¹ Mpawo Jobbu wakavwiila akwamba kuti, ² ''Takwe kudooneka pe ndinywe bantu; busongo buyofwa andinywe. ³ Pesi ndili akumvwisisisya mbuli ndinywe. Nsili ansi pe kulindinywe. Nchoonzyo, ngwani utazi zintu zili mbuli eezi? ⁴ Ndili chintu chakuti mbeyakilene aabo baseke - Ime, muntu wakiita Leza alimwi wamuvwiila! Imebo, mwalumi uululeme alimwi utakwe kampenda kabi - lino ndaba nsesyo. ⁵ Mumizezo yawumwi ulyiibide kuli kabi ketelezya kuswekelwa, uyeya munzila iyeta kuswekelwa kwingi kuli aabo bali akuulu kuyadalika. ⁶ Zibbakasa zyababbi zilazwidilila, abaaba banyemya Leza balimvwa kabakwabilidwe, maboko aabo beni mbibaba Leza babo. ⁷ Pesi kwalino buzya banyama, alimwi balakuyiisya; buzya bayuni bamujulu, alimwi balakwambila. ⁸ Kana kuti wambuule aanyika, alimwi ilakuyiisya; baswi bamulwizi bayokulayilila. ⁹ Nguuli munyama mukati kabaaba boonse uutazi pe kuti kuboko kwa Jehova nkukwachita ¹⁰ oobu?Mujanza lyakwe mumuli buumi bwachintu choonse chipona amuuya wabantu boonse. ¹¹ Kutwi takusunki majwi na mbuli bwaasa mbubulabila kulya kwayo? ¹² Mubantu bakachembaala muli busongo; mubulamfu bwamazuba muli kumvwisisisya. ¹³ Muli Leza muli busongo abupati; uli akwaambuzya akumvwisisisya. ¹⁴ Boona, ulamwaya, alimwi tachikonzyi pe kuyakwa lubo; kuti wabikka muntu muntolongo, takukonzyi pe kuba lwangunuko. ¹⁵ Boona, kuti wajalila manzi, zilayuminwa akupya; alimwi kuti wabatuma kunze, anga bagambya nyika. ¹⁶ Aalinguwe kuli nguzu abusongo; bantu beneedwe asikubeena boonse bali munguzu zyakwe. ¹⁷ Uuzulwida bambuuzyi kule munsumba zitasamine mukulilila, usandula babetesi baba zifubafuba. ¹⁸ Ugwisya inketani zyabulemu kuzwa kubaami; upopelezya kalembo muzibuno zyabo. ¹⁹ Uuzulwida bapayizi kule ansumba zitasamide mukulilila alimwi uzunda bantu bapati. ²⁰ Ugwisya majwi abaabo bakali basyomwa alimwi abweza kumvwisisisya kwa bazuluzi. ²¹ Utulida kunyansya kubana babaami akwangununa ibbanti lyabantu basimide. ²² Ulayubununa zintu zinikide zyamumudima akweeta myeenzule inikide kumumuni. ²³ Usimya manyika, alimwi ulamwaya; ulakomezya manyika, alimwi ulabinga lubo mbuli basungwa. ²⁴ Ulagwisya kumvwisisisya kuzwa kubazuluzi babantu baansi; ulabachita kuti bapengane munkanda mutakwe nzila. ²⁵ Balazulumba mumudima mutakwe mumuni; ubachita kuti badadalike mbuli muntu ukoledwe.