¹ Jehosafati mwaami wa Juda wakajoka mulumuno mun'anda yakwe ku Jelusalemu. ² Mpawo Jewu mwana mulombe wa Hanani, sizilengano, wakazwa kuti aswanane anguwe alimwi wakati kumwaami Jehosafati, ''Uyelede kugwasya babi na? Uyelede kuyanda aabo basulide Jehova na? Nkambo kanchito eeyi, bukali bwakusikila kuzwa kuli Jehova.'' ³ Nikuba boobo, kuti zintu zibotu zijanika mulinduwe, mwakabweza matanda a Asila kuzwa kunyika, alimwi wakachita moyo wako kukuyandawula Leza.'' ⁴ Jehosafati wakali kukkala mu Jelusalemu; alimwi wakeenda kuzwa akkati kabantu bazwa ku Bbiyesebba akusika kunyika yazilundu zya Efulemu akubajosya kuli Jehova waba mawisi abo. ⁵ Wakabika babetesi munyika kuzyunguluka myunzi yonse ibalidwe ya Juda, munzi amunzi. ⁶ Wakati kubabetesi, ''Amuchenjele nzimwelede kuchita, nkambo tamulokubetekela muntu pe, pesi kubetekela Jehova, ulandinywe munzila yakubeteka. ⁷ Lino kuzwawo, kuyoosya kwa Jehova ngakube andinywe. Amuchenjele chiindi nimubeteka, nkambo takwe bubi pe kuli Jehova Leza wesu, nikuba kusalula na masinkamulomo abwezwa.'' ⁸ Kwinda kwaboobo, mu Jelusalemu Jehosafati wakabika bamwi ba Levi aba payizi, abamwi bapati bamizimu yan'anda yaba Izilayeli, mukwendelezya bubetesi bwa Jehova, alimwi akambo kambpyopyongano. Bakali kukkala mu Jelusalemu. ⁹ Wakabalayilila kuti, akwamba kuti, ''Mwelede kubeleka kamutobelezya Jehova, chakusyomeka, amoyo wanu woonse. ¹⁰ Kufumbwa chiindi lupyopyongano nilumusikila kuli ndinywe kuzwa kubakulana benu bakkala mumyunzi yabo, nikuba ayendelana akutika kwabulowa, nikuba aatala amilawu amalayilile, milazyo na imbeta, muleelede kubachibula, kuchitila kuti batabi amulandu kunembo lya Jehova, na bukali buyoza kuli ndinywe alimwi buyooza kubakulana banu. Mwayochita echi alimwi tamukwe kuyoba amulandu pe. ¹¹ Amubone, Amaliya mupayizi mupati ngomupati wenu mumakani wonse a Jehova. Zebbadiya mwana mulombe wa Isumayili, mweendelezi wan'anda ya Juda, nguyendelezya makani oonse amwaami. Alimwi, ba Levi bayoba basilutwe bakumubelekela. Amusime akulemeka malayilile, alimwi Jehova abe abaabo balikabotu.''