¹ Bantu bakali kukkala mu Jelusalema bakachita Ahaziya, mwana munini mulombe wa Jeholamu, mwaami mubusena bwakwe, kwakasika impuumba yabaalumi bakeza ama Alabbu bakanjila mumusansa bakajaya boonseni bana balombe bapati. Mpawo Ahaziya mwana mulombe wa Jeholamu, mwaami wa Juda, nguwakaba mwaami. ² Ahaziya wakali aminyaka makumi aabili aabili kukomena kwakwe nakatanguna kwendelezya; wakeendelezya kwamunyaka umwi mu Jelusalemu. Izina lyabanyina wakali Ataliya; kali mwana musimbi wa Omuli. ³ Alubo wakali kweenda munzila zyan'anda ya Ahabbu nkambo banyina bakali kumulayilila mukuchita zintu zibi. ⁴ Ahaziya wakali kuchita zibi kubusyu bwa Jehova, mbuli bakun'anda ya Ahabbu, mbubali kuchita, nkambo bakali baluliki bakwe akuzwa kulufu - lwawisi, kusikila kulunyonyooko lwakwe. ⁵ Alubo wakatobela lulayo lwabo; wakali kwenda a Jolamu mwana mulombe wa Ahabbu, mwaami wa Izilayeli, mukulwanisya Hazayeli, mwaami wa Alamu, ku Lamoti Giliyadi. Ba Alamu bakamuyasa Jolamu. ⁶ Jolamu wakabwedela kuyosilikwa zilonda ku Jezili ezyo nzibakamupa ku Lama, naka lwanisya Hazayeli, mwaami wa Alamu. Mpawo Ahaziya mwana mulombe wa Joholamu, mwaami wa Juda, wakakunukila kuli Jezeleli kuyobuna Jolamu mwana mulombe wa Ahabbu, nkambo Jolamu wakaliyasidwe. ⁷ Lino kunyoonyoka kwa Ahaziya kwakaletwa a Leza kwiinda kukuswaya kwa Ahaziya kuli Jolamu. Nakasika, wakeenda aamwi a Jeholamu kuyolwisya Jewu mwana mulombe wa Nimisi, oyo Jehova ngwakasalide kunyonyona n'anda ya Ahabbu. ⁸ Chakaba kuti, Jewu wakali kuchita lubeta lwa Leza kun'anda ya Ahabbu, awo mpaakajana basilutwe ba Juda abana balombe babakulana ba Ahaziya. Jewu wakabajaya. ⁹ Jewu wakalangula Ahaziya; bakamujata kayubide mu Samaliya, bakamweeta kuli Jewu, mpawo wamujaya. Eelyo bakamuzika, nkambo bakaamba kuti, ''Oyu mwana mulombe wa Jehosafati, wakali kuyandula Leza amoyo wakwe woonse.'' Mpawo n'anda ya Ahaziya teyakachili anguzu pe zyakwendelezya bwami. ¹⁰ Lino Ataliya, banyina aa Aahaziya, naakabona kuti mwana wakwe mulombe wafwa wakabuka akujaya boonseni bana ba mwaami mu n'anda ya Juda. ¹¹ Pesi Jehoshebba, mwana musimbi wamwaami, mukavwindi wakabweza Jowasi mwana mulombe wa Ahaziya wamutola kunze kuzwa kubana balombe abo bakali bayanda kujayigwa. Wakamubikka amuleli wakwe mun'anda yakoona. Lino Jehoshebba, mwana musimbi wamwaami Jeholamu, kali mwanakazi wa Jeyoyada mupayizi, (nkambo wakali muchizi wa Ahaziya), wakamuyubika kuzwa kuli Ataliya, kuchitila kuti Ataliya atamujayi. ¹² Wakali amwi ambabo, kabasisidwe mun'anda ya Leza kwaminyaka musanu awumwi. Ataliya kali kwendelezya munyika.