¹ Ndachimwa abuumi bwangu; ndiyowamba chakwaangunuka kukaambo kangu; ndiyowamba mukunyema kwamuuya wangu. ² Ndiyowamba kuti kuli Leza, ''Utandinyansyi; nditondeezye nchondipeda mulandu. ³ Sena nchibotu kulinduwe kuti nga ulandipenzya, kulandilangila ansi mulimu wamaanza aako aawo nkoli kulombozya makanze ababi? ⁴ Uli aamenso aanyama na? Ulabona na mbuli muntu mbabona? ⁵ Mazuba ako ali mbuli mazuba abulengwe bwamuntu na minyaka yako mbuli minyaka yabantu, ⁶ kuti ubuzye bubi bwangu akuyanduulisisya aatala achibi changu, ⁷ nikuba ulizi kuti tandijisi kaambo alimwi takwe naba womwe uukonzya kundivuna kuzwa kuluboko lwako? ⁸ Maboko aako akandichita alimwi andizwatika, nikubaboobo ulikundimwaya. ⁹ Koyeeya, ndakukumbila, kuti wakandibumba mbulibulongo; nga ulandileta lubo na mubulongo? ¹⁰ Tonditililide ansi na mbuli malili akundiyumya mbuli chiizi? ¹¹ Wakandizwaatika chikumba anyama alimwi wandisumina aantomwe amafuwa amilambi. ¹² Wakandipa buumi achizuminano chabusyomesi; lugwasyo lwako lwakabamba muuya wangu. ¹³ Nikubaboobo zintu eezi wakalizisiside mumoyo wako - ndilizi kuti nzizyo nziwakali kuyeeya: ¹⁴ kuti nsinga ndakabisya, walikuchibona; tewalikunondilekelela bubi bwangu. ¹⁵ Nsinga ndakachita bubi, mawe kulindime; alimwi nikuba ndakachita bululami, takwe nindali kubusya mutwe, mukuti ndilizuzigilwe amawuse - bona machise angu! ¹⁶ Na mutwe wangu wakabusigwa, walikunondivwima mbuli mulavu; alimwi wali kunolitondeezya lwako mwini azigambyo zyanchito zyanguzu kukulwisya ndime. ¹⁷ Uleeta bakamboni bapya kuzolwisya ndime alimi wayungizya bukali bwako kukulwisya ndime; wandiyubilila abasilumamba bachilimvwa. ¹⁸ Nkaambonzi, mpawo, niwakandeeta anze etumbu? Ngandalombozya kuti anoli ndakagwisya muuya wangu akuti anoli takwe linso lyakandibona pe. ¹⁹ Ndakalikunooba anga tendakali ndabawo pe; ninga ndakabwezegwa kuzwa mutumbu kuya mukabanda. ²⁰ Sena mazuba angu taali mache biyo? Ima kabi, ndisiye endike, kuti ndikonzye kuba aakulyookezya buniini ²¹ nkensinayinka nkwesikonzyi kuboola, kunyika yamudima acheenzule chalufu, nyika eeyo iisiya mbuli aakati kabusiku, ²² nyika yacheenzule chalufu, kazitakwe mweelwe, ooko mumuni uli mbuli aakati kabusiku.'''