¹ Nichakayinda echi chakaba, kuti bantu ba Mowabbu aba Amoni, ambabo bamwi ba Meyunitisi bakaza kuli Jehosafati kuti bamulwane. (kubalwa Meyuni zyimikilila kubambululwa kubulembo bwachi Hebbulu, mbuli mbuzyakambwa aba Giliki bansiku kunsandululo. Bulembo bwachiindi bwachi Hebbulu bubalika boobo. Zyingi zyakabambululwa zyalino zizuminano kuti Meyuni wakali mutanzi abo) ² Mpawo bamwi bakasika abo bakambila Jehosafati, bakati, ''Makamu miingi alikuza kuzokulwisya kuzwida kulubazu lwaku lwizi lufwide, kuzwa ku Edomu. Bona, bali mu Hazazeni Tama,'' oyo ngonguwe, Engedi. (kulesi kuti Edomu, zyachiindi zyama Giliki amu Latini zyakusandulula azimwi zyelino zyakasandululwa zibala Alamu). ³ Jehosafati wakayoowa akubika lwakwe mwiini kuti ayanduule Jehova. Wakaambilizya kuba Juda boonse kuti balyiimyee. ⁴ Juda bakabungana antoomwe kuti bayandule Jehova; bakaza kuzoyandula Jehova kuzwa kumyunzi yoonse ya Juda. ⁵ Jehosafati wakayimikila kumbungano ya Juda a Jelusalemu, ku n'anda ya Jehova, kunembo alubuwa lupya. ⁶ Wakati, ''Jehova, Leza wabasikale besu, toyenensi Leza ul;ikujulu na? Toyensi mwendelezi wabwami boonse bwamasi na? Nguzu abupati zili mumaanza ako, aboobo takwe umwi ukonzya kukukakila. ⁷ Leza wesu, tenduwe na wakagwisya bakkali banyika eyi kunembo lyabantu ba Izilayeli, alimwi wakiipa kwalyonse kulunyungu lwa Abbulahamu? ⁸ Bakakkala mulinjiyo akukukyakila busena busalala mulinjiyo nkambo kazina lyako, akwaamba kuti, ⁹ 'na penzi lyatusikila - ipanga, na malwazi, na inzala - tuyoyimikila kunembo lya n'anda eyi, akunembo lyako ( nkambo izina lyako lili mun'anda eyi ), alimwi tuyokulilila mumapenzi esu, alimwi uyotumvwa akutufutula muchindi chakubeteka zimwi zyachiindi azyalino zyakusanduula, zibalika kuti zambangulwe. ¹⁰ Langa lino, mbaba bantu ba Amoni, Mowabbu aba Kuchilundu cha Seyili abo mbutakwe niwakalekela Izilayeli kuti ayilwisye chiindi nibakazwa munyika ya Ijiputi; nekuba boobo, Izilayeli wakabweda kuzwa kulimbabo alimwi takabanyonyoona pe. ¹¹ Bona mbobali kutupa bulumbu; balikuza kuzotugwisya kuzwa munyika yako eyo njiwakatupa kuti twikone. ¹² Leza wesu, tokoyo babeteka na? Nkambo tatukwe nguzu atala aampi eyi mpati izobuza kukutulwisya. Tatwizi chakuchita, pesi menso esu alikuli nduwe.'' ¹³ Ba Juda boonse bakimikila kunembo lya Jehova, abanini babo, banakazi, abana. ¹⁴ Mpawo akati kambungano iMuuya wa Jehova wakasika ali Jahaziyelu, mwana mulombe wa Zekkaliya, mwana wa Bbenayiya, mwana mulombe wa Jeyiyelu, mwana mulombe wa Mataniya, mu Levi alimwi kali walunyungu lwa Asafasi. ¹⁵ Jahaziyeli wakati, ''Muswilizye, moonse noba Juda anywebo nimukkala mu Jelusalemu, a mwaami Jehosafati. Eechi nchicho Jehova nchaamba kulindinywe, mutayoowi; mutatyompwi nkambo kaampi impati eeyi nkambo nkondo tenjiyenu, pesi kuli Leza. ¹⁶ Mulelede kwinka kuyobalwisya juunza. Bona, bazobuza enzila izwida ku Ziizi. Muyobajana kumamanino amusena, kunembo ankanda ya Jelulu. ¹⁷ Tamukoyoyanda kulwana munkondo eeyi. Amwime muzilawu zyenu, amwime mpawawo alimwi muyobona kuvuna kwa Jehova aalindinywe, Juda a Jelusalemu. Mutayoowi nikuba kutyompwa. Mwende mukabalwisye juunza, nkambo Jehova ulaandinywe.'' ¹⁸ Jehosafati waka kotamisya mutwe wakwe abusyu bwakwe aansi. Ba Juda boonse abakali kukkala mu Jelusalemu bakawa kunembo lya Jehova, bamukomba. ¹⁹ Ba Levi, aabo bakulunyungu lwaba Kkohatisi aba