¹ Boonse bantu ba Juda bakabweza Uziya, ooyo wakali aaminyaka ikkumi amusanu awumwi wakuzyalwa kwakwe, akumubika aabusena bwawisa Amaziya. ² Nguwe wakayakulula Elati akubweedezya kuli Juda. Kuzwa aawo mwami wakoona abasikale bakwe. ³ Uziya wakali aaminyaka kkumi amusanu awumwi yakuzyalwa kwakwe elyo naakatanguna kweendelezya. Wakeendelezya kwaminyaka ilimakkumi musanu ayibili mu Jelusalema. Izina lyabanyina kali Jekkoliya, wakalikuzwa muJelusalemu. ⁴ Wakachita ziluleme kumenso aaJehova, kalookuyobelezya zitondeezyo zyawisi, Amaziya, muli zyoonse. ⁵ Wakabambila lwakwe kukuyanduula Lezamumazuba aaZakkaliya, wakamuyiisya kulemeka Leza. Kufumbwa awo makani kuyanduula Jehova, Leza wakamuchita kuzwidilila. ⁶ Uziya wakayinka aanze alimwi akuyoolwisya baFilisitiya. Wakadilisizya aansi malambo amugunzi lya Gati, aku Jabbineya, alimwi aku Asidodi; wakayaka mugunzi munyika ya Asidodi alimwi aakati kama Filisitiya. ⁷ Leza wakamugwasya kulwisya ma Filisiyiya, akulwisya ma Alabbiya baliikukkala mu Gubbala, alimwi akulwisya ma Amuyunetisi. ⁸ Ma Amoni bakabbadala mitelo kuli Uziya, alimwi mpuwo yakeendelela, akuyoosika kumilyango yamu Ijipiti, nkaambo wakalkuba manguzu miingi loko. ⁹ Mukuyungizya, Uziya wakayaka zisanza mu Jelusalema kumulyango wa Chooko, kumulyango wamukkuti, alimwi bulamba mpubunyonena, alimwi wakayumya. ¹⁰ Wakayaka zisanza zyakulangila munkanda. Akusya mikalo mingi mumakuti amuntandabae.Wakali aabulumi basikulima masaansa mutulundu alimwi mumyuunda ilabutebuzi, nkaambo wakali kuyandisya kulima. ¹¹ Mukuyungizya, Uziya wakaliaampi yabaalumi balwana bakabbuda kuya kunkondo muzibunga eezyo zyakabambidwe mumweelwe wabo wakabalidwe a jeyiyeli, mulembi, amaseyiya, silutwe, waansi abwendelezi bwa Hananiya, umwi wabapati bamwaami. ¹² Mweelwe wabazulwidi bampili aabo bakazulwida basinguzu babaalumi bakali 2,600. ¹³ Munsi lyajanza lyamwakali mpi yabaalumi bali 307,500 balumi abo bakachita nkondo anguzu mpati kukugwasya mwaami kukulwisya sinkondonyina. ¹⁴ Uziya wakababambila -bampi yoonse- ntobo, masumu, nguwani, azibaki zyakulwisya, atunta, mabwe akutuluzya. ¹⁵ MuJelusalemu wakapanga minchina yakabambidwe aabalumi bakali aalizibo kuti ibe aatusanza alimwi amalambo malamfu aakuwalila tunta amabwe mapati. Mpuwo yakwe yakazulila mumanyika aakule, nkaambo wakagwasigwa kapati alimwi wakaba aamanguzu miingi. ¹⁶ Pesi kuchiindi Uziya nchakaba aanguzu mpati, moyo wakwe wakasumpulwa aboobo wakachita zintu zitaluleme; wakabisizya Jehova Leza wakwe, nkaambo wakayinka mung'anda ya Jehova kukutenta tununkilizyo atala aachipayililo chatununkilizyo. ¹⁷ Azaliya, mupayizi, wakamutobela mukkati, alimwi abapayizi bali musanu abatatu ba Jehova, baalumi basichaamba. ¹⁸ Nkabela bakamulula mwaami Uziya, akwaamba kuti kuli nguwe, ''Teensi nzizyako eezi, Uziya, kuti utente tununkilizyo kuli Jehova, pesi nzyabapayizi, balunyungu lwa Aloni, aaba basalazigilwe kukutenta tununkilizyo. muzwe mubusena busalala, nkaambo tewalisyomekede pe alimwi tukoyolemekwa a Jehova Leza.'' ¹⁹ Mpawo Uziya wakanyema kajisi chibikilo chatununkilizyo mujaanza lyakwe kuti atente tununkilizyo. Kuchiindi naakachinyemenede bapayizi, chipele chakaba aankumu yakwe kunembo lyabapayizi kung'anda ya Jehova, kumbali aachipayililo chatununkilizyo. ²⁰ Azaliya mupayizi mupati aboonse bapayizi bakamulanga, alimwi, amulange, waba aachipele kunkumu yakwe. Bakafwambaana kumugwisizya aanze. Nchobeni, alakwe wakafwambaana kuya aanze, nkaambo Jehova wakali wamuuma. ²¹ Uziya, Mwaami, wakali sichipele kusikila kubuzuba bwalufu lwakwe alimwi wakapona kung'anda ilaayilike kuzwa aawo nakaba sichipele nkaambo wakaliwagonkwa kuzwa kung'anda ya Jehova. Jotamu, mwanaakwe mulombe wakabweza ng'anda yamwaami weendelezya bantu ba nyika. ²² Amwi makani alangana a Uziya, kuzwa kumatangunino kosika kumamanino, akalembwa aamusinsimi Ayizaya mwana mulombe wa Amozi. ²³ Aboobo Uziya wakoona abasikale bakwe; wakamuzikka abasikale bakwe munyika yatubanda twabaami, nkaambo bakaamba kuti, ''Ngusichipele.'' Jotammu, mwana wakwe mulombe, wakaba mwaami mubusena bwakwe.