¹ Lino eelyo Ataliya, banyina ba Ahaziya, nakabona kuti mwana wakwe mulombe wafwa, wakanyampuka alimwi wakajaya boonse bana babwaami. ² Pesi Jehosyebba, mwana musimbi wa mwaami Jeholamu alimwi muchizi wa Ahaziya, wakabweza Jowasyi mwana mulombe wa Ahaziya, alimwi wakamusisa kuzwa kuli bamwi bana balombe ba mwaami bakajiigwa, aantomwe abalondozi; wakababika mun'anda yakulala. Bakamusisa kuzwa kuli Ataliya kuchitila kuti atajayigwi. ³ Wakakkala aawe kwaminyaka iili musanu awumwi, kasisidwe mun'anda ya Jehova, aawo Ataliya mpakeendelezya nyika. ⁴ Mumunyaka wamusanu ayibili, Jehoada wakatuma milumbe alimwi wakeeta zyuulu zyabasilutwe ba Kkalitesi abasikulinda, alimwi wakabeeta kulinguwe, muchikombelo cha Jehova. Wakachita chizuminano ambabo, alimwi wakabachita kuti bakonke chikonke mun'anda ya Jehova. Mpawo wakabatondeezya mwana mulombe wa mwaami. ⁵ Wakabalayilila, wakati, ''Eezi nzizyo nzimweelede kuchita. Chimpanzi chanu chatatu mukkumi aabo baza mu Sabata bayoobaba n'anda ya mwaami, ⁶ alimwi chimpanzi chatatu mukkumi chiyooba a Mulyango wa Suli, alimwi chimpanzi chatatu mukkumi amulyango musule lyan'anda yakulinda.'' ⁷ Tumwi tubunga tutabeleki mubuzuba bwa Sabata, tweelede kulanga n'anda ya Jehova kuchitila mwaami. ⁸ Mweeelede kuzyunguluka mwaami, woonse mwaalumi azilwanisyo zyakwe mumaboko aakwe. Kufumbwa unjila mumasena anu, ngajayigwe. Mueelede kukkala amwaami eelyo nayinka anze, alimwi eelyo naboola. ⁹ Aboobo basilutwe bazyuulu bakalemeka zyoonse Jehoyada mupayizi nzyakabalayilila. Umwi awumwi wakabweza baalumi bakwe, aabo bakeelede kuza kuzoobeleka mubuzuba bwa Sabata, alimwi abaabo bakeelede kuleka kubeleka mubuzuba oobo bwa Sabata; alimwi bakaza kuli Jehoyada mupayizi. ¹⁰ Mpawo Jehoyada mupayizi wakapa basilutwe bazyuulu masumu antobo eezyo zyakali zya Mwaami Deviti alimwi eezyo zyakali mun'anda ya Jehova. ¹¹ Aboobo balindizi bakiimikila, umwi awumwi mwaalumi achilwanisyo chakwe mukuboko kwakwe, kuzwa kubbazu lyalulyo lyachikombelo kusika kubbazu lyachimwensi, afwifwi achipayililo a chikombelo, kabazyungulukide mwaami. ¹² Mpawo Jehoyada wakagwisya mwana mulombe wa mwaami Jowasyi, wabika musini alinguwe, alimwi wamupa malayilile achizuminano. Mpawo bakamuchita mwaami alimwi bakamunanika. Bakakambilila maboko aabo alimwi bakati, ''Kupona kulamfu mwaami!'' ¹³ Eelyo Ataliya nakamvwa musindo wa balindizi a wa bantu, wakasika kubantu bakali mun'anda ya Jehova. ¹⁴ Wakalanga, alimwi, wakabona, mwaami wakaliimvwi aambandama, mbuli kwakabede chiyanza, alimwi basimufumbo a basikulizya myeembo bakali a mwaami. Boonse bantu bamubusena bakali kubotelwa akulizya myeembo. Mpawo Ataliya wakazapuula zizwato zyakwe alimwi woompolola, ''Tilizono! Tilizoni!'' ¹⁵ Mpawo Jehoyada mupayizi wakaambila basilutwe bazyuulu aabo bakali aaatala alumamba, wakati, ''Mumweete anze aakati kazigaba. Kufumbwa umutobela, amumujaye apanga.'' Nkaambo mupayizi wakaamba kuti, ''Mutamuleki ajayilwe mun'anda ya Jehova.'' ¹⁶ Aboobo bakamukwempa aawo nakasika abusena ooko mabbiza nkwaanjila mulubuwa lwa bwaami, alimwi ooko wakajayigwa. ¹⁷ Mpawo Jehoyada wakachita chizuminano aakati ka Jehova alimwi a mwaami abantu, kuti bayooba bantu ba Jehova, alimwi alubo aakati ka mwaami abantu. ¹⁸ Aboobo boonse bantu bamubusena bakayinka kun'anda ya Bbaali alimwi akwiiwisizya aansi. Bakapwayuula zipayililo zya Bbaali alimwi zyiiminini zyazileza zyakwe muzimpazi, alimwi bakajaya Matani, mupayizi wa Bbaali, kunembo lyazipayililo eezyo. Mpawo Jehoyada mupayizi wakasala balindizi bachikombelo cha Jehova. ¹⁹ Jehoyada wakayinka ambabo basilutwe bazyuulu, ba Kkalitesi, mulindizi, alimwi aboonse bantu bamuchisi, alimwi aantomwe bakeeta mwaami aansi kuzwa kun'anda ya Jehova alimwi bakanjila mun'anda ya mwaami, kabanjila anzila yakumulyango wabalindizi. Jowasyi wakabweza busena bwakwe achuuno habwaami. ²⁰ Aboobo bantu boonse bamubusena bakabotelwa, alimwi chisi chakaluumwide musule lyakujiigwa kwa Ataliya apanga kun'anda ya mwaami. ²¹ Jowasyi wakali aminyaka ili musanu ayibili eelyo nakatalika kweendelezya.