¹ Mumunyaka wa musanu ayibili wa Jehu, kweendelezya kwa Jowasyi bwakatalika; wakeendelezya kwaminysaka iili makkumi one mu Jelusalema. Izina lyabanyina lyakali Zibbiya, waku Bbiyasyebba. ² Jowasyi wakalikuchita ziluzi mumenso a Jehova choonse chiindi, nkaambo kakuti Jehoyada mupayizi wakali kumulayilila. ³ Pesi masena akali aajulu takabwezwa pe. Bantu bakachili kupayilila akutenta tununkilizyo aamasena ali aajulu. ⁴ Jowasyi wakati kubapayizi, ''Yoonse mali eeyo yeetwa mbuli zipayizyo zyazipo zisalala mun'anda ya Jehova, eeyo mali umwi awumwi njalangwa aayo - nikuba nimali yabunganisigwa kuzwa mukubalwa na, na mali yatambulwa muchisyomezyo chakulipeda, na mali yayetwa abantu babotezegwa a Jehova mumyoyo yabo kuti bape - ⁵ bapayizi baleelede kutambula kuzwa kuli umwi wabasikubamba mali alimwi abambulule kufumbwa chifwide muchikombelo.'' ⁶ Pesi mumunyaka wa makkumi-abili ayitatu ya Mwaami Jowasyi, bapayizi tebakalinaabambulula chintu muchikombelo. ⁷ Mpawo Mwaami Jowasyi wakiita Jehoyada mupayizi alimwi abamwi bapayizi; wakati kulimbabo, ''Nkaambonzi nimwatabamba chintu muchikombelo? Lino mutakabwezi limbi mali kuzwa kuli basikubbadala mutelo banu, pesi mukabweze eezyo zyali zyabikwa aamwi kuti zibambe chikombelo alimwi mukape aabo batabambulule.'' ⁸ Aboobo bapayizi bakazuminana kuti tabakoyoobweza limbi pe mali kuzwa kubantu alimwi tabakoyoobambulula chikombelo lwabo. ⁹ Pesi, Jehoyada mupayizi wakabweza bbokesi, wakadonkola mpako muchijazyo chalyo, alimwi wakalibika kumbali lya chipayililo, kubbazu lyalulyo mbuli uwmi nanjila mun'anda ya Jehova. Bapayizi bakali kulinda mulyango wachikombelo bakabika mukati mulindilyo mali yoonse yakeetedwe mun'anda ya Jehova. ¹⁰ Aawo nibakabona kuti kwakaba mali nyingi mubbokesi, mulembi wa mwaami alimwi bapayizi bapati bakalikusika akubika mali muzikkwama alimwi akwiibala, mali yakajanwa muchikombelo cha Jehova. ¹¹ Bakapa mali eeyo yakali yeelwa mumaboko a baalumi aabo bakabamba chikombelo cha Jehova. Bakiibbadala kuli basikubeza alimwi abayaki aabo bakabeleka chikombelo cha Jehova, ¹² alimwi a kuli basikuyaka amabwe a basikupwaya mabwe, kukuula mapulanga akupwaya mabwe akubambulula chikombelo cha Jehova, alimwi akuli zyoonse zyakali kuyanda kubbadalwa kukwiibambulula. ¹³ Pesi mali yakeetwa mun'anda ya Jehova teyakabbadalwa kuti ichite nikuba nkomeki zyansiliva, basikubika malampi, nkwalaata, myeembo, na bubumbe bwa ngolide na nsiliva. ¹⁴ Bakapa mali eeyi kuli baabo bakachita mulimu wakubambulula n'anda ya Jehova. ¹⁵ Mukuyungizya, tebakayanda kuti mali yakali yabbadalwa mukubambulula yambilwe aatala a baalumi bakayitambula akuyibbadala kuli basikubeleka, nkaambo kakuti aaba baalumi bakalisyomekede. ¹⁶ Pesi mali yazipo zyabasimilandu alimwi amali yazipo zyazibi teyakalikweetwa pe mun'anda ya Jehova, nkaambo kakuti yakali ya bapayizi. ¹⁷ Mpawo Hazayeli mwaami wa Alamu wakabukila akulwana Gati, alimwi wakiibweza. Mpawo Hazayeli wakabweeda akuyoobukila Izilayeli. ¹⁸ Jowasyi mwaami wa Juda wakabweza zyoonse zintu Jehosafati a Jeholamu a Ahaziya, mataata bakwe, baami ba Juda, nzibakali babika kumbali, alimwi nzyakali wabika kumbali, alimwi angolide yoonse yakajanika mun'anda zyakubambila zya Jehova a ya mwaami alimwi wakazitumizya kuli Hazayeli mwaami wa Alamu. Mpawo Hazayeli wakayinka kuzwa mu Jelusalema. ¹⁹ Mbuli kuli aamwi makani aatala a Jowasyi, zyoonse nzyakachita, tazilembedwe na mubbuku lyamakani abaami ba Juda? ²⁰ Balanda bakwe bakanyampuka alimwi bakabamba aantomwe; bakabukila Jowasyi ku Bbeti Milo, munzila iiselukila ku Sila. ²¹ Jozabbedi mwana mulombe wa Simiyati, a Jehozabbedi mwana mulombe wa Someli, balanda bakwe, bakamukbukila, alimwi wakafwa. Bakavwika Jowasyi abasikale bakwe muchisi cha Deviti, alimwi Amaziya, mwana wakwe mulombe, wakaba mwaami mubusena bwakwe.