¹ Jehosafati wakoona abasikale bakwe alimwi wakavwikwa ambabo mumuunzi wa Devidi; Jeholamu, mwana wakwe mulombe, wakaba mwaami mubusena bwakwe. ² Jeholamu wakali aabakulana, bana bakwe balombe ba Jehosafati; Azaliya, Jehiyeli, Zekkaliya, Azaliyahu, Mikkayeli, a Shefatiya. Boonse aba bakali bana balombe ba Jehosafati, mwaami wa Izilayeli. ³ Wisi wabo wakapede zipo zipati zyansiliva, ngolida, azimwi zintu zibotu, akusimya madolopo mu Juda, pesi wakapa bwami kuli Jeholamu. ⁴ Lino Jeholamu wakabukila bwami bwawisi akuliyumya mbuli mwaami, wakajaya bakulana bakwe apanga, alimwi abamwi bazululi ba Izilayeli basiyenesiyene. ⁵ Jeholamu wakali aamyaka ilimakkumi aatatu ayibili nakatanguna kwendelezya, alimwi wakeendelezya mu Jelusalemu kwamyaaka musanu ayitatu. ⁶ Wakayenda munzila zyabami ba Izilayeli, mbubonya n'anda ya Ahabbu mboyakali kuchita, nkambo wakali kwete mwana musimbi wa Ahabbu, alimwi wakachita bubi mumenso a Jehova. ⁷ Nekubabobo, Jehova tewakayanda kunyonyoona n'anda ya Devidi, nkambo kachizuminano eecho nchakachitide a Devidi; wakasyomezezye kuti wali kunomupa buumi lyoonse alunyungu lwakwe. ⁸ Mumazuba a Jeholamu, Idomu wakapapa kuzwa kumanguzu aa Juda, alimwi bakalibikila mwaami wabo beni. ⁹ Eelyo Jeholamu wakazubuka abasilutwe bakwe ankalaki zyakwe zyonse. Kwakali mansiku nakanyamuka akulwana aatala aba Edomu aabo bakamuzyungulukide abasilutwe benkalaki zyakwe. ¹⁰ Mbubobu Idomu mbwakali mubupapi kuzwa kumanguzu aa Juda kusika kubuzuba bwamusanu. Libbuna alakwe wakapapa kuchiindi nchichonya kuzwa kumanguzu aakwe, nkambo Jeholamu wakaleka Jehova, Leza wabasikale bakwe. ¹¹ Mukuyungizya, Jeholamu alubo wakayakide masena malamfu mumalundu aa Juda alimwi wakachita bakkali bamu Jelusalemu kuti bapone mbuli basibuvuule, alimwi wakasowesya Juda ¹² Lugwalo lwakazwa kumusinsimi Elija lwakasika kuli Jeholamu. Lwakamba kuti, ''Ncheechi Jehova; Leza wa Devidi, sikale wako, nchaamba: Nkambo takwe nowakeenda munzila zya Jehosafati, wuso, na munzila zya Asa, mwaami wa Juda, ¹³ pesi bakeenda munzila zyabaami ba Izilayeli, alimwi wakachita Juda abakkali bamu Jelusalemu kuti bachite mbuli sibuvuule, mbuli n'anda ya Ahabbu mbuyakachita - mpawo nkambo wakajaya bakulana bako babotu kwinda nduwe - ¹⁴ Bona, Jdehova uyowuma aluumo lupati bantu bako, bana bako, banakazi bako, ambono zyako. ¹⁵ Webo lwako uyooba amachise manji abulwazi mumala aako, mane bulwazi bukachite mala ako kuti azwe aanze, alimwi eechi chiyoyendelela buzuba abuzuba.'' ¹⁶ Jehova wakasungilizya muya waba Falisi aatala Jeholamu, awaba Alabbiya aabo bakali aafwifwi aba Kkusi. ¹⁷ Bakalwanisya Juda, bakamubweza changuzu, akubweza buvubi boonse oobo bwakajanika mun'anda yamwaami. Alubo bakabweza bana bakwe balombe abanakazi bakwe. Taakwe mwana mulombe wakasyeede kulinguwe aado Jehoyahazi, mwana wakwe mulombe munini loko. ¹⁸ Musule azyoonse eezi, Jehova wakamuuma mumala aakwe abulwazi butasilikiki pe. ¹⁹ Kwakaba kuti nichakayinda chiindi, kumamamino aamyaka ibili, kuti mala aakwe akazwa aanze nkambo kamachise aakwe, akuti wakafwa abulwazi bupati. Bantutu bakwe tabamukunkilidile mulilo pe mukumulemeka mbuli mbobakachitide kuli basikale bakwe. ²⁰ Wakatanguna kwendelezya naakali amyaka makkumi aatatu ayibili; wakeendelezya mu Jelusalemu kwamyaaka musanu ayitatu, alimwi nakeenda taakwe pe wakamukwiila. Bakamuvwikka mudolopo lya Devidi, pesi tebakamuvwika kumavwikka aabami pe.