¹ Elayija musinsimi wakayita umwi mwana mulombe wabasinsimi wamwambila kuti, ''Sama zyalweendo, mpawo ubweze aka kabbodela kamafuta mujanza lyako uyinke kuli Lamoti Giliyadi. ² Wakusika, ukalunguule Jehu mwana mulombe wa Jehosafati mwana mulombe wa Nimishi, alimwi ukanjile mukati ukachite kuti akanyampuke kuzwa mukati kabasindikizi bakwe, alimwi ukamululamike mukaanda kamukati. ³ Mpawo ukabweze kabbodela kamafuta ukatile aamutwe wakwe akwaamba kuti, ''Yahuwe wamba boobu: ''Ndakunanika bwami bwa Izilayeli.'' Mpawo ukajule mulyango, ukachije; utakachedwi.'' ⁴ Nkinkaako imulombe, musinsimi muniini, wakaya kuli Lamoti Giliyadi. ⁵ Awo nakasika, amubone, basinyeembe bampi balumamba bakalikkede. Nkiinkako musinsimi munini wakati, ''Ndaaza kukumubona, basilutwe.'' Jehu wakasandula, ''Kuli uli akati kesu?'' Musinsiimi munini wakavwiila, ''Kuli nduwe, Silutwe.'' ⁶ Nkiinkako Jehu wakanyampuka akuya mung'anda, alimwi musinsimi wakatila mafuta aamutwe wakwe akwambila Jehu kuti, ''Yahuwe, Leza wa Izilayeli, wamba eezi: 'Ndakunanika kuba mwami aabantu ba Yahuwe, aatala lya Izilayeli. ⁷ Weelede kujaya impuli ya Ahabbu simalelo wako kuchitila kuti ndikonzye kukkwichizya gazi lyabelesi bangu basinsimi agazi lyababelesi ba Yahuwe boonse bakajayigwa ajaanza lya Jezebbelu. ⁸ Aboobo yoonse mpuli ya Ahabbu iyooloba chakumaninina, alimwi ndiyotema kujaya kuzwa kuli Ahabbu woonse mwana mulombe, nikuba kuti muzike na muntu waangunukide. ⁹ Ndiyochita kuti n'anda ya Ahabbu ikabe mbuli ng'anda ya Jelobbomu mwana mulombe wa Nebbati alimwi mbuli ing'anda ya Bbasha mwana mulombe wa Ahija. ¹⁰ Bankala bayolwa Jezebbelu mu Jezelelu, alimwi takukoyoba muntu utakamuvwike.'' Mpawo musinsiimi wakajula mulyango akuchija. ¹¹ Mpawo Jehu wakazwa aanze kubabelesi basimalelo wakwe, alimwi umwi wakati kuli nguwe, 'Zili kabotu na zyoonse zintu?'' Nkambonzi oyu muntu upengede naaza kuli nduwe?'' Jehu wakabavwiila, ''Mulimwizi mwalumi oyu azintu nzyawaamba.'' ¹² Bakati, ''Nkubeja ooko. Twambile.'' Jehu wakavwiila, ''Wakaamba eechi achechiya kuli ndime, alimwi wakati, 'Mbuboobu Yahuwe mbwaawamba: Ndakunanika kuba mwami wa Izilayeli.'' ¹³ Mpawo umwi awumwi wabo wakafwambaana kugwisya chisamo chaakwe chaatala akuchibikka munsi lya Jehu aatala lyazilyatililo. Bakasiba mweembo akwaamba kuti, ''Jehu waba mwami.'' ¹⁴ Muli eyii inzila Jehu mwana mulombe wa Josafati mwana mulombe wa Nimishi takeendelana a Jolamu. Lino Jolamu wakali kukwabilila Lamoti Giliyadi, lwakwe a Izilayeli yoonse, akaambo ka Hazayeli mwami wa Alamu, ¹⁵ pesi mwami Jolamu wakali wabweeda ku Jezilili kukusilikwa zilonda eezyo nzibakali bamupa ba Alamini, awo nakali walwana a Hazayeli mwami waku Alamu. Jehu wakati kubabelesi ba Jolamu, ''Kuti oyu ngomuzeezo wanu, nkinkaako tamuchiti kuti umwi achiije azwe mudolopo, mukuchitila kuti ayinke kuyowambila Jezelilu makani aya.'' ¹⁶ Nkinkaako Jehu wakanjila munkalaki kuya ku Jezeleli; mukuti Jolamu wakali kulyookezya nkuukoko.Lino Ahaziya mwami wa Juda wakali waselela aansi kuzobona Jolamu. ¹⁷ Mwaalumi sikulinda wakalimvwi abusena bulamfu mu Jezelilu, akubona inkamu ya Jehu aawo kayobuza kule kule; wakati, ''Ndibwene chibunga chabantu bayoobuza.'' Jolamu wakati, ''Bweza muntu wabbiza, umutume aanze akabaswanizye: mumwambile akateedi, 'Muyobuza mulumuuno na?'' ¹⁸ Nkiinkako wakatumwa mwaalumi kagede bbiza kuyomuswanizya; wakati, ''Mwami waamba boobu: 'Muyobuza muluumuno na?'' Nkiinkako Jehu wakati, ''Uli amulimoonzi aluumuno? chengunuka utobele kusule lyangu.'' Mpaawo mwalumi sikulinda wakaambila mwami. ''Sikutumwa wabaswaana, pesi tali kuboola pe.'' ¹⁹ Mpawo wakatuma mwaalumi wabili kagede bbiza, oyo wakasika kuli mbaabo akwaamba kuti, ''Mwami waamba boobu; 'Muyobuza muluumuno na?'' Jewu wakavwiila, ''Uli amulimoonzi alumuno? Chengunuka utobele kusule lyangu.'' ²⁰ Alimwi mwalumisikulinda wakaambilizya, 'Wabaswaana, pesi tali kuboola pe. Obo inzila nkalaki njiyobwenzegwa aayo ninzila eyo Jehu mwana mulombe wa Nimishi njayenda aanjiyo; uyobweenda bunyaama.'' ²¹ Nkinkaako Jolamu wakati, ''Amubambile nkalaki yangu.'' Bakabamba inkalaki yakwe, alimwi Jolamu mwami wa Izilayeli a Ahaziya mwami wa Juda bakagada babbuda, awumwi munkalaki yakwe, kukuyoswanizya Jehu. Bakakumujana kubusena ba Nabboti mu Jezililu. ²² Awo Jolamu nakabona Jewu, wakati, ''Uyobuza muluumuno na, Jewu?'' Wakavwila, ''Kuli lumuunonzi kakuli inchito zyakweemuzya zyabusangu abulozi bwabanyoko Jezebbelu zyavulisya boobu? ²³ Nkiinkako Jolamu wakachengununa inkalaki yakwe wachiija akwambila Ahaziya kuti, ''Kuli nkondo, Ahaziya.'' ²⁴ Mpawo Jewu wakakwela mudaantambwa wakwe anguzu zyakwe zyoonse akuyasa Jolamu aakati kamakkuko; kavwi kakiinda mumoyo wakwe, alimwi wakavundama aansi munkalaki yakwe. ²⁵ Mpawo Jewu wakati kuli Bbidika silutwe wakwe, ''Mumubweze mumuwaale mumuunda wa Nabboti mu Jezililu. Yeeya kuti biyeni aawo iwe andime nitwakachijanina Ahabbu wisi, Yahuwe wakabikka basinsimi bakwe mukuteendelana anguwe: ²⁶ 'Ijilo ndakabona gazi lya Nabboti agazi lyabana bakwe balombe - wabbusya Yahuwe - alimwi chanchoonzyo ndiyochita kuti mukazibbadalile aamunda ooyu - wabbusya Yahuwe, Lino mpawo, mumubweze alimwi mumusowe amuunda ooyu, mbuli kujwi lya Yahuwe.'' ²⁷ Awo Ahaziya mwami wa Juda nakabona eezi wakachija katansya mugwagwa kuyaku Bbeti Hagani. Pesi Jewu wakamutobela, akwaamba kuti, ''Mumujaye alakwe munkalaki,'' alimwi bakamuyasa kumatantilo a Gaha, kali kumbali a Ibbilimu. Ahaziya wakachijila ku Megido akuyofwida nkuko. ²⁸ Babelesi bakwe bakabweza mubili wakwe munkalaki kuya ku Jelusalema akuyomuvwikka muchuumbwe chakwe antoomwe amawisi mudolopo lya Deviti. ²⁹ Lino kwakali mumwaaka wakkumi awumwi wa Jolamu mwana mulombe wa Ahabbu kuti Ahaziya katalikide kwendelezya Juda. ³⁰ Muchiindi Jehu nakasika ku Jezililu, Jezebbelu wakazimvwa zyakachitika, alimwi wakalambika menso aakwe, wabamba masusu aakwe, alimwi walanga aanze ampulunguzyo. ³¹ Aawo Jewu nakali kunjila kumulyango, wakati kuli nguwe, ''Ulikuza muluumuno na, iwe Zimuli, amujayi wasimalelo wako?'' ³² Jewu wakalanga kujulu ampulunguzyo akwaamba kuti, ''Ngwani uuli kubbazu lyangu? Ngwani?'' Mpawo babili naa batatu bazibe bakalanga aanze. ³³ Nkiinkako Jewu wakati, ''Mumuwaale aansi. ''nkinkaako bakamuwaala ansi Jezebbelu, alimwi limwi gazi lyakwe lyakatampukila kubulambo akumabbiza, alimwi Jewu wakaligubbula kunsi amawulu aakwe. ³⁴ Awo Jewu nakanjila mung'anda yabwami wakalya akunywa. Mpawo wakati, ''Mubone lino kuli ooyu mwanakazi simulandu alimwi mumuvwikke, nkambo mwana musimbi.'' ³⁵ Bakayinka kuyomuvwikka, pesi tabayojene mutumba mutumba wakwe pe ado ifuwa lyamutwe, mawulu, azituta zyamaboko aakwe. ³⁶ Nkiinkako bakaboola kuzowambila Jewu. Wakati, ''Eeli ndijwi lya Yahuwe ndyaakamba kuzwa kumuselezi wakwe Elayija mu Tishibbi, kati, ''Munyika ku Jezelilu babwa bayoolya nyama ya Jezebbelu, ³⁷ uyooba mbuli mafumba aatala amyuunda munyika ku Jezililu, kuchitila kuti takukabi utakakonzye kwaamba kuti, ''Ooyu ngu Jezebbelu.''''