¹ Lino Elisya wakaambila mwanakazi ooyo uli a mwana wakwe mulombe wakabwedezegwa kubuumi. Wakati kulinguwe, ''Nyampuka, alimwi wiinke aben'anda yako, alimwi ukakkale kufumbwa nkokonzya kuliimwi nyika, nkaambo Jehova wayita nzala eeyo itakasike munyika iino kwaminyaka iili musanu ayibili.'' ² Aboobo mwanakazi wakanyampuka alimwi wakalemeka ijwi lya muntu wa Leza. Wakayinka aben'anda yakwe alimwi wakukkala munyika ya ba Filisitiya minyaka iili musanu ayibili. ³ Kwakasika kuchiindi minyaka iili musanu ayibili niyakayanda kumana aawo mwanakazi nakaboola kuzwa kunyika ya ba Filisitiya, alimwi wakayinka ku mwaami kuyoomukombelezya akaambo ken'anda yakwe a nyika yakwe. ⁴ Lino mwaami wakalikwaambula a Gehazi mulanda wamuntu wa Leza, kalikuti, ''Inche kaka kondaambila zintu zyoonse zipati Elisya nzyakachita.'' ⁵ Mpawo nakachilikwaambila mwaami kuti Elisya wakabwedezya biyeni kubuumi mwana wakafwide, lwakwe mwanakazi uli amwana wakwe mulombe wakabwedezegwa kubuumi wakasika kuzokombelezya mwaami akaambo ken'anda yakwe anyika. Gehazi wakati, ''Simalelo wangu, mwaami, ooyu ngonguwe mwanakazi, alimwi ooyu nguwe mwana wakwe mulombe, ooyo Elisya ngwakabwedezya kubuumi.'' ⁶ Eelyo mwaami nakabuzya mwanakazi aatala amwana wakwe mulombe, wakapandulula kulinguwe. Aboobo mwaami wakalayilila umwi wabeendelezi kulinguwe, kati, ''Amumubweedezya kulinguwe zyoonse zyakali zyakwe azyoonse zilyo zyamyuunda yakwe kuzwa buzuba mbwakazwa nyika kusika lino.'' ⁷ Elisya wakasika ku Demasikkasi ooko Bbeni Hadadi mwaami wa Alamu nkwakachisidwe. Mwaami wakaambilwa, ''Muntu wa Leza wasika ookuno.'' ⁸ Mwaami wakati kuli Hazayeli, ''Bweza chipo mumaboko aako alimwi wiinke ukaswaanane amuntu wa Leza, alimwi ukamvwe kuli Jehova kwiinda mulinguwe, kuti, 'Ndilapona na kuchilwazi eechi?''' ⁹ Aboobo Hazayeli wakayinka kuyooswaanana awe alimwi wakabweza chipo anguwe chamusyobo mubotu woonse wa mu Damasikkasi, chakabwezedwe ankamela zili makkumi one. Aboobo Hazayeli wakasika alimwi wayimikila kunembo lya Elisya alimwi wati, ''Mwana wako mulombe Bbeni Hadadi mwaami wa Alamu wandituma kulinduwe, wati, ''Kujana ndiyoopona na kuchilwazi eechi?''' ¹⁰ Elisya wakati kulinguwe, ''Inka, utedi kuli Bbeni Hadadi, 'Nchobeni uyoopona,' pesi Jehova wanditondeezya kuti nchobeni uyoofwa.'' ¹¹ Mpawo Elisya wakamulangisisya Hazayeli kusikila waba eensoni, alimwi mutu wa Leza wakalila. ¹² Hazayeli wakabuzya, ''Nkaambonzi nolila, simalelo wangu?'' Wakasandula, ''Nkaambo ndilizi bubi mboya kukuchita kubana ba Izilayeli. Uyootenta zilawo zyabo zisimide mumulilo, alimwi uyoojaya baalumi babo baniini apanga, uyoogonkoola muzimpanzi bana babo baniini, alimwi uyooyawula banakazi babo bamitide.'' ¹³ Hazayeli wakasandula, ''Ngwani mulanda wako, unga ulachita chintu chipati eechi? Munkala biyo.'' Elisya wakasandula, ''Jehova wanditondeezya kuti uyooba mwaami aatala a Alamu.'' ¹⁴ Mpawo Hazayeli wakasiya Elisya alimwi waya kuli simalelo wakwe, wakati kulinguwe, ''Watyeni Elisya kulinduwe?'' Wakasandula, ''Wandaambila kuti nchakasimpe ulapona.'' ¹⁵ Mpawo buzuba butobela Hazayeli wakabweza tebwe alimwi wakalinika mumaanzi, alimwi walivumba kubusyu bwa Bbebni Hadadi kuchitila kuti afwe. Mpawo Hazayeli wakaba mwaami mubusena bwakwe. ¹⁶ Mumunyaka wamusanu waJolamu mwana mulombe wa Ahabbu, mwaami wa Izilayeli, Jeholamu wakatalika kweendeezya. Wakali mwana mulombewa Jehosyafati mwaami wa Juda. ¹⁷ Jeholamu wakali aminyaka ili makkumi otatwe eelyo nakatalika kweendelezya, alimwi wakeendelezya kwaminyaka ili musanu ayitatu mu Jelusalema. ¹⁸ Jeholamu wakeenda munzila zya baami ba Izilayeli, mbuli n'anda ya Ahabbu mbuyakali kuchita; akaambo kakuti wakali amwana musimbi wa Ahabbu kali mukayintu wakwe, alimwi wakachita eezyo zibi kunembo lya Jehova. ¹⁹ Nikubaboobo, akaambo kamulanda wakwe Deviti, Jehova takayanda pe kunyonyoona Juda, mukuti wakali wamwaambila kuti uyoomupa lunyungu lyoonse. ²⁰ Mumazuba aa Jeholamu, Idomu wakapapa uzwa munsi lyaluboko lwa Juda, alimwi bakalibikila mwaami aatala lyabo. ²¹ Mpawo Jeholamu wakatimbula ku Ziya ankalaki zyakwe zyoonse. Eelyo ba Idomu nibakazyunguluka Jeholamu, beendelezi be nkalaki zyakwe bakabuka alimwi bakabalwana mansiku; pesi basilumamba ba Jeholamu bakachija alimwi bakabweda kumyuunzi yabo. ²² Aboobo Idomu wakaba mukupapila bweendelezi bwa Juda kusikila buzuba oobuno. Libbina alubo wakapapa muchindi chimwi. ²³ Mbuli kuli aamwi makani aatala a jeholamu, zyoonse nzyakachita, tazilembedwe na mubbuku lyazichitiko zyabaami ba Juda? ²⁴ Jeholamu wakalyookezya a bamataata bakwe alimwi wakavwikwa ambabo muchisi cha Deviti.Mpawo Ahaziya mwana wakwe mulombe wakaba mwaami mubusena bwakwe. ²⁵ Mumunyaka wakkumi ayibili wa Jolamu mwanan mulombe wa Ahabbu, mwaami wa Izilayeli, Ahaziya mwana mulombe wa Jeholamu, mwaami wa Juda, wakatalika kweendelezya. ²⁶ Ahaziya wakali aminyaka ili makkumi obile-ayibili kukomena eelyo nakatalika kweendelezya; wakeendelezya kwamunyaka omwe mu Jelusalema. Zina lyabanyina bakwe wakali Ataliya; wakali mwana musimbi wa Omuli, mwaamiwa Izilayeli. ²⁷ Ahaziya wakeenda munzila zyen'anda ya Ahabbu; wakachita ezyo zyakali zibi kunembo lya Jehova, mbuli n'anda ya Ahabbu mbuyakalikuchita, nkaambo Ahaziya wakali mukwaansa ku n'anda ya Ahabbu. ²⁸ Ahaziya wakayinka a Jolamu mwana mulombe wa Ahabbu, kuyoolwana Hazayeli, mwaami wa Alamu, ku Lamoti Giliyadi. Ba Alamini bakachisa Jolamu. ²⁹ Mwaami Jolamu wakaboola kuzooponesegwa zilonda ku Jezilelu eezyo ma Alamini nzibakamupa ku Lama, eelyo nakalwana a Hazayeli mwaami wa Alamu. Aboobo Ahaziya mwana mulombe wa Jeholamu, mwaami wa Juda, wakaseluka kwiinka kuli Jezeliyeli kuyoobona Jolamu mwana mulombe wa Ahabbu, nkaambo Jolamu Jolamu wakali wachiswa.