¹ Makani akambulwa atala a Damasikkasi. ² Myunzi ya Alowe iyokakwa. Ayooba masena akulalila butanga aansi, alimwi takwe naba omwe utakabuyowesye. ³ Myuunzi yakuyubila iyomwayika kuzwa kuli Efulemu, bwami kuzwa ku Damasikkasi, aabwendelezi bwaba Izilayeli -- oku nkwaambula kwabantu ba Izilayeli -- oku nkwaambula kwa Jehova wamakamu. ⁴ Kuyosika atala abuzuba obo elyo bulemu bwa Jakobo buyokotela, alimwi amafuta anyama yakwe iyokotela. ⁵ Kuyoba mbuli elyo mutebuli nabungania mayila ayimvwi, alimwi kuboko kwakwe nikutebula mitwe yamayila. Kuyoba mbuli kuchiindi muntu navuulula mitwe yamayila Mukkuti lya Lefayimu. ⁶ Kuvuulula kuyolekwa, nekubaboobo, mbuli kuchiindi munsamu wamu Olifa nutikinisigwa: obile na otatwe ma Olifa akujulu alasyala, oone naa musanu kumpela lyantabi yamisamu yamichelo - oku nkwambula kwa Jehova, Leza wa Izilayeli. ⁷ Mubuzuba obo bantu bayolanga kunembo lya Mubumbi wabo, alimwi menso abo ayolanga ku Musalali wa Izilayeli. ⁸ Tabakoyolanga kuzipayililo, kumilimo yamaboko aabo, nekuba kulanga kuli eezyo minwe yabo nziyakabumba, zyamunsamu nanka zikozyanio zyazuba. ⁹ Mubuzuba oobo myuunzi yabo isimide iyoba mbuli chisaka chinkuneme kukalundu kasamiti, ako kakasowegwa nkambo kabantu ba Izilayeli, alimwi bayoba matongo. ¹⁰ Nkaambo mwaluba Leza walufutuko lwanu, alimwi mwakaka bbwe lyanguzu zyanu. Aboobo mwazikkila minsamu mibotu, alimwi mwazikkila intabi nzimwatambula kuzwa kubazwa masi, ¹¹ nekuba boobo mubuzuba nimwazikila mwazyungulusya, alimwi nekuba kuchifumo imbotu zyanu zilakkomena, butebuzi buyokachilwa mubuzuba bwamapenzi abwabuusu bugambya. ¹² Maawe! kumakamu abantu biingi, abo bavuluma mbuli kuvuluma kwalwizi, aakwendesya kwazisi, abo bandesya mbuli kwendesya kwamanzi alanguzu! ¹³ Zisi ziyovuluma mbjuli kwendesya kwamanzi miingi, pesi uyobakkalalila alimwi bayochija kuyakule, bayowandwa kunembo lyaluuwo mbuli buungu atala lyazilundu, aambuli lusuko lulundumuka nilyungisya iguwo. ¹⁴ Chiindi chamangolezya,kulaboneka, makani aayoosya! Lino kabutana kucha tabakono chiliwo! Eechi nchenchicho chaabilo chabaabo batusaala, banji babaabo batunyanzya mbono zyesu.