Kkolahitisi, bakayimikila akulumbayizya Jehova Leza wa Izilayeli, ajwi lyalompololo pati. ²⁰ Chifumo bakabuka akwiinka munkanda yaku Tekkowa. Mbubonya nibakazwa anze, Jehosafati wakayimikila akwamba kuti, ''Amundiswiilile, Juda, anywebo nobakkali baku Jelusalemu ! Musyome muli Jehova Leza wanu, alimwi muyogwasigwa. Musyome basinsimi bakwe, alimwi muyozwidilila. ²¹ Kuzwa nakabuzya bantu, wakasala aabo basikwimbila Jehova abaabo ibakalumbayizya akambo kabupati buyoosya nibakeenda kunembo aampi, bakamba kuti, ''Mupe kulumba kuli Jehova, nkambo chizuminano chakwe chisyomeka chiyobawo kwa lyoonse.'' ²² Nibakatalika kwimba akulumbayizya, Jehova wakayubika balumi kuyolwisya bantu ba Amoni, Mowabbu, akuchilundu cha Seyili abo bakalikuza kukulwisya Juda. Bakazundigwa. ²³ Nkambo bantu ba Amoni aba Mowabbu bakabuka kuti balwane abakkali baku chilundu chaku Seyili, kuchitila kuti bajaye chakumaninizya akubanyonyoona. Nibakamana akubakkali bakuchilundu cha Seyili, boonse bakagwasyania kunyonyona umwi awumwi. ²⁴ Juda nakasika kubusena kukuzolanga nkanda, bakalanga impi. Amubone, bakali fwide, baliwide aansi; takwepe wakachija. ²⁵ Eelyo Jehosafati abantu b akwe nibakasika kuti babweze zisalo kuzwa kuli mbabo, bakajana akati kabo zintu zyiingi, zyakusama, zintu zijanika zidula ezyo nzibakali bwezela zyingi kwiinda nzibakali kukkonzya kunyampula, zyakababtolela mazuba atatu kuti bakonzye kunyampula ezyo zintu. Kwakali zyingi loko. (muchindi chakuti akati kabo, zimwi zyachindi a zyalino zyakusandulula zibalika kuti ng'ombe. Kutali zisamo, zimwi zyachiindi azyalino zyakusandululwa zibalika kuti mibili ifwide). ²⁶ Mubuzuba bwane bakabungana kumusena wa Bbelakka. Oko bakalumbayizya Jehova, aboobo izina lyabusena obo litegwa ''Musena wa Bbelakka'' kusika sunu obu. ²⁷ Eelyo bakabweda bantu boonse ba Juda a Jelusalema, a Jehosafati mukusolwedela kwabo, kuti bakeende lubo ku Jelusalemu akubotelwa, nkambo Jehova wabachita kutibabotelwe kwinda basinkonyina. ²⁸ Nibakasika ku Jelusalemu aku n'anda ya Jehova atuntimbwa, aampeta amyeembo. ²⁹ Kuyosya kwa Leza kwali aabwami bwamasi nibakamvwa kuti Jehova walwisya basinkondo ba Izilayel. ³⁰ Eelyo bwami bwa Jehosafati bwakalumwide, nkambo Leza wakwe wakamupede lumuno loonse lumuzyungulukide. ³¹ Jehosafati wakendelezya Juda: wakali aminyaka ili makkumi atatu amusanu nakatalika kwendelezya, alimwi wakeendelezya mu Jelusalemu kwamyaaka ili makkumi aabili amusanu. Izina lyabanyina lyakali kutegwa Azubba, mwana musimbi wa Shilihi. ³² Wakeenda munzila zya Asa, wisi takwe pe nakalewuka kuzwa kuli nzizyo; wakachita zyakali kabotu kumenso a Jehova. ³³ Nekubaboobo, masena alaatala takagwisigwa. Mbubonya bantu tebakabika myoyo yabo kuli Leza wabasikale babo. ³⁴ Nkambo mbuli tumwi twambo tuli atala a Jehosafati, kumatalikilo akuma manino, amubone, zililembedwe mulwaano lwa Jehu mwana mulombe wa Hanani, ezyo zilembedwe mumalembe amagwalo abaami ba Izilayeli. ³⁵ Kwinda kwazezi Jehosafati mwaami wa Juda, wakajatana aa Ahaziya, mwaami wa Izilayeli, ooyo wakachita bubi. ³⁶ Wakajatana anguwe kuti ayake maato kuti ayinke ku Tasyisyi. Bakayaka maato ku Eziyoni Gebba. ³⁷ Mpawo Eliyaza mwana mulombe wa Dodavawu wa Malesha, wakasinsima aatala a Jehosafati; wakati, ''Nkambo wajatana aa Ahaziya, Jehova wajaya nzimwakabamba.'' Maato akakwamuka aboobo takachili kukonzya pe kweenda.