¹ Kwakali mumweezi wamusanu ayibili ba Izilayeli nkabali baboola kumyunzi yabo, eelyo bantu boonse nibakabungana mu Jelusalema mbuli muntu womwe. ² Josyuwa mwana mulombe wa Jozadakki ababunyina bapayizi a Zelubbabbelu mwana mulombe wa Syelitiyeli ababunyina bakanyampuka bakuyaka chipayililo cha Leza wa Izilayelu kuti bape zipayizyo zyakutenta mbuli mbokulembedwe mumulawo wa Mozesi muntu wa Leza. ³ Eelyo bakayaka chipayililo azikkalilo, nikuba kuti bakali kuyoowa akambo kabantu bachisi. Bakapa zipayizyo zyakutenta ku mwaami Leza zyachifumofumo akumagolezya. ⁴ Alubo bakachita pobwe lyakutebuzi akupa zipo zyakutentela zili mumulawo akuchita zyeelede kuchitwa mubuzuba bumwi abumwi. ⁵ Mbuli mbukubede, kwakali zipo zyakutenta zyalubbe, zipo zyakukkala kwamweezi mupya alimwi ezipo zyakuliyandila zyakapegwa aboonse bakazipa kuli Jehova, kubikilizya azipo zyakuli yandila. ⁶ Nikuba kuti tebakalina talika kuyakulula ng'anda ya Leza, pesi bakakonzya kupa zipayizyo zyakutenta ku mwaami Leza mubuzuba butanzi bwamweezi wamusanu ayibili. ⁷ Aboobo bakapa nsiliva kubabezi bamabwe abafuzi mpawo bakapa zyakulya, zyakuumpa amafuta aa olifa kubantu baku Sidoni a Taya kutegwa abalabo babeetele masamu amusidoli kuzwa ku Lebbanoni aayo ngibakayinzya mulwizi mane kuzowasisya ku Jopa, mbubonya mbuli mbwakambide Sayilasi, mwaami waku Peziya. ⁸ Nkaako mumwezi wabili mumwaka mupati wabili bantu kabasikide kale mung'anda ya Leza mu Jelusalema, Zelubbabbeli mwana wa Syeyalitiyeli, Jeshuwa mwana mulombe wa Zodakki, abamwi boonse bapayizi, ba Levi, ababo boonse bakaboola ku Jelusalema kuzwa mubwaange, bakatalika mulimu. Bakapa ba Levi bakali amyaka makumi obilwe naa kwinda kuti balange zyakuyakwa kwa ng'anda ya Jehova. ⁹ Jeshuwa abana bakwe abana bakwabo a Kkadimiyeli abana bakwe, abana bakwe uli ngwalunyungu lwa Hodaviya), abana ba Henadadi antomwe abana babo abana babunyina mbabo bakayaka ng'anda, boonse aba bakali ba Levi bakajatana mukulanga abo bakali kuchita mulimu wang'anda ya Leza. ¹⁰ Bayaki bakabamba intalisyo yang'anda ya Jehova. Eezi zyakachita kuti bapayizi bayime muzisamo zyabo amyeembo aba Levi bana ba Asafu, kulumbayizya Jehova ansaka mbuli Devidi mwaami waku Izilayeli mbwakali walayilila. ¹¹ Bakayimba chakulumbayizya akulumba kuli Jehova kabati, mwaami Leza mubotu. Kusyomeka kwakwe kwachizuminano kuchisi cha Izilayeli takumani.'' Bantu boonse bakatembawula Jehova chakoompolola mulukondo nkambo kakuti ntalisyo yang'anda ya Jehova yakayaligwa. ¹² Pesi bunji bwaba payizi, ba Levi, aantomwe abapati babasikale babo bakali bakomena, bakali babona n'anda ntanzi, eelyo nibakabona ntalisyo zya n'anda kazili kubambwa bakakwiila kapati. Pesi bantu biingi bakali koompolola chakukondwa chalumwemwe alimwi aloompololo lwakubotelwa. ¹³ Kumasimpilo, bantu tibakali kukonzya kusiyanisya majwi abantu balikubotelwa abali kukwiila nkambo bakali kukkwilisya aluuza lwabo kalusika kule.