangu; twambo twangu ngatusie kumatwi aako. ¹⁸ Bona lino, ndabamba kabotu; nkwabilizyo zyangu; ndilizi kuti nsikwe mulandu pe. ¹⁹ Ngwani ooyo uunga ulakazyania andime inkuta? Na waziba kuchita oobo, alimwi na ndajanika nkelubizizye, elyo ndali kuumuna akutakata abuumi bwangu. ²⁰ Leza, ndichitile zintu zyobile biyo, mpawo nsikoyoyuba pe kuzwa kubusyu bwako: ²¹ Gwisya kuboko kwako kwabudyamizyi aali ndime, alimwi utalekeli bukkali bwako kuti bundiyoosye. ²² Lino kondiita, elyo ndiyovwiila; naa kuti ngambuule anduwe, alimwi undivwiile. ²³ Mbungana busofwazi azibi zyangu? Andizibe bubaya bwangu achibi changu. ²⁴ Nkamboonzi nosisa busyu bwako kuli ndime akundijata mbuuli sinkondonyokwe? ²⁵ Sena inga ulapenzya itu liyabupupuluka? Nkubona wandila isuko jumu na? ²⁶ Nkambo ulemba izintu zibi aatala andime; undichita kuti ndikkone zibi zyabucheche bwangu. ²⁷ Alimwi ulangide mawulu aangu; ulalangisisya nzila zyangu zyoonse; ulasenuuka busena aawo zituta zyamawulu angu mpuzyeenda ²⁸ nikuba kuti ndili mbuli chintu chibolede, chizakala mbuli chisamo chakaliwa amunanze.