¹ Aba mbibayiminini babasikale yampuli zyabo, alimwi amulongo wabaabo bakasyala ku Bbabbiloni andime muchindi chabulelo chamwami Atakizasi. ² Balunyungu lwa Finiyasi, Gesyomu. Balunyungu lwa Itama, Daniyele. Balunyungu lwa Devidi, Hutisyi. ³ Balunyungu lwa Syekkaniya, oyo wakali walunyungu lwa Paosyi, Zekkaliya, antomwe anguwe wakali a 150 bachalumi balembedwe mubbuku lyamulongo wamazyalane. ⁴ Balunyungu lwa Pahati-Mowabbu, Eliyehonayi mwana mulombe wa Zekkaliya antomwe ambakali abo bakali myanda ibili bachalumi. ⁵ Balunyungu lwa Zatu, Bbeni Jahaziyeli ababo mbakali abo bakali myanda iitatu bachalumi. ⁶ Balunyungu lwa Adini, Ebbedi mwana mulombe wa Jonatani antomwe ababo mbakali abo bakali lembedwe kabali makumi musanu bachalumi. ⁷ Balunyungu lwa Elamu, Jesyayiya mwana mulombe wa Ataliya antomwe ababo mbakali abo balembedwe bakali makumi musanu amakkumi abili bachalumi. ⁸ Balunyungu lwa Syepatiya, Zebbadiya mwana mulombe wa Mikkayeli antomwe ababo mbakali abo balembedwe bakali musanu abatatu bachalumi. ⁹ Balunyungu lwa Jowabbu, Obbadiya mwana mulombe wa Jehiyelu antomwe ababo mbakali abo balembedwe 218 bachalumi. ¹⁰ Balunyungu lwa Bbani, Syelomiti mwana mulombe wa Josipiya antomwe ababo mbakali abo bakali 160 bachalumi. ¹¹ Balunyungu lwa Bbebbayi, Zekkaliya mwana mulombe wa Bbebbayi antomwe ababo mbakali ambabo balembedwe bakali makkumi abili alamusanu abatatu bachalumi. ¹² Balunyungu lwa Azigadi, Johanani mwana mulombe wa Hakkatani antomwe ababo mbakali abo balembedwe kabali 110 bachalumi. ¹³ Aba bakali balunyungu lwa Adonikkamu bakazida musule. Aya ngakali mazina abo: Elipeleti, Jewuyelu, a Syemayiya antomwe ababo bakasika kabali makumi musanu alimwi bachalumi. ¹⁴ Balunyungu lwa Bbigivayi, Utayi a Zakkuwa antomwe ambakalabo balilembedwe kabali makumi musanu aabili bachalumi. ¹⁵ Ndakabunganisya banakwenda kukalonga ako kaya ku Ahava, alimwi twakakkala ooko mazuba atatu. Nindaka balingula bantu abapayizi, tendakajana mu Levi pe naba omwe. ¹⁶ Elyo ndakatuma bantu kukuyoyita Eliyeza, Aliyelu, Syemayiya, Elunatani, Jalibbu, a Elunatani antomwe a Natani, Zekkaliya, a Mesyulamu - abo bakali bazuluzi - alimwi kuli Joyalibbu a Elunatani - bakali bayiisyi. ¹⁷ Lyakatobela ndakatumina kuli Ayido, muzuluzi mu Kkasipiya. Ndakabambila kuti nzezilinzibayowamba kuli Ayido antomwe anzubo zyakwe, balanda bamuntempele bakali kukkala mu Kkasipiya, nkokuti, kuti batumine kuli ndiswe balanda bang'anda ya Leza. ¹⁸ Elyo bakatutumina swebo ajanza lya Leza bbotu mwalumi mubotu utegwa ngu Syelebbiya, mwalumi musongo. Wakali walunyungu lwa Mahili mwana mulombe wa Levi mwana mulombe wa Izilayeli. Wakaza abana balombe bali kkumi amusanu abatatu antomwe abakkulana bakwe. ¹⁹ Alimwi wakaza a Hasyabbiya. Alimwi kwakali anguwe Jesyayiya, umwi wabalunyungu lwa Melali, antomwe abakkulana bakwe kubikilizya abana babo bachalumi, balumi makkumi abili kukubabikkamwi. ²⁰ Abo bakasalilidwe kuti babeleke muntempele, abo Devidi abasilutwe bakwe mbakapede kuti babelekele ba Levayiti: 220, umwi awumwi kapedwe ezina lyakwe. ²¹ Mpawo ndakambilizya kuti kube kulyiimya chakulya mu Ahava Kkanalu kuti tulibombye kunembo lya Leza, kuti tuyandule inzila iluleme yesu izwa kulinguwe, bacheche besu, antomwe ambono zyesu zyoonse. ²² Ndakawusa loko kuti ndikumbile kumwami kuti andipe basilumamba nakuti basikutanta mabbiza kuti batukwabilile kuli ba sinkondoma mukati kenzila yesu, mbokunga twakali twamba kumwami, 'Ijanza lya Leza wesu lilajulu aboonse abo bamuyandida bubotu, pesi janza lyakwe pati abukali bwakwe buli kuli bonse abo bamuluba lwakwe.' ²³ Elyo twakalyimya mpawo twakayandula Leza atala azeezi, alimwi twakakomba kuli nguwe. ²⁴ Zyakatobela ndakasala kkumi ababili bachalumi kuzwa kulibasilutwe bapayizi: Syelebbiya, Hasyabbiya, antomwe akkumi lyakkulana babo. ²⁵ Ndakabapimina nsiliva, ngolide, azibelesyo antomwe azipo zyamung'anda ya Leza eyo mwami, abasilutwe bakwe abendelezi, antomwe a Izilayeli wonse ngwakapedelede chakwangunuka. ²⁶ Aboobo ndakapima mujanza lyabo matalenta ansiliva ali myanda alimusanu awumwi amakkumi alimusanu, mwanda umwi wamatalenta ansiliva azibelesyo, mwanda umwi wamatalenta angolida, ²⁷ makkumi abili azigabba zyangolide amwi abulemu bwampondo zili chuulu, alimwi azibelesyo zyobile zyamukuba ufulidwe zibotu mbuli ngolide. ²⁸ Mpawo ndakabambila kuti, ''Inywebo mulasalala kuli Jehova, alimwi azilazyo zibelesyo, antomwe ansiliva angolide nzipo ziya kuli Jehova, Leza wabasikale benu. ²⁹ Amuchenjele alimwi muzibambe kabotu mane mukazipime bulemu kunembo lyabapayizi bapati, ba Levi, alimwi abapati banzubo zya Izilayeli mu Jelusalemu mumaanda amung'anda ya Leza.'' ³⁰ Bapayizi aba Levayiti bakatambula nsiliva, ngolide, alimwi azibelesyo kuchitila kuti bazitole ku Jelusalemu, kung'anda ya Leza wesu. ³¹ Twakanyampuka kuzwa ku Ahava Kkanalu muzuba lyakkumi aabili atanguna mumwezi kuya ku Jelusalemu. Janza lya Leza wesu lyakali alindiswe; wakatukwabilila kujanza lyabasinkondoma alimwi ababo bakali kulindila munzila. ³² Aboobo twakasika ku Jelusalemu alimwi twakakkala nkuko mazuba aatatu. ³³ Lino mubuzuba bwane insiliva, ngolide, alimwi azibelesyo zyakapimwa mung'anda ya Leza wesu, mujanza lya Melemoti mwana wa Uliya mupayizi. Wakali antomwe a Eliyeza mwana mulombe wa Finiyasi, Jozabbadi mwana mulombe wa Jesyuwa, antmwe a Nowadiya mwana mulombe wa Bbnuyi mu Levayiti. ³⁴ Mwelwe antomwe abulemu bwazyonse bwakapimwa. Bonse bulemu bwakalembwa ansi muchindecho. ³⁵ Aabo bakaboola kuzwa mubuzike, ibantu bamubuzike, bakapa zipayizyo kuli Leza wa Izilayeli: kkumi abasipule babili kuba Izilayeli, makumi musanu amakumi aane alamusanu abagutu boone, makumi musanu aabili alamusanu abana bambelele bobile, antomwe akkumi atubili tupule twampongo mbuli chipayilo chazibi. Zyonse zyakali zipo zyakutenta kuli Jehova. ³⁶ Mpawo bakapa malayilile amwami kuli basilutwe ba mwami antomwe akubendelezi mu Zilikiti Kusule lya Mulonga, alimwi bakagwasizya bantu antomwe ang'anda ya Leza.