¹ Elyo muleli mupati Daliyasi wakalayilila kuti balangelange lugwalo mumabbuku akali muchiyobwedo mu Bbabbiloni. ² Mubusena buyakilidwe bwachisi cha Esibbatana mu Midiya malembe akajanika; obu mbubwakali bulembo; ³ ''Mumwaka wakwe wakutanguna muleli mupati Sayilasi, Sayilasi wakapa malayilile atala ang'anda ya Leza mu Jelusalemu: 'Akube kuti ng'anda iyakululwe mbuli busena bwakupayilila, akube kuti ntalisyo italikwe, abwime bwayo abube tukokola tuli makumi musanualimwi, alimwi busasa bube tukokola makumi musanu alimwi, ⁴ amindano itaatu yamabwe mapati alimwi amundando wamasamu mapya, alimwi kube kuti muulo ubbadalwe abeng'anda yamwami. ⁵ Lino amuboozye zibelesyo zyangolida azya nsiliva ezyo zyelede mung'anda ya Leza, ezyo Nebbugadineza nzyaketa ku Bbabbiloni kuzwa muntempele ku Jelusalemu alimwi ubatume lubo kuntempele ku Jelusalemu. Ulelede kuyozibika mung'anda ya Leza.' ⁶ Lino Tatenayi, mwendelezi mupati wa Chisi chili Kusule lya Mulonga, Syeta-Bbozenayi, antomwe abenzinyina abo bali Muchisi Kusule lya Mulonga, bikka kule! ⁷ Siya mubeleko wang'anda ya Leza awulike. Mwendelezi alimwi mu Juda mupati uyoyaka eyi ng'anda ya Leza abusena obiya. ⁸ Ndikumulayilila nchimwelede kuchita kubapati baba Juda abo bakayaka ng'anda ya Leza: Mali yakuyasya ng'anda eyi yelede kuzwa muchiyobwedo chabwami aayo aliyiigwa abantu bakuumbo lya Mulonga iyobelesegwa kukuliya aba balumi kuchitila kuti mulimu utiimikili. ⁹ Kufumbwa chiyandika - bapule banini, bagutu, nikuba bana bambelele bazipo zyuumpwa kuli Leza wakujulu, mbuto, mwinyo, wayini, naba mafuta mbuli mbokubede kumulawo wabapayizi mu Jelusalemu - upe zintu ezi kulimbabo mazuba woonse kaatakwe kutalukila. ¹⁰ Konochitobu kuchitila kuti bakeete zipo kuli Leza wakujulu alimwi akukomba kuli ndime, mwami, antomwe amwana wangu mulombe. ¹¹ Ndikumulayilila echo kuti na umwi watyola malayilile, musemo wang'anda welede kusomonwa yakwe alimwi welede kulengelezegwa alinjiyo. Ing'anda yakwe iyelede kutentwa kuti ikabe mulwi wazibi akambo kanzizeezi. ¹² Akube kuti Leza ulazina likombelwa kooko akanyonyoone baami nibaba bantu boonse abo basoleka kuvolozya majwi aya nikuba kunyoonyona ng'anda ya Leza mu Jelusalemu. Imebo lwangu Daliyasi ndime ndalayilila boobu. Mulimu ooyu uuchitwe chamanguzu!'' ¹³ Mpawo linobu akambo kamalayilile aayo muleli mupati Daliyasi ngakatumizya, Tatenayi, muzuluzi wa Chisi Kusule lya Mulonga, antomwe a Syeta-Bbozenayi antomwe abenzinyina, bakachita zyonse ezyo zyaka layililidwe a Mwami Daliyasi. ¹⁴ Eelyo bapati baba Juda bakayaka alimwi bakazwidilila munsi lyanjiisyo ya Hagayi musinsimi antomwe a Zekkaliya, walunyungu lwa Ido. Bakamaninsya mayake abo kazyendelana amalayilile a Leza waba Izilayeli alimwi kwinda mumalayilile a Sayilasi, Daliyasi, antomwe a Atakizasi mwami waku Peziya. ¹⁵ Ing'anda yakamaninsigwa mubuzuba bwatatu bwamweezi wa Ada, mumunyaka wamusanu awumwi wabwendelezi bwa Mwami Daliyasi. ¹⁶ Bantu ba Izilayeli, bapayizi, ba Levi, antomwe abamwi boonse bazike bakakondwa kukulipeda kwang'anda eyi ya Leza chalumwemwe. ¹⁷ Bakapeda mwanda omwe wabasipule, mwanda womwe wabagutu, alimwi myanda yone yabana bambele njibakapeda kung'anda ya Leza. Akkumi lyatupongo tupule atulato twakapedwa mbuli chipo chazibi chaba Izilayeli, omwe kayiminina mukowa wa Izilayeli. ¹⁸ Alimwi bakapa ba payizi aba Levi kuti babeleke muzibeela kumulimo wa Leza mu Jelusalemu, mbuli mbukulembedwe mubbuku lya Mozesi. ¹⁹ Alimwi abo bonse bakali mubuzike bakakondelelwa pobwe lya Pasika mubuzuba bwakkumi aane mubuzuba butanzi bwamwezi mutanzi. ²⁰ Bapayizi aba Levi boonse bakalisalazya lwabo alimwi bakajaya zipayizyo zya Pasika lyaboonse abo bakali mubuzike, kubikilizya ambabo beni. ²¹ Bantu ba Izilayeli abo bakalya antomwe nyama ya Pasika bakali abo bakali baboola kuzwa mubuzike alimwi bakali balipambula lwabo kuzwa kuzisofweede zyabantu bamunyika alimwi bakayandula Jehova, Leza waba Izilayeli. ²² Chakukondwa bakasekelela Pobwe lya Zibunge zitakwe bumena kwamazuba musanu zzbili, nkambo Jehova wakali wababozezya lukondo alimwi akubabozezya moyo wamwami wa Asiliya kukusimya maanza abo kumulimo wang'anda yakwe, ing'anda ya Leza waba Izilayeli.