¹ Mumweezi wamusanu ayibili mubuzuba bwa makkumi aabili abumwi bwamweezi, ijwi lya Jehova lyakasika kwindila kuli Hagayi musinsimi, kaliti, ² ''Wambula kumweendelezi waJuda, Zelubbabbelu mwana mulombe Syeluteyi, akupayizi mupati Joshuwa mwana mulombe wa Jehozadakki, akubantu boonse basyeede. Wamba obu, ³ 'Ngwani uusyede akkati kenu wakabona ng'anda eyi mubulemu bwayo butaanzi? Mwibona biyeni lino? Tayiboneki kili mbuli chintu chabuyo mumenso anu? ⁴ Kwalino, kamuyuma, Zelubbabbelu!--aya ngimalayilile a Jehova--amubeleke nkambo ndilanywebo!--echi nchizuminano cha Jehova. ⁵ Echi nchisyomezyo nchindabumba andinywe nimwakazwa mu Ijiputi, amuuya wangu uyimikilila akkati kanu. Mutayoowi! ⁶ Mbuli Jehova wamakamu wamba kuti: mubunini loko elyo njozungaanya ijulu anyika, ilwizi anyika injumu! ⁷ Ndiyozunganya zisi zyoonse, azisi zyonse ziyoyeta zintu ziyandisi kuli ndime, alimwi njozuzya ing' anda yoonse ibulemu, mbwaamba Jehova wamakkamu. ⁸ Insiliva angolida nzizyangu!--mbubobu mbwaamba Jehova wamakkamu. ⁹ Ibulemu bwang' anda eyi buyoba bupati loko kunembo kwinda kumatalikilo, mbwamba Jehova wamakkam, alimwi njoopa lumuno mubusena obo!--echi nchizuminano cha Jehova wamakkamu.'' ¹⁰ Mubuzuba bwamakkumi aabili aane muzuba lyamwezi wamusanu ayine, mumwaka wabili wa Daliyasi, ijwi lya Jehova lyakasika kuli Hagayi musinsimi, kaliti, ¹¹ ''Jehova wamakkamu mbwamba obu: Amubuzye mupayizi zyendelene amulawu, mwambe kuti, ¹² 'Na muntu wabweza inyama ipedwe kuli Jehova mulupeto lwachikobela amulupeto lwaguma lupeto na musina, wayini namafuta, nakufumbwa musyobo wachakulya, ngachasalala na?''' Mupayizi wakasandula akuti, ''Takuli mbubo pe.'' ¹³ Elyo Hagayi wakati, ''Nakuti umwi usofwede nkambo kalufu waguma kufumbwa zintu eezi, ngakwasofwala na?'' Mupayizi wakasandula akwamba kuti, ''Iyi ngawasofwaala.'' ¹⁴ Lino Hagayi wakasandula akwamba kuti, ''Ezi zilikubantu akuchisi kunembo lyangu!-- eechi nchizuminano chaJehova--alimwi chili mumilimo yamaboko aabo. Eecho choonse nchibapa chilisofwede! ¹⁵ Aboobo lino, amuyeeye mumizeezo yanu azyakinda akusikila buzuba bwasunu. Kuchindi nikwatalina kubikwa ibbwe aatala lyabbwe kung' anda ya Jehova, ¹⁶ Kwakali buti mpawo? Nimwakasika achilwi chamakkumi aabili amwelwe wakali biyo alikkumi; animwakasika kudindi lyawayini kuti, ateke nongo zilmakkumi musanu zyamweelwe, kwakali biyo makumi aabili. ¹⁷ Ndakamupenzya amilimo yamaboko aaanu woonse andyomba achivulamabwe, pesi takwepe nimwakaboola kulindime pe -- aaya ngemalayililo a Jehova. ¹⁸ Koyeeya kuzwa buzuba oobouno kuyakunembo, kuzwa mazuba mazuba makkumi aabili--aane muzuba lyamwezi wamusanu ayine, kuzwa buzuba intalisyo ya Jehova nichakatalikwa. ¹⁹ Amuyeeye mbubobu! Kuli nikuchili mbuto na muchimumbwa? Nikuba musansa, mukuyu, apomegilanayiti, ama olifa atazyede! Pesi kuzwa sunu ndikulongezye na!'' ²⁰ Mpawo ijwi lya Jehova lyakasika lwabili kuli Hagayi mubuzuba bwamakkumi aabili aane amwezi akwamba kuti, ²¹ ''Wambuula kumuzuluzi waJuda, Zelubbabbelu, akuti, njozunganya ijulu anyika. ²² Nkambo njosowa chuuno kubwami bwazisi akumwaya inguzu zyabwami bwazisi njolobya inkalaki abasikugada nzizyo; mabbiza abasikugada njobawisizya aansi, umwi awumwi nkambo kapanga lyamwenzinyina. ²³ Mubuzuba oobo--aya ngimalayilile a Jehova wamakkamu---njomubweza, Zelubbabbelu mwana mulombe wa Syelutayelu mbuli mulanda wangu--aya ngimalayilile a Jehova wamakkamu. Njokuchita kuti ukabe mbuli inwenwe, nkambo ndakakusala!--aya ngimalayilile a Jehova wamakamu!'''