¹ Mumwaka wabili wa Jowasyi mwana mulombe wa Jowazi, mwami wa Izilayeli, Amaziya mwana wa Jowasyi, mwami waba Juda, wakatalika kwendelezya. ² Wakali amyaaka ilikkumi amusanu mpakatalika kwendelezya; wakeendelezya kwamyaaka ilikkumi ayibili amusanu ayine ku Jelusalemu. Izina lyabanyina lyakali Jehowadani, waku Jelusalemu. ³ Wakachita zibotu mumenso a Jehova, nikuba katasikide kuli wisi Davida. Wakachita zyoonse Jowasyi, wisi nzyakachitide. ⁴ Pesi zipayililo zyakuzilundu tezyakatolwa pe. Ibantu batachili kupayila akuteenta tununkilizyo kuleezyo zipayililo. ⁵ Zyakachitika kuti bwendelezi bwakasimpisya mumaanza aakwe, wasikujaya balanda bakajiide wisi, mwami. ⁶ Pesi takajaya bana balombe babalanda aba; pele, mbuli mbukulembedwe mubbuku lyamulawo wa Mozesi, mnuli Jehova mbwaakamba kuti, ''Bawisi tabeelede kujiilwa zibi zyabana babo, abalo bana tabeledwe kujiilwa bazyali babo. Pele, umwi awumwi muntu, welede kujiilwa chibi chakwe.'' ⁷ Wakajaya basilumamba ba Edomu bali zyuulu zilikkumi mukkuti lya Sawuti; wakabweza Sela munkondo wasikuchita kuti Jokitili, kuli mbombubo mbwichiitwa ambuli sunu. ⁸ Mpawo Amaziya wakatumwa kuli Jehowasyi mwana wa Mwami Jehu, kalikuti, ''Sika, tutangaane busyu kubusyu mukulwana.'' ⁹ Pesi Jehohasyi mwami wa Izilayeli wakatuma batumwa kumwami waba Juda Amaziya, kalikuti, ''Ikakoku kakali mu Lebbanoni kakatumina mulumbe kukasamu kategwa kaSida ku Lebbanoni, kalokuti, ''Pa mwana wako musimbi kumwana wangu mulombe abe mukayintu wakwe; pesi munyama wamusokwe wakiinda akulyata ikakoka aka. ¹⁰ Nisimpe wakazunda ba Edomu, amoyo wako wakuusumpula. Lisumpule akuzunda kwako, pesi ukkale mung'anda, nkambonzi koyelede kulyetelezya muliwisye, monse webo Juda?'' ¹¹ Pesi Amaziya takaswilila pe. Aboobo Jowasyi mwami wa Izilayeli wakazida ba Juda akwimikizyania a Mwami Amaziya ku Bbeti Syemesyi, yaku Juda. ¹² Bakazundwa ba Juda, aboonse balumi bakachija akwinka kumaanda abo. ¹³ Jowasyi mwami waba Izilayeli, wakabweza Amaziya, mwami waba Juda, mwana wa Ahaziya, ku Bbeti Syemesyi. Wakaza ku Jelusalemu akumwaya bulambo bwa Jelusalemu kuzwa kumulyango wa Ifulemu kuyosika kumulyango wachooko, tukokola tulimyaanda yone. ¹⁴ Wakabweza ngolide yoonse ansiliva, azyonse zintu mung'anda yamwami, abakali mubwaange boonse wakinka abo ku Samaliya. ¹⁵ Amwi makani alatala a Jehohasyi, azyonse nzyakachita; anzila njakalwanayo mwami waba Juda, tazilembedwe na mumalembe anchito zya baami ba Izilayeli? ¹⁶ Aboobo Jehohasyi wakazikwa amawisikulu akwe ku Samaliya alimwi abaami ba Izilayeli, a Jelobbowamu, mwanakwe mulombe wakaba mwami mubusena bwakwe. ¹⁷ Amaziya mwana mulombe wa Jowasyi, mwami waba Juda, wakapona kwamyaaka ilikkumi amusanu musule akufwa kwa Jehohasyi mwana wa Jehowazi, mwami wa Izilayeli. ¹⁸ Amwi makani aatala a Amaziya, talembedwe na mumalembe anchito zyabaami baba Jusa? ¹⁹ Bakamuvwiya Amaziya mu Jelusalemu, wasikuchijila ku Lakkisyi, pesi bakatuma baalumi kuti bamutobele akuyomujaya nkukooko. ²⁰ Bakamuboozya amabbiza, wakazozikwa amawisikulu akwe mumunzi wa Davida. ²¹ Ba Juda boonse bakabweza Azaliya, wakala minyaka ilikkumi amusanu awumwi, bamubika kuti abe mwami mubusena bwawisi Amaziya. ²² Ngu-Azaliya wakayakulula Elati akwibwedezya ku Juda musule lyakufwa kwa Amaziya. ²³ Mumwaka wakkumi amusanu wabwami bwa Amaziya mwana mulombe wa Jowasyi, mwana waba Juda, Jelobbowamu mwana wa Jehohasyi mwami waba Izilayeli wakatalika kwendelezya ku Samaliya; wakeendelezya kwamyaka ilimakumi oone awumwi. ²⁴ Wakachita zintu zibi kubusyu bwa Jehova. Takwepe nakazwa muzibi zyoonse zyakachitwa a Jelobbowamu mwana wa Nebbati, wakachitide kuti Izilayeli abisye. ²⁵ Wakabwedezya mugaano wa Izilayeli kuzwa ku Lebbo Hamati kuyosika kulwizi lwa Alabba, kalokutobela kwamba kwa Jehova, nkwakambwide kwindila mumulanda wakwe Jona, mwana wa Amitayi, musinsimi wakali kuzwa ku Gati Hefa. ²⁶ Nkambo Jehova wakabona kupengaana kwa Izilayeli, akali aluula luu kuli wonse muntu, boonse bazike abangunukide, akuti takwepe walikuno wangununa Izilayeli. ²⁷ Aboobo Jehova wakaamba kuti, tokozima izina lya Izilayeli aansi ano pe; pele, wakabavuna ba Izilayeli ajanza lya Jelobbowamu mwana mulombe wa Jehohasyi. ²⁸ Amwi makani alatala a Jelobbowamu, azyoonse nzyakachita, manguzu aakwe, anzila njakalwanisya nkondo, akuboozya Damasikkasi a Hamati zyakali zyatolwa aba Juda kubana ba Izilayeli, tazilembedwe na mumalembe anchito zyabaami ba Izilayeli? ²⁹ Jelobbowamu wakazikwa amawisikulu, abaami ba Izilayeli, Zekkaliya wakaba mwami abusena bwakwe.