¹ Elyo ezi zintu nizyakamana, bapati bakalulama kuli ndime alimwi bakati, ''Bantu bamu Izilayeli, bapayizi, alimwi aba Levayiti tabana kwanzana pe lwabo kuzwa kubantu benzinyika alimwi: Kkenayiti, Hititisi, Peliziti, Jebbusayiti, Amonayiti, Mowabbayiti, ba Ijiputi, antomwe aba Amoni. ² Nkambo bakali babweza bamwi bana babo basimbi abachilombe alimwi bakabaswanizya abantu basalala bali abantu bamanyika, alimwi abazulwidi abo bakali mbibatanzi kukusyomekana oku.'' ³ Muchindi nindakamvwa ezi, ndakadelula zigogo zyangu alimwi achibaki changu ndanonkola masusu angu mumutwe akuchilezu, ndakakkala ansi, akugamba. ⁴ Boonse bakali kuyowa majwi a Leza wa Izilayeli aatala alusyomo lwabazike bakabungana kuli ndime nindakakkede kundichigamba mane kusikila chachipayizyo chamansiku. ⁵ Pesi kuchindi chachipayizyo chamansiku ndakabuka kuzwa kubbazu lyamapenzi angu, eelyo nindakamana kudelula zyakuzwata zyangu alimwi akutandabika maanza angu kuli Jehova Leza wangu. ⁶ Ndakati, ''Leza wangu, ndaba ansoni kuli nduwe, nkambo milandu yesu yavula kumitwe yesu, alimwi amilandu yesu yakomena kusikila kujulu. ⁷ Kuzwa kumazuba abamatata besu, kusikila yino tli mumulandu mupati. Mumilandu yesu njitulayo, baami besu, abapayizi besu twakapegwa mujanza lyabaami besu bamunyika eeyi, akujazigwa ipanga abuzike, alimwi akusalwa akufwa insoni kumenso, mbuli mbotubede sunu obu. ⁸ twafwidwa luzyalo kuli Jehova Leza wesu kuti tusyalilwe bamwi baloboka akupegwa izina mubusena bwakwe busalalisya. Ezi zyakali zya Leza wesu kuti amunike menso esu alimwi akutuponia bunini mubuzike bwesu. ⁹ Nkambo tuli bazike, pesi Leza wesu tatulubide pe pesi wakayungizya chizuminano chalusyomo kuli ndiswe. Wakachita eechi mumenso amwami wa Peziya kuchitila kuti atupe kusima kupya, aboobo tuyelede kuyakulula ng'anda ya Leza wesu alimwi amatongo ayo. Wachita echi kuchitila kuti atupe bulambo kuti tukkale obotu mu Juda amu Jelusalemu. ¹⁰ Pesi kwalino, Leza wesu, tulaambanzi kuzwa echi? Twaluba milawu yako, ¹¹ milawu njiwakalayilila balanda bako abasinsimi, wakati, ''Nyika eeyi njimuyobunjila kuti mwivube ilisofwede. Izwide bantu bamunyika azisesemyo zyabo. Bakizuzya busofwazi bwabo kuzwa kumagolelo kusikila kumagolelo ayo. ¹² Aboobo kwalino, mutanochipi bana benu bachisimbi kubana babo balombe; mutakabwezi bana babo bachisimbi mupe bana benu balombe, alimwi mutakayanduli kubeetela luumuno azyoolwe, kuchitila kuti mube amanguzu alimwi mulye zibotu zyanyika, abobo akuvubya bana benu choonse chindi.'' ¹³ Lino kusule kwazyonse zyakasika kuli ndiswe nkambo kamilimu yesu mibi alimwi amilandu yesu mibi - mbuli nduwe, Leza wesu, mbowakatubwedezya milandu yesu bunini biyo kwinda mbukwelede alimwi akutupa lufutuko - ¹⁴ nsaa nchibotu na kusotoka milawu yako lubo alimwi atuvwelanie mulukwatano abantu aba bachita zisesemyo? Tamukoyotunyemena na alimwi akutatukalalila mane lumwi watujayilila akutatusiila, naba omwe utakaloboke? ¹⁵ Jehova, Leza waba Izilayeli, ulasalala, nkambo twasyaala tulivunidwe kuzuba eli. Langa! Tuliwo kunembo lyako mumilandu yesu, nkambo takwe uunga ulayima kunembo lyako nkambo kayaaya